ব্যতিক্ৰমী পৰিস্থিতিতহে আৰক্ষীয়ে পেলেট গান বা পেলেট বন্দুক ব্যৱহাৰ কৰিব পাৰে। বৃহস্পতিবাৰে উচ্চতম ন্যায়ালয়ে এই কথা স্পষ্ট কৰি দিয়ে। একে সময়তে যন্তৰ-মন্তৰত প্ৰতিবাদৰ সময়ত আৰ এ এফে কি কি কাৰ্টিজ নিক্ষেপ কৰিছিল তাৰ হিচাপ সংৰক্ষণ কৰিবলৈও কেন্দ্ৰক নিৰ্দেশ দিয়ে।
নীট (NEET) প্ৰশ্নকাকত ফাদিল গোচৰৰ প্ৰতিবাদত দিল্লীৰ যন্তৰ-মন্তৰত প্ৰতিবাদৰ সময়ত পেলেট গুলী নিক্ষেপ কৰাৰ অভিযোগ উত্থাপন হৈছিল। অভিযোগ অনুসৰি, ইয়াৰ ফলত কেইবাজনো লোক আহত হৈছে।
এনে পৰিস্থিতিত উচ্চতম ন্যায়ালয়ত পেলেট গুলীৰ ব্যৱহাৰ সম্পূৰ্ণ নিষেধাজ্ঞা আৰোপ কৰি গোচৰ ৰুজু কৰা হয়। ইয়াৰে দুজন আবেদনকাৰীয়ে দাবী কৰিছে যে প্ৰতিবাদৰ সময়ত তেওঁলোক পেলেট গুলীত আহত হৈছিল। প্ৰাক্তন কেন্দ্ৰীয় তথ্য আয়ুক্ত তথা অৱসৰপ্ৰাপ্ত আমোলা যশবৰ্ধন আজাদেও পেলেট গুলী ব্যৱহাৰত নিষেধাজ্ঞা আৰোপ কৰি গোচৰ তৰে।
বৃহস্পতিবাৰে উচ্চতম ন্যায়ালয়ৰ মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচি আৰু ন্যায়াধীশ ভি মোহনৰ বিচাৰপীঠত গোচৰটো শুনানিৰ বাবে উত্থাপন হয়। শীর্ষ আদালতে কয় যে আৰক্ষীয়ে বাহিনীৰ নিয়ম অনুসৰি পেলেট গুলী ব্যৱহাৰ কৰিব পাৰে, কিন্তু ব্যতিক্ৰমী ক্ষেত্ৰতহে।
এই প্ৰসংগত আদালতে ‘ব্যুৰো অৱ পুলিচ ৰিচাৰ্চ এণ্ড ডেভেলপমেণ্ট’ৰ গাইডলাইনৰ কথাও উল্লেখ কৰে। ইয়াৰ উপৰি উচ্চতম ন্যায়ালয়ে দিল্লী আৰক্ষীক পেলেট গুলী ব্যৱহাৰৰ ষ্টেণ্ডাৰ্ড অপাৰেটিং প্ৰচিডিজ (এছ অ’ পি) দাখিল কৰিবলৈ নিৰ্দেশ দিছে।
মুখ্য ন্যায়াধীশ কান্তৰ বিচাৰপীঠে কয় যে প্ৰশ্নকাকত ফাদিল বিৰোধী আন্দোলনৰ সময়ত পেলেট গুলী চলোৱা বিষয়টোৰ তদন্ত কৰা হ’ব। আজি শুনানিৰ সময়ত কেন্দ্ৰৰ হৈ আদালতত উপস্থিত থাকে ছলিচিটৰ জেনেৰেল তুষাৰ মেহতা।
প্ৰতিবাদৰ সময়ত যন্তৰ-মন্তৰত নিয়োজিত আৰ এ এফৰ কাৰ্টিজৰ ৰেকৰ্ড ৰখাৰ নিৰ্দেশ দিছে উচ্চতম ন্যায়ালয়ে। প্ৰতিবাদৰ সময়ত পেলেট গুলীচালনাত আহত লোকৰ যথাযথ চিকিৎসাৰ নিৰ্দেশো উচ্চতম ন্যায়ালয়ে প্ৰদান কৰিছে।
