‘বিকশিত ভাৰত ইয়ং লিডাৰ্ছ ডায়েলগ’ অনুষ্ঠানত অংশগ্ৰহণ কৰিবলৈ অহা প্ৰধানমন্ত্ৰী নৰেন্দ্ৰ মোদীয়ে (Narendra Modi) জেন জিৰ প্ৰশংসা কৰি কয় যে দেশখনক আগুৱাই নিয়াৰ ক্ষেত্ৰত তেওঁলোকৰ অৱদান অনস্বীকাৰ্য।
পি টি আইৰ সূত্ৰ অনুসৰি, দেশৰ প্ৰায় ৫০ লাখ যুৱক-যুৱতীৰ সৈতে ৰাজধানী নতুন দিল্লীৰ ভাৰত মণ্ডপমত আয়োজন কৰা হৈছে ইয়ং লিডাৰ্ছ ডায়েলগ অনুষ্ঠান।
সোমবাৰে প্ৰধানমন্ত্ৰীয়ে জেন জিক সম্বোধন কৰি কয় যে তেওঁলোকৰ শক্তি, সৃষ্টিশীলতা, উদ্ভাৱনী চিন্তাধাৰাই ভৱিষ্যতে ভাৰতক আগুৱাই নিয়াত সহায় কৰিব। প্ৰধানমন্ত্ৰীয়ে লগতে কয় যে কেন্দ্ৰীয় চৰকাৰে বিগত সময়ত দেশৰ এই যুৱ সমাজৰ কথা চিন্তা কৰি প্ৰকল্প আৰম্ভ কৰিছে, যিবোৰ ভৱিষ্যতে ফলপ্ৰসূ হ’ব।
যোৱা কেইবছৰমানৰ পৰা দেশত ষ্টাৰ্টআপে গতি লাভ কৰিছে। সেয়েহে ভৱিষ্যতে চৰকাৰে অধিক যুৱকেন্দ্ৰিক প্ৰকল্পৰ কথা চিন্তা কৰিছে বুলিও তেওঁ কয়। প্ৰধানমন্ত্ৰীয়ে লগতে কয় যে সংস্কৃতি, বিষয়বস্তু আৰু সৃষ্টিশীলতাত শিপাই থকা যুৱক-যুৱতীসকলৰ অৱদানৰ বাবেই ভাৰতে উল্লেখযোগ্য অৰ্থনৈতিক বিকাশ সাধন কৰিছে।
উল্লেখ্য যে প্ৰতিবছৰে ১২ জানুৱাৰীত স্বামী বিবেকানন্দৰ জন্মবাৰ্ষিকীত দেশৰ কোনো এখন ৰাজ্য বা কেন্দ্ৰীয়শাসিত অঞ্চলত এই অনুষ্ঠানৰ আয়োজন কৰা হয়। ২০২৫ আৰু ২০২৬ চনত দিল্লীত এই অনুষ্ঠানৰ আয়োজন কৰা হৈছে।
