উত্তৰাখণ্ডৰ ধাৰালীৰ দৰে এইবাৰ জম্মু-কাশ্মীৰৰ (Cloud Burst in JK) কিষ্টৱাৰতো ডাৱৰ বিস্ফোৰণৰ ফলত সৃষ্টি হয় ভয়ংকৰ হিমস্খলন। বৃহস্পতিবাৰে বিয়লি চাশোটি গাঁৱৰ সমীপৰ মাচৈল মাতা মন্দিৰৰ সমীপত ডাৱৰ বিস্ফোৰণৰ ঘটনা সংঘটিত হয়।
ইয়াৰ বাবে সৃষ্টি হোৱা হিমস্খলনত বহু লোক আবদ্ধ হৈ পৰিছে। এজন প্ৰশাসনিক বিষয়াই সংবাদ সংস্থা পি টি আইক জনোৱা মতে, কমেও ১৫ জন লোকৰ মৃত্যু হৈছে। অৱশ্যে মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
কিষ্টৱাৰৰ উপায়ুক্ত পংকজ শৰ্মাই কয়, “চাশোটি গাঁৱত ভূমিস্খলন হৈছে। এই গাঁৱৰ পৰাই আৰম্ভ হৈছিল ‘মাচৈল মাতা যাত্ৰা’। ঘটনাৰ কিছু সময়ৰ পাছতে উদ্ধাৰকাৰী দল গাঁওখনত উপস্থিত হয়। উদ্ধাৰৰ কাম আৰম্ভ হৈছে।”
আনহাতে, কেন্দ্ৰীয় মন্ত্ৰী জিতেন্দ্ৰ সিঙে উপাযুক্তগৰাকীৰ সৈতে কথা পাতি পৰিস্থিতি সন্দৰ্ভত আলোচনা কৰে।
স্থানীয় বিধায়ক সুনীল কুমাৰ শৰ্মাই কয় যে কেইবাজনো লোকৰ মৃত্যুৰ আশংকা কৰা হৈছে। অৱশ্যে উদ্ধাৰৰ কাম আৰম্ভ কৰিছে প্ৰশাসনে। লেফটেনেণ্ট গৱৰ্ণৰ মনোজ সিনহাই আৰক্ষী, সেনা আৰু দুৰ্যোগ ব্যৱস্থাপনা দলক ক্ষিপ্ৰতাৰে উদ্ধাৰৰ কাম সম্পন্ন কৰিবলৈ নিৰ্দেশ দিছে।
উল্লেখ্য যে ৫ আগষ্টত উত্তৰাখণ্ডৰ উত্তৰাকাশীৰ ধৰালী আৰু হৰ্ষিল গাঁৱত ডাৱৰ বিস্ফোৰণৰ ফলত আকস্মিক বান নামি আহিছিল। উক্ত প্ৰাকৃতিক দুৰ্যোগৰ বাবেই অধিকাংশ ধৰালী শিল আৰু বোকাৰ তলত আবদ্ধ হৈ পৰিছিল। উত্তৰাখণ্ডৰ এই ঘটনাত ৫ জন লোকৰ মৃত্যু হৈছে।
