চলিত বিত্তীয় বৰ্ষৰ (২০২৫-২৬) তুলনাত ২০২৬-২৭ বিত্তীয় বৰ্ষত ভাৰতৰ জিডিপি (GDP, gross domestic product) বিকাশৰ হাৰ বৃদ্ধি পাইছে। বৃহস্পতিবাৰে বিয়লি লোকসভাত কেন্দ্ৰীয় বিত্তমন্ত্ৰী নিৰ্মলা সীতাৰমণে (Nirmala Sitharaman) ‘অৰ্থনৈতিক জৰীপ ২০২৫-২৬’ (Economic Survey 2025-26) প্ৰতিবেদন দাখিল (Report Submission) কৰে। অৰ্থনৈতিক সমীক্ষাত পূৰ্বানুমান কৰা হৈছে যে ২০২৬-২৭ বিত্তীয় বৰ্ষত জিডিপি বৃদ্ধিৰ হাৰ ৬.৮ শতাংশৰ পৰা ৭.২ শতাংশ হ’ব পাৰে।
যোৱা বছৰৰ সমীক্ষাত ২০২৫-২৬ বিত্তীয় বৰ্ষৰ বাবে জিডিপি বিকাশৰ হাৰ ৬.৩ৰ পৰা ৬.৮ শতাংশ হোৱাৰ ভৱিষ্যদ্বাণী কৰা হৈছিল। সমীক্ষাটোৱে ইংগিত দিয়ে যে বিভিন্ন আন্তঃৰাষ্ট্ৰীয় পৰিঘটনাই বাণিজ্যত প্ৰভাৱ পেলোৱাৰ পিছতো ভাৰতত বৃদ্ধিৰ হাৰে মূৰ দাঙি উঠিছে। এই সন্দৰ্ভত সমীক্ষাত পৰিৱেশৰ বিপদৰ পৰা হাত সাৰি দেশৰ অৰ্থনীতি অটল কৰি ৰাখিবলৈ গঠনমূলক সংস্কাৰৰ পৰামৰ্শ দিয়া হৈছে। অধ্যয়নটোত এইটোও কোৱা হৈছে যে যদিহে কৃত্ৰিম বুদ্ধিমত্তাই আশা কৰা ধৰণে উৎপাদনশীলতা বজাই ৰাখিব নোৱাৰে তেন্তে অৰ্থনীতিৰ ওপৰত বোজা জাপি দিব পাৰে।
ৰাছিয়াৰ পৰা তেল আমদানি অব্যাহত ৰখাৰ বাবে আমেৰিকাই ভাৰতৰ ওপৰত অতিৰিক্ত ২৫ শতাংশ (মুঠ ৫০ শতাংশ) শুল্ক আৰোপ কৰিছে। ভাৰতীয় সামগ্ৰীৰ ওপৰত সেই বৃহৎ শুল্ক আৰোপ কৰাৰ পিছত বহু জৰীপ সংস্থাই ইংগিত দিছিল যে ভাৰতৰ জিডিপি বিকাশৰ হাৰ লেহেমীয়া হ’ব পাৰে। অৱশ্যে গাঁথনিগত সংস্কাৰৰ বাবে ভাৰতীয় অৰ্থনীতিয়ে এই ‘পেৰিফেৰেল ৰিস্ক’ৰ পৰা হাত সাৰিবলৈ সক্ষম হৈছে বুলি সমীক্ষাটোত উল্লেখ কৰা হৈছে।
সমীক্ষাটোত লগতে কোৱা হৈছে যে অহা বিত্তীয় বৰ্ষত ভাৰতত মুদ্ৰাস্ফীতি ক্ৰমান্বয়ে বৃদ্ধি পাব। অৱশ্যে ৰিজাৰ্ভ বেংকে নিৰ্ধাৰণ কৰা সীমাৰ ভিতৰত থাকিব বুলি কোৱা হৈছে। আমেৰিকান ডলাৰৰ বিপৰীতে টকাৰ মূল্য ক্ৰমান্বয়ে হ্ৰাস পোৱাৰ পাছতো ভাৰতে খাৰুৱা তেল আৰু খাদ্য সামগ্ৰীৰ দাম নিয়ন্ত্ৰণত ৰাখিবলৈ সক্ষম হৈছে।
