ভাৰতীয় সশস্ত্ৰ বাহিনীয়ে ব্ৰহ্মছৰ (Brahmos) পৰিসৰ দুগুণ পাবলৈ ওলাইছে। ইয়াৰ লগতে ভাৰত আৰু ৰাছিয়াই যৌথভাৱে নিৰ্মাণ কৰা এই ‘ছুপাৰছনিক’ (শব্দৰ গতিতকৈ বেছি দ্ৰুত) ক্ৰুজ মিছাইলটো হাইপাৰছনিকলৈ (শব্দৰ গতিতকৈ পাঁচগুণ বেছি দ্ৰুত) উন্নীত কৰা হ’ব।
শেহতীয়াকৈ কিছুমান বাতৰিত দাবী কৰা হৈছে যে প্ৰতিৰক্ষা মন্ত্ৰালয়ে ব্ৰহ্মছৰ দক্ষতা বৃদ্ধিৰ বাবে মস্কোৰ সৈতে নতুন চুক্তি স্বাক্ষৰ কৰাৰ নীতিগত সিদ্ধান্ত গ্ৰহণ কৰিছে। ‘দ্য ইকন’মিক টাইমছ’ৰ বাতৰি অনুসৰি, এই সন্দৰ্ভত অতি সোনকালে আনুষ্ঠানিক চুক্তি হ’ব পাৰে।
প্ৰতিৰক্ষা মন্ত্ৰালয়ৰ এগৰাকী বিষয়াই কয় যে শেহতীয়াকৈ পশ্চিম এছিয়াত সংঘটিত হোৱা সংঘাতৰ পৰিপ্ৰেক্ষিতত মধ্যম দূৰত্বৰ ক্ষেপণাস্ত্ৰৰ ফলপ্ৰসূতা পুনৰ প্ৰমাণিত হৈছে। এনে পৰিস্থিতিত সশস্ত্ৰ বাহিনীৰ তিনিওটা শাখা (স্থল, নৌসেনা আৰু বায়ুসেনা)ৰ বাবে বৰ্ধিত দূৰত্ব আৰু গতিবেগ ব্ৰহ্মছ ক্ষেপণাস্ত্ৰ প্ৰদানৰ বিষয়টোক অগ্ৰাধিকাৰ দিয়া হৈছে।
ইতিমধ্যে ৰাছিয়াৰ সেনাই নতুন হাইপাৰছনিক ‘ব্ৰহ্মছ মাৰ্ক-২’ ব্যৱহাৰ কৰিবলৈ আৰম্ভ কৰিছে। নতুন দিল্লীয়েও মস্কোৰ সৈতে যৌথ উদ্যোগত ইয়াক বিকশিত কৰিব বিচাৰিছে। ব্ৰহ্মছৰ নতুন সংস্কৰণটো হয়তো প্ৰথম অৱস্থাত ভাৰতীয় সেনাবাহিনীক গতাই দিয়া হ’ব।
নতুন পৰিকল্পনা কাৰ্যকৰী হ’লে ব্ৰহ্মছে কেৱল লাহোৰ, ইছলামাবাদ বা ৰাৱালপিণ্ডিত নহয়, এইবাৰ চীনৰ অধিকাংশ গুৰুত্বপূৰ্ণ সামৰিক আন্তঃগাঁথনিত আক্ৰমণ কৰিবলৈ সক্ষম হ’ব। যোৱা বছৰ অপাৰেচন সিন্দুৰত ব্ৰহ্মছৰ সফলতাৰ পিছত স্থল, নৌসেনা আৰু বায়ুসেনাৰ সংশ্লিষ্ট বিষয়াসকলে ক্ষেপণাস্ত্ৰক আৰু অধিক শক্তিশালী কৰাৰ বাবে পাঁচ দফীয়া কাৰ্যসূচীৰ প্ৰস্তাৱ আগবঢ়ায়। স্থল বা যুদ্ধ জাহাজৰ পৰা উৎক্ষেপণ কৰিব পৰা ব্ৰহ্মছৰ ৰেঞ্জ প্ৰায় ৪৫০ কিলোমিটাৰ।
বিমান বা ছাবমেৰিনত ব্যৱহাৰ কৰা সংস্কৰণতকৈ ই অলপ কম। নতুন পাঁচ দফীয়া পৰিকল্পনাত ব্ৰহ্মছৰ ৰেঞ্জ আৰু গতি দুয়োটাই বৃদ্ধি কৰা হৈছে। স্থল বা যুদ্ধ জাহাজৰ পৰা উৎক্ষেপণ কৰিব পৰা ব্ৰহ্মছৰ নতুন সংস্কৰণৰ পৰিসৰ ৮০০ কিলোমিটাৰ হ’ব।
