হাৰিয়ানাত ঘৰৰ বাহিৰত হুলস্থুল কৰা এদল যুৱকক বাধা দিবলৈ চেষ্টা কৰি থকা অৱস্থাত আক্ৰান্ত হয় এজন আৰক্ষী বিষয়া (Police Officer Murder)। অভিযোগ অনুসৰি, তেওঁক লাঠি আৰু ইটাৰে প্ৰহাৰ কৰা হয়। গুৰুতৰভাৱে আঘাতপ্ৰাপ্ত আৰক্ষী বিষয়াজনক চিকিৎসালয়ত ভৰ্তি কৰোৱা হয়।
পিছত চিকিৎসাৰ সময়ত তেওঁৰ মৃত্যু হয়। এই ঘটনাক লৈ সৃষ্টি হৈছে চাঞ্চল্য। ইতিমধ্যে এই ঘটনাত ৫জন লোকক গ্ৰেপ্তাৰ কৰিছে আৰক্ষীয়ে। বাকীবোৰৰ সন্ধান চলি আছে। আৰক্ষীয়ে জনোৱা মতে, বৃহস্পতিবাৰে নিশা হাৰিয়ানাৰ ধনী শ্যামলাল অঞ্চলৰ উপ-পৰিদৰ্শক ৰমেশ কুমাৰক প্ৰহাৰ কৰি হত্যা কৰা হয়।
নিশা প্ৰায় ১১ বজাত সংঘটিত হয় এই ঘটনা। আৰক্ষী অধীক্ষক শশাংক কুমাৰ সাৱনে জনোৱা মতে, নিশা ৰমেশৰ ঘৰৰ সন্মুখত এদল যুৱকে হুলস্থুল কৰি আছিল। সেই সময়ত তেওঁ ওলাই আহি তেওঁলোকক শান্ত কৰিবলৈ চেষ্টা কৰে। অৱশ্যে ইয়াৰ পৰিৱৰ্তে যুৱককেইজনে তেওঁক আক্ৰমণ কৰে।
অভিযোগ অনুসৰি, অভিযুক্তই ৰমেশক ঘেৰি ধৰি তৰ্ক-বিতৰ্ক কৰে। কাজিয়াৰ সময়ত যুৱককেইজনে হঠাতে ৰমেশক প্ৰহাৰ কৰিবলৈ আৰম্ভ কৰে। অভিযোগ অনুসৰি, তেওঁক লাঠিৰে প্ৰহাৰ কৰা হয়। মূৰত ইটাৰেও খুন্দিয়ায়।
শশাংক কুমাৰে কয় যে ৰমেশে মূৰত গুৰুতৰভাৱে আঘাত পায়। ইয়াৰ পিছতে অভিযুক্তই তেওঁক ৰক্তাক্ত অৱস্থাত এৰি পলাই যায়। স্থানীয় ৰাইজৰ সহায়ত পৰিয়ালৰ লোকে আহত ৰমেশক ততাতৈয়াকৈ চিকিৎসালয়লৈ প্ৰেৰণ কৰে। কিন্তু চিকিৎসাধীন অৱস্থাতে তেওঁৰ মৃত্যু হয়।
এই ঘটনাত ১০জন লোকৰ বিৰুদ্ধে আৰক্ষীয়ে হত্যাৰ গোচৰ ৰুজু কৰিছে। ৫ জনক গ্ৰেপ্তাৰ কৰা হৈছে। বাকীসকলৰ বাবে সন্ধান অব্যাহত আছে। আটাইকেইজন অভিযুক্ত চুবুৰীটোৰে বাসিন্দা। ইতিমধ্যে আৰক্ষীয়ে জব্দ কৰিছে অভিযুক্তৰ এখন গাড়ী আৰু এখন স্কুটী।
