শুক্ৰবাৰে দুদিনীয়া ভ্ৰমণসূচীৰে জাপানত উপস্থিত হৈছে প্ৰধানমন্ত্ৰী নৰেন্দ্ৰ মোদী (Narendra Modi Japan visit)। সূৰ্যোদয়ৰ দেশৰ পৰা তেওঁ চীনলৈ ৰাওনা হ’ব । চীনত মোদীয়ে ছাংহাই সহযোগিতা সংস্থাৰ সন্মিলনত অংশগ্ৰহণ কৰিব। কিন্তু চীন ভ্ৰমণৰ পূৰ্বে তেওঁৰ জাপান ভ্ৰমণ তাৎপৰ্যপূৰ্ণ বুলি বিবেচিত হৈছে।
এই ভ্ৰমণৰ সময়ত তেওঁ জাপানৰ প্ৰধানমন্ত্ৰী শ্বিগেৰু ইছিবাকো সাক্ষাৎ কৰিব। যিকেইখন দেশৰ সৈতে ভাৰতৰ এক বৃহৎ কৌশলগত অংশীদাৰিত্ব আছে তাৰ ভিতৰত জাপান হৈছে অন্যতম। মোদী-ইছিবা বৈঠকৰ পাছত এই বুজাবুজি আৰু অধিক বৃদ্ধি পোৱাৰ সম্ভাৱনা আছে৷
প্ৰধানমন্ত্ৰীৰ এই ভ্ৰমণৰ সময়ত ভাৰত আৰু আমেৰিকাৰ মাজত কেইবাখনো বুজাবুজিৰ চুক্তি স্বাক্ষৰিত হোৱাৰ সম্ভাৱনা আছে। ইয়াৰে অন্যতম উল্লেখযোগ্য হ’ল বুলেট ট্ৰেইনৰ যৌথ উৎপাদন। একাধিক সংবাদ মাধ্যমৰ বাতৰি অনুসৰি, নতুন দিল্লী আৰু টকিঅ’ই ই-১০ শ্বিনকানচেন পৰিয়ালৰ উচ্চমানৰ বুলেট ট্ৰেইনৰ যৌথ উৎপাদন সন্দৰ্ভত প্ৰাৰম্ভিক আলোচনা সমাপ্ত কৰিব পাৰে।
ভাৰতত জাপানৰ বিনিয়োগ সন্দৰ্ভতো দেশৰ উদ্যোগৰ সৈতে কথা পাতিব পাৰে মোদীয়ে। স্বাভাৱিকতে অৰ্থনৈতিক আলোচনাত ড’নাল্ড ট্ৰাম্প আৰু তেওঁৰ শুল্ক আৰোপ কৰাৰ সিদ্ধান্তৰ বিষয়টো আহিব পাৰে। ইতিমধ্যে ট্ৰাম্পে ৰাছিয়াৰ পৰা তেল ক্ৰয় কৰিবলৈ প্ৰায়বোৰ ভাৰতীয় সামগ্ৰীৰ ওপৰত মুঠ ৫০ শতাংশ শুল্ক আৰোপ কৰিছে। এই পৰিস্থিতিত দিল্লীয়ে ভাৰতীয় সামগ্ৰী বিক্ৰীৰ বাবে নতুন বজাৰ বিচাৰিবলগা হৈছে, য’ত শুল্কমুক্ত বা কম শুল্কত বিক্ৰী কৰিব পৰা যাব।
নতুন দিল্লীয়ে জাপানত এনে সম্ভাৱনা আছে নেকি সেই বিষয়ে অন্বেষণ কৰিব বিচাৰিছে।
ভাৰতত থকা জাপানৰ ৰাষ্ট্ৰদূত চিবি জৰ্জে সংবাদ সংস্থা এ এন আইক জনাইছে যে শেহতীয়া ভূ-ৰাজনৈতিক পৰিস্থিতিৰ বিষয়ে দুয়ো ৰাষ্ট্ৰপ্ৰধানৰ মাজত আলোচনা হ’ব। চতুৰ্ভুজ অক্ষ ‘কোৱাড’ৰ বিষয়েও আলোচনা হ’ব।
উল্লেখ্য যে ভাৰত, আমেৰিকা, জাপান আৰু অষ্ট্ৰেলিয়াৰ চতুৰ্ভুজ অক্ষ ‘কোৱাড’ ভাৰত-প্ৰশান্ত মহাসাগৰীয় অঞ্চলত বেইজিঙৰ ‘প্ৰভাৱ’ যিমান পাৰি কম কৰি ৰাখিবলৈ একেলগে কাম কৰে। কিন্তু বহুতৰ মতে, ট্ৰাম্পৰ শুল্ক যুদ্ধই নতুন দিল্লী আৰু ৱাশ্বিংটনৰ এই বৃহত্তৰ কৌশলগত অংশীদাৰিত্বত নেতিবাচক প্ৰভাৱ পেলাব। এই পৰিস্থিতিত ভাৰতে ‘কোৱাড’ৰ গুৰুত্বপূৰ্ণ সদস্য জাপানৰ সৈতে সম্পৰ্ক উন্নত কৰাৰ চেষ্টা কৰিছে।
কেন্দ্ৰৰ এক সূত্ৰ মতে, জাপানৰ প্ৰতিনিধিৰ সৈতে কৃত্ৰিম বুদ্ধিমত্তা (AI), অৰ্ধপৰিবাহীৰ ব্যৱহাৰৰ বিষয়েও আলোচনা কৰিব মোদীয়ে। ইয়াৰ পূৰ্বে ২০১৮ চনত জাপান ভ্ৰমণ কৰিছিল মোদীয়ে। ৭ বছৰৰ পাছত পুনৰ দেশখনলৈ গৈছে প্ৰধানমন্ত্ৰী মোদী।
