দুদিনীয়া ভ্ৰমণসূচীৰে শুকুৰবাৰে গুৱাহাটীত উপস্থিত হৈছে প্ৰধানমন্ত্ৰী নৰেন্দ্ৰ মোদী (Modi Assam visit)। দুপৰীয়া বিমানবন্দৰত প্ৰধানমন্ত্ৰীক আদৰণি জনায় মুখ্যমন্ত্ৰী ডঃ হিমন্ত বিশ্ব শৰ্মা, কেন্দ্ৰীয় মন্ত্ৰী সৰ্বানন্দ সোণোৱাল, ৰাজ্যিক বিজেপিৰ সভাপতি দিলীপ কুমাৰ শইকীয়াই। বিমানবন্দৰৰ পৰা প্ৰধানমন্ত্ৰী পোনে পোনে কোকৰাঝাৰলৈ যোৱা কথা আছিল যদিও প্ৰতিকূল বতৰৰ বাবে তেওঁৰ সেই কাৰ্যসূচী বাতিল কৰা হয়। উল্লেখযোগ্য যে কোকৰাঝাৰ (Kokrajhar)ত আয়োজিত বিশাল জনসভাত প্ৰধানমন্ত্ৰীয়ে কেইবাটাও প্ৰকল্প উদ্বোধন (Project inauguration) তথা শিলান্যাস কৰিবলগা আছিল। কিন্তু কোকৰাঝাৰৰ কাৰ্যসূচী বাতিল হোৱাত খানাপাৰাৰ জ্যোতি-বিষ্ণু কলাকেন্দ্ৰৰ পৰায়ে উক্ত কাৰ্যসূচীসমূহ ভাৰ্ছুৱেলি সমাপন কৰে।
ইফালে প্ৰধানমন্ত্ৰীৰ আগমন উপলক্ষে মুখ্যমন্ত্ৰী ডঃ হিমন্ত বিশ্ব শৰ্মাই কয়, “মাননীয় প্ৰধানমন্ত্ৰী নৰেন্দ্ৰ মোদী ডাঙৰীয়াৰ দূৰদৰ্শী নেতৃত্ব আৰু অসমৰ প্ৰতি থকা বিশেষ আদৰৰ ফলতেই আজি আমাৰ ৰাজ্যই উন্নয়ন, শান্তি আৰু বিকাশৰ এক নতুন অধ্যায় লিখিবলৈ সক্ষম হৈছে। নতুন ভাৰতৰ খনিকৰগৰাকীৰ অকুণ্ঠ সমৰ্থন আৰু দিক-নির্দেশনাত ৰাজ্যখনে বিগত কিছু বছৰত দ্ৰুতগতিৰে অগ্ৰগতিৰ পথত আগবাঢ়িছে। বিশেষকৈ বিটিআৰ অঞ্চলত আৰু সমগ্ৰ অসমত শান্তি, প্ৰগতি আৰু উন্নয়নৰ এক নতুন পৰিৱেশ গঢ় লৈ উঠিছে, যিয়ে উন্নয়নৰ বাবে এক শক্তিশালী বুনিয়াদ নিৰ্মাণ কৰিছে।”
উল্লেখযোগ্য যে শুকুৰবাৰে প্ৰধানমন্ত্ৰীয়ে ৪,৫৭০ কোটিৰো অধিক মূল্যৰ বিভিন্ন উন্নয়নমূলক প্ৰকল্প মুকলি তথা শিলান্যাস কৰে।
এই প্ৰকল্পসমূহৰ ভিতৰত আছে :
- তিনিখনকৈ নতুন ৰে’লৰ ফ্লেগ অফ
১. কামাখ্যা-চৰলাপল্লী অমৃত ভাৰত এক্সপ্ৰেছ
২. গুৱাহাটী-নিউ জলপাইগুৰি এক্সপ্ৰেছ
৩. নাৰেংগী-আগৰতলা এক্সপ্ৰেছ - কোকৰাঝাৰ জিলাৰ বাশবাৰীত প্ৰধানমন্ত্ৰী মোদীয়ে পিৰিয়ডিক অভাৰহ’লিং ৱৰ্কশ্বপৰ (পি অ’ এইচ) আধাৰশিলা
- ৩,২০০ কোটিৰো অধিক ব্যয়সাপেক্ষে অসমমালা ৩.০ৰ পথ আন্তঃগাঁথনি প্ৰকল্পৰ ভাৰ্চুৱেলী ভূমি পূজন। সমগ্ৰ অসমতে ৯০০ কিলোমিটাৰৰো অধিক পথ নিৰ্মাণ কৰা হ’ব ।
- বি টি চি এলেকাত প্ৰায় ১১০০ কোটি টকা বিনিয়োগেৰে নিৰ্মাণ কৰা চাৰিখন উৰণ সেতু আৰু দুখন দলঙকে ধৰি ছটা পথ আন্তঃগাঁথনি প্ৰকল্পৰ ভূমি পূজন
- চাহ শ্ৰমিকক ভূমিপট্টা প্ৰদানৰ আনুষ্ঠানিক আৰম্ভণি
- পি এম কিষাণ নিধিৰ ২২ নং কিস্তিৰ ধন প্ৰদানৰ আনুষ্ঠানিক আৰম্ভণি
এই সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাই কয়, “আজি গুৱাহাটীত এক ঐতিহাসিক সন্ধিয়া! এক নতুন ইতিহাসৰ সূচনা কৰি আজি দুই শতিকাজোৰা প্রতাৰণাৰ অৱসান ঘটাই মাননীয় প্রধানমন্ত্রী নৰেন্দ্র মোদী ডাঙৰীয়াই আমাৰ চাহ শ্রমিক ভাই-ভনীসকললৈ ভূমিপট্টা বিতৰণৰ শুভাৰম্ভ কৰে। এই সময়তে মাননীয় মোদী ডাঙৰীয়াই আজি বিভিন্ন খণ্ডৰ ১৯,৫৭৭.৫৮ কোটি টকা ব্যয়ৰ ১৩টাকৈ প্ৰকল্পৰ উৎসৰ্গা আৰু শুভাৰম্ভণি কৰে।”
বিভিন্ন প্ৰকল্পৰ কথা উল্লেখ কৰি মুখ্যমন্ত্ৰীয়ে কয়, “হাইড্ৰ’কাৰ্বন, বিদ্যুৎ, জল পৰিবহণ, ৰে’লৱে আদি খণ্ডত ব্যাপ্ত এই প্ৰকল্পসমূহে অঞ্চলটোত উন্নয়নৰ এক নতুন প্ৰভাতৰ আৰম্ভণি কৰিব আৰু আমাৰ বিকাশৰ উচ্চাকাংক্ষাক সমৰ্থন যোগাই ‘বিকশিত অসম’ লক্ষ্যত উপনীত হোৱাত সহায় কৰিব।”
