ধ্বনিভোটত জয়ী (Winner in the vote) হৈ অধ্যক্ষ (Speaker of Lok Sabha)ৰ আসনলৈ উভতি অহাৰ পিছতে এক শক্তিশালী বাৰ্তা প্ৰদান কৰে ওম বিৰলা (Om Birla)ই। বৃহস্পতিবাৰৰ বৈঠকত তেওঁ কয় যে সংসদ কঠোৰভাৱে নিয়ম অনুসৰি পৰিচালিত হয় আৰু কোনো সাংসদৰ কোনো সময়ত বা কোনো বিষয়ত কথা কোৱাৰ বিশেষাধিকাৰ নাই।
১০ ফেব্ৰুৱাৰীত বাজেট অধিৱেশনৰ প্ৰথম পৰ্যায়ত বিৰোধীয়ে পক্ষপাতিত্বমূলক আচৰণৰ অভিযোগ উত্থাপন কৰি তেওঁৰ বিৰুদ্ধে অনাস্থা প্ৰস্তাৱৰ জাননী দাখিল কৰিছিল। পৰম্পৰা অনুসৰণ কৰি তেওঁ তেতিয়াৰ পৰা অধিৱেশন পৰিচালনা কৰা নাই। যোৱা ৯ মাৰ্চৰ পৰা বাজেট অধিৱেশনৰ দ্বিতীয় পৰ্যায় আৰম্ভ হোৱাৰ পিছতো তেওঁ সদস্যৰ আসনত বহিছিল।বুধবাৰে বিৰোধীয়ে অনা অনাস্থা প্ৰস্তাৱ ধ্বনিভোটত নাকচ কৰাৰ পিছত অধ্যক্ষৰ আসনলৈ উভতি অহাৰ পিছত এইবাৰ বিৰোধীক সকীয়াই দিয়ে বিৰলাই। লগতে তেওঁৰ মন্তব্য, “অধ্যক্ষৰ আসন কোনো ব্যক্তিৰ নহয়। বৰঞ্চ ই সংসদৰ মৰ্যাদাৰ প্ৰতীক। যিকোনো সদস্যৰ বাবে গ্ৰহণযোগ্য হওক বা নহওক, লোকসভাই নিৰ্ধাৰিত নিয়ম আৰু পদ্ধতি অনুসৰিয়ে কাম কৰিব। মই সততা আৰু নিৰপেক্ষতাৰে অধিৱেশন পৰিচালনা কৰিম।”
ৰাজস্থানৰ কোটা লোকসভা সমষ্টিৰ পৰা বিজেপিৰ টিকটত জয়ী হোৱা বীৰলাই কয়, “এই সংসদৰ কোনো সদস্যই নিয়ম-নীতিৰ বাহিৰত কথা কোৱাৰ কোনো সৌভাগ্য নাই। সংসদে ইমান দিনে নিয়ম-নীতি পালন কৰি আহিছে আৰু ভৱিষ্যতেও তেনেকৈয়ে পালন কৰি যাব।” বিৰলাই অনাস্থা বিতৰ্ক আৰু ধ্বনিভোটৰ সময়ত তেওঁৰ ওপৰত আস্থা প্ৰকাশ কৰা সাংসদসকলকো ধন্যবাদ জ্ঞাপন কৰে। লগতে তেওঁ কয়, “যোৱা দুদিনৰ বিতৰ্কত একাংশ সদস্যই কৈছে যে বিৰোধী দলৰ নেতা ৰাহুল গান্ধীক পৰ্যাপ্ত স্থান দিয়া হোৱা নাই আৰু তেওঁক যেতিয়াই ইচ্ছা আৰু যিকোনো বিষয়ত কথা কোৱাৰ সুযোগ দিয়া উচিত। সংসদত সকলোৰে কথা কোৱাৰ অধিকাৰ আছে, কিন্তু কেৱল নিয়ম-নীতি অনুসৰিহে। কোনো সদস্যই, আনকি প্ৰধানমন্ত্ৰী বা যিকোনো মন্ত্ৰীয়েও অধ্যক্ষৰ অনুমতি অবিহনে কথা ক’ব নোৱাৰে। তেওঁ কেৱল অধ্যক্ষৰ অনুমতি অবিহনে কথা ক’ব নোৱাৰে। চকীখনে যেতিয়া অনুমতি দিয়ে তেতিয়াহে তেওঁ কথা ক’ব পাৰে।”
ৰাহুল গান্ধীকে ধৰি বিৰোধী দলৰ সাংসদে মাইক বন্ধ কৰাৰ অভিযোগকো অধ্যক্ষই খাৰিজ কৰি কয়, “মোৰ হাতত মাইক অন বা অফ কৰিবলৈ চুইচ নাই। অধ্যক্ষই যেতিয়া কোনো সদস্যক কথা ক’বলৈ অনুমতি দিয়ে তেতিয়াহে মাইক অন কৰা হয়।” উল্লেখযোগ্য যে যোৱা ফেব্ৰুৱাৰী মাহত বাজেট অধিবেশনৰ প্ৰথম পৰ্যায়ত যেতিয়া ৰাহুল গান্ধীয়ে চীনৰ আগ্ৰাসন সম্পৰ্কীয় প্ৰাক্তন সেনাপ্ৰধান মনোজ নাৰৱাণেৰ এখন অপ্ৰকাশিত গ্ৰন্থৰ পৰা কেইশাৰীমান উদ্ধৃতি দিবলৈ চেষ্টা কৰিছিল তেতিয়া অধ্যক্ষ বিৰলাই তেওঁক বাধা দিছিল। সংসদীয় নিয়ম অনুসৰি কোনো গ্ৰন্থ বা বাতৰিকাকতৰ উদ্ধৃতি দিব নোৱাৰিব বুলিও তেওঁ কয়। কিন্তু সেই অধিৱেশনত বিজেপিৰ সাংসদ নিশিকান্ত ডুবেয়ে কোনো বাধা নোহোৱাকৈ ইখনৰ পিছত সিখন গ্ৰন্থৰ পৰা ‘গান্ধী-নেহৰু পৰিয়ালৰ দুৰ্নীতি’ সম্পৰ্কে বিভিন্ন মন্তব্যৰ উদ্ধৃতি দিছিল। আনকি বৃহস্পতিবাৰেও নিশিকান্তই এখন গ্ৰন্থৰ কথা উল্লেখ কৰি দেশৰ প্ৰথম প্ৰধানমন্ত্ৰী জৱাহৰলাল নেহৰুৰ বিষয়ে অপমানজনক মন্তব্য কৰা বুলি অভিযোগ উঠিছে। ইয়াক লৈ বিতৰ্কৰ মাজতে বিৰলাই ভাষণ সমাপ্ত কৰি বিয়লি ২ বজালৈ সভা স্থগিত ৰাখে।
