এল পি জিভৰ্তি এখন জাহাজে নিৰাপদে অতিক্ৰম কৰিলে হৰমুজ প্ৰণালী। জাহাজখনৰ গন্তব্যস্থান ভাৰত। এক সূত্ৰৰ উদ্ধৃতি দি এনডিটিভিয়ে প্ৰকাশ কৰিছে এই খবৰ। সূত্ৰটোৱে জনোৱা মতে, শুকুৰবাৰে বিয়লি (ইৰাণৰ সময় অনুসৰি) জাহাজখনে হৰমুজ প্ৰণালী অতিক্ৰম কৰিছিল। আন এখন জাহাজো তাৰ মাজেৰে ভাৰত অভিমুখে আহিব।
শুকুৰবাৰে ভাৰতত থকা ইৰাণৰ ৰাষ্ট্ৰদূতে ভাৰত অভিমুখী জাহাজখনে নিৰাপদে হৰমুজ পাৰ হ’ব পাৰিব বুলি জানিবলৈ দিয়ে। বন্ধু ইৰাণে সেইটো নিশ্চিত কৰিব। বৃহস্পতিবাৰে ইৰাণৰ ৰাষ্ট্ৰপতিৰ সৈতে বাৰ্তালাপ কৰে প্ৰধানমন্ত্ৰী নৰেন্দ্ৰ মোদীয়ে।
এল পি জিভৰ্তি জাহাজখন ভাৰতলৈ অহাৰ ফলত দেশত ৰন্ধন গেছৰ চিন্তা বহু পৰিমাণে হ্ৰাস পাব বুলি ধাৰণা কৰা হৈছে। শুকুৰবাৰে ভাৰতত থকা ইৰাণৰ ৰাষ্ট্ৰদূত মহম্মদ ফথালীয়ে কয় যে তেওঁলোকে ভাৰত অভিমুখী কোনো জাহাজ হৰমুজ প্ৰণালীৰ মাজেৰে পাৰ হোৱাত বাধা নিদিয়ে।
ফাথালিয়ে কয়, “ভাৰত আৰু ইৰাণ বন্ধু। আমি সেইটো বিশ্বাস কৰোঁ। আমি বিশ্বাস কৰোঁ যে এই দুখন দেশ বন্ধু। আমাৰ স্বাৰ্থ একে। আমাৰ ভাগ্য একে।” তেওঁ লগতে কয়, “ভাৰতৰ জনসাধাৰণে যদি কষ্ট পায়, তেন্তে আমিও কষ্ট পাম। সেইবাবেই ভাৰত চৰকাৰে আমাক সহায় কৰিছে। গতিকে আমিও সহায় কৰা উচিত।”
সেই সময়ত ফাথালীয়ে কিয় এনে মন্তব্য কৰিছিল সেয়া স্পষ্ট হোৱা নাছিল যদিও শুকুৰবাৰে নিশা স্পষ্ট হৈ পৰে।
ইজৰাইল আৰু আমেৰিকাই ২৮ ফেব্ৰুৱাৰীত ইৰাণক আক্ৰমণ কৰিছিল। তেহৰানেও প্ৰতিশোধ আৰম্ভ কৰিছিল।
ইয়াৰ পিছত তেওঁলোকে হৰমুজ প্ৰণালীৰ মাজেৰে এখনো বাণিজ্যিক জাহাজ পাৰ হ’বলৈ দিয়া নাই। ইৰাণৰ নতুন সৰ্বোচ্চ নেতা মোজাহিদিন খামেইনীয়ে কয় যে যুদ্ধৰ পৰিস্থিতিত ইৰাণৰ সেনাই হৰমুজ প্ৰণালী অৱৰোধ কৰিব। তেওঁ কয়, “শত্ৰুৰ ওপৰত হেঁচা প্ৰয়োগ কৰাৰ কৌশল হিচাপে হৰমুজ প্ৰণালী বন্ধ কৰা হ’ব।”
এনে পৰিস্থিতিত ভাৰতলৈ এল পি জি গেছৰ যোগানো বন্ধ হৈ পৰে। মঙলবাৰে কেন্দ্ৰীয় তেল আৰু প্ৰাকৃতিক গেছ মন্ত্ৰালয়ে কয় যে আমেৰিকা আৰু ইজৰাইলৰ বিৰুদ্ধে যুদ্ধৰ পৰিস্থিতিত ইৰাণে হৰমুজ প্ৰণালী বন্ধ কৰাৰ বাবে ভাৰতলৈ ৩০ শতাংশ গেছ যোগান ব্যাহত হৈছে।
ভাৰতে দৈনিক গেছ ব্যৱহাৰৰ প্ৰায় আধা সংখ্যক ১৯১ কোটি মানক ঘনমিটাৰ (SCM) আমদানিৰ জৰিয়তে পূৰণ কৰে। হৰমুজ প্ৰণালীৰ মাজেৰে টেংকাৰৰ যাতায়াত বন্ধ হোৱাৰ বাবে পশ্চিম এছিয়াৰ পৰা প্ৰায় ৬ কোটি এছ চি এম (এছচিএম) গেছৰ যোগান ব্যাহত হৈছে। এনে পৰিস্থিতিত কেন্দ্ৰীয় চৰকাৰে গাইডলাইন জাৰি কৰিছে।
এনে পৰিস্থিতিত বৃহস্পতিবাৰে নিশা ইৰাণৰ ৰাষ্ট্ৰপতি মাছুদ পিজেছকিয়ানৰ সৈতে মোদীয়ে কথা পাতে। যুদ্ধ আৰম্ভ হোৱাৰ পিছত এইটো প্ৰথমবাৰৰ বাবে হয়। জানিব পৰা মতে, ক্ৰমবৰ্ধমান উত্তেজনা, অসামৰিক লোকৰ জীৱন হেৰুওৱা আৰু অসামৰিক আন্তঃগাঁথনিৰ ক্ষতিক লৈ তেওঁ গভীৰ উদ্বেগ প্ৰকাশ কৰে।
এই অশান্ত পৰিস্থিতিত নতুন দিল্লীয়ে সম্প্ৰতি দেশখনত বসবাস কৰা ভাৰতীয় নাগৰিকসকলৰ সুৰক্ষা নিশ্চিত কৰাৰ লগতে সামগ্ৰী আৰু শক্তি পৰিবহণৰ বাবে নিৰৱচ্ছিন্ন পথ বজাই ৰখাত সৰ্বোচ্চ অগ্ৰাধিকাৰ দিছে।
ইয়াৰ পিছত শুকুৰবাৰে হৰমুজৰ পৰা ভাৰতলৈ আহি আছে এল পি জিভৰ্তি জাহাজ।
ইয়াৰ ফলত দেশত এল পি জিক লৈ উদ্বেগ হ্ৰাস পাব বুলি ধাৰণা কৰা হৈছে। যদিও কেন্দ্রীয় চৰকাৰে বাৰে বাৰে দেশত কোনো সংকট নাই বুলি উল্লেখ কৰি আহিছে, তথাপিও জৰুৰীকালীন সেৱাৰ বাহিৰেও বিভিন্ন খণ্ডত ক্ষতিগ্রস্ত হৈছে৷ হোটেল আৰু ৰেষ্টুৰেণ্টৰ ব্যৱসায়তো ক্ষতিগ্ৰস্ত হৈছে।
