ঢেকীয়াজুলিত সংঘটিত এক মৰ্মান্তিক পথ দুৰ্ঘটনাত (Road Accident) প্ৰাণ গ’ল ৭ জনকৈ ৰোগীৰ। দেওবাৰে নিশা ১৫ নং ৰাষ্ট্ৰীয় ঘাইপথত সংঘটিত হয় এই ঘটনা। ট্ৰাক আৰু অম্বুলেন্সৰ মাজত সংঘটিত মুখামুখি সংঘৰ্ষত ৬ জন লোকৰ থিতাতে মৃত্যু হোৱাৰ বিপৰীতে চিকিৎসাধীন অৱস্থাত এজন লোকৰ মৃত্যু হয়৷
জানিব পৰা মতে, তেজপুৰৰ পৰা গুৱাহাটী অভিমুখী ট্ৰাকখনৰ সৈতে বিপৰীত দিশৰ পৰা ঢেকীয়াজুলি চিকিৎসালয়লৈ ৰোগী কঢ়িয়াই অনা অম্বুলেন্সখনৰ মাজত সংঘৰ্ষৰ ফলত এই দুৰ্ঘটনাটো সংঘটিত হয়।
উল্লেখযোগ্য যে ৬ জন লোকৰ ঘটনাস্থলীতে মৃত্যু হোৱাৰ বিপৰীতে আন দুজনক সংকটজনক অৱস্থাত তেজপুৰ চিকিৎসা মহাবিদ্যালয় হাস্পতালত ভর্তি কৰোৱা হয়৷ তাতেই আন এজন ৰোগীৰ মৃত্যু হোৱাৰ বিপৰীতে আনজন ৰোগীক সংকটজনক অৱস্থাত গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হয়।
দুর্ঘটনা সন্দৰ্ভত শোণিতপুৰ জিলা আৰক্ষী অধীক্ষক বৰুণ পুৰকায়স্থই জনোৱা মতে দুর্ঘনাটো ইমানেই ভয়ংকৰ আছিল যে সংঘৰ্ষৰ ফলত অম্বুলেন্সখন সম্পূৰ্ণ চেপেটা হৈ যায়। ফলত ঘটনাস্থলীতেই ৬ জন ৰোগীৰ মৃত্যু হয়।
স্থানীয় লোক আৰু আৰক্ষী তথা জৰুৰীকালীন সঁহাৰি দলৰ সহযোগত মৃতদেহকেইটা আৰু আঘাতপ্ৰাপ্ত লোক দুজনক উদ্ধাৰ কৰি ঢেকীয়াজুলি অসামৰিক চিকিৎসালয়লৈ প্ৰেৰণ কৰা হয়। এই দুৰ্ঘটনাটোৱে সমগ্ৰ অঞ্চলটোতে শোকৰ ছাঁ পেলোৱাৰ লগতে আৰক্ষীয়ে পথছোৱা মুকলি কৰি যান-বাহন চলাচল স্বাভাৱিক কৰে। দুর্ঘটনাৰ কাৰণ সন্দৰ্ভত আৰক্ষীয়ে তদন্ত আৰম্ভ কৰিছে।
