অসমত নিৰ্বাচনী (Assam Election) প্ৰচাৰ চলাবলৈ আহিছে (Coming to run a campaign) আছাদুদ্দিন ওৱেইছি (Asaduddin Owaisi)। এ আই ইউ ডি এফৰ (AIUDF) হৈ নিৰ্বাচনী প্ৰচাৰ চলাবলৈ অহা ৱেইছিৰ এইবাৰ আক্ৰমণৰ লক্ষ্য কংগ্ৰেছ। সৰ্বভাৰতীয় মজলিছ-এ-ইত্তেহাদুল মুছলিমীনৰ মুৰব্বীয়ে কংগ্ৰেছক বিজেপিৰ এ-টীম বুলি অভিহিত কৰে ওৱেইছিয়ে। ওৱেইছিৰ মতে, অসমত নিৰ্বাচনৰ পূৰ্বে বহু কংগ্ৰেছ নেতাই বিজেপিত যোগদান কৰাৰ ফলত ভোটাৰৰ মাজত আত্মবিশ্বাসৰ সংকটৰ সৃষ্টি হৈছে।
এনডিটিভিৰ সৈতে হোৱা এক সাক্ষাৎকাৰত ওৱেইছিয়ে কয়, “কংগ্ৰেছ দশক দশক ধৰি ক্ষমতাত আছিল, কিন্তু ই বিজেপিক ৰুধিব নোৱাৰিলে। ইয়াৰ বহু নেতাই বিজেপিত যোগদান কৰিছে, গতিকে ৰাইজে তেওঁলোকক আৰু বিশ্বাস নকৰে। বিজেপিৰ বিৰুদ্ধে যুঁজখন কেৱল প্ৰতীকী হ’ব নোৱাৰে। এই যুঁজখন তৃণমূল পৰ্যায়ত নামি হ’ব লাগিব। আৰু ইয়াৰ বাবে এটা স্বতন্ত্ৰ কণ্ঠক শক্তিশালী কৰাটো অতি গুৰুত্বপূৰ্ণ। তেওঁলোকে (কংগ্ৰেছ) আমাক কয় বিজেপিৰ ‘বি-টীম’, কিন্তু অসমৰ পৰিস্থিতিয়ে প্ৰমাণ কৰে যে প্ৰকৃততে কংগ্ৰেছ হৈছে বিজেপিৰ ‘এ-টীম’।”
‘পৰিচয়’ আৰু ‘প্ৰতিনিধিত্ব’কেন্দ্ৰিক ৰাজনীতি পুনৰ চৰ্চাৰ কেন্দ্ৰবিন্দু হৈছে অসমৰ নিৰ্বাচনী যুঁজত। বদৰুদ্দিন আজমলৰ দল এ আই ইউ ডি এফৰ সমৰ্থনত প্ৰচাৰ চলাই থকাৰ সময়তে ওৱেছিয়ে সংখ্যালঘু ভোটাৰৰ সমৰ্থন সুদৃঢ় কৰাৰ চেষ্টা চলাইছে। লগতে বিজেপিৰ শাসন ব্যৱস্থা আৰু কংগ্ৰেছৰ বিশ্বাসযোগ্যতা দুয়োটাকে তীব্ৰ সমালোচনা কৰিছে।
এ আই এম আই এমৰ মুৰব্বীগৰাকীয়ে কয়, “আমি ইয়ালৈ মৌলানা বদৰুদ্দিন আজমল আৰু তেওঁৰ দলৰ প্ৰাৰ্থীক সমৰ্থন কৰিবলৈ আহিছোঁ। ৰাজ্যৰ বিভিন্ন প্ৰান্তত ৰাজহুৱা সভাত ভাষণ দিছোঁ। এ আই ইউ ডি এফে অসমৰ মুছলমান সম্প্ৰদায়ৰ স্বতঃস্ফূৰ্ত আৰু স্বতন্ত্ৰ নেতৃত্বক প্ৰতিনিধিত্ব কৰে। আৰু সেয়ে ৰাইজে এই দলটোক শক্তিশালী কৰাটো বিচাৰে। বৰ্তমান সময়ত মুছলমানসকলক প্ৰান্তীয়কৰণ কৰা হৈছে, তেওঁলোকৰ নাগৰিকত্বক লৈ প্ৰশ্ন উত্থাপন হৈছে আৰু তেওঁলোকৰ মৰ্যাদা আৰু সন্মানৰ ওপৰত প্ৰশ্ন উত্থাপন হৈছে। এনে পৰিস্থিতিত স্বাধীন কণ্ঠৰ উপস্থিতি অতি গুৰুত্বপূৰ্ণ।”
অসমৰ মুখ্যমন্ত্ৰী হিমন্ত বিশ্ব শৰ্মাক সমালোচনা কৰি ওৱেইছিয়ে প্ৰশ্ন উত্থাপন কৰে যে কিয় উপযুক্ত পুনৰ্বাসনৰ ব্যৱস্থা অবিহনে মানুহক মাটিৰ পৰা উচ্ছেদ কৰা হৈছে। তেওঁ কয় যে যদি আমি প্ৰকৃত পৰিস্থিতিলৈ চাওঁ তেন্তে স্পষ্ট হৈ পৰে যে এই উচ্ছেদৰ বলি হোৱা অধিকাংশই দৰিদ্ৰ আৰু প্ৰান্তীয় মুছলমান সম্প্ৰদায়ৰ।
উল্লেখ্য যে চলিত বৰ্ষৰ অসম বিধানসভা নিৰ্বাচনত মুঠ ২৯ খন আসনত প্ৰতিদ্বন্দ্বিতা আগবঢ়াইছে এ আই এম আই এমৰ প্ৰাৰ্থীয়ে। প্ৰতিখন আসনত মুছলমান ভোটাৰ, বিশেষকৈ বাংলাভাষী মুছলমান সংখ্যাগৰিষ্ঠ। তথাপিও ওৱেইছিয়ে সেই আসনসমূহৰ বাহিৰলৈও এই নিৰ্বাচনী যুদ্ধৰ পৰিসৰ বৃদ্ধি কৰাৰ চেষ্টা কৰিছে।
ওৱেইছিয়ে কয়, “এতিয়া যিধৰণৰ ৰাজনীতি চলি আছে সেয়া বৈষম্যমূলক আৰু বহুলাংশে অসাংবিধানিক। এজন মুখ্যমন্ত্ৰীৰ কৰ্তব্য হ’ল সংবিধান অনুসৰি শাসন কৰা। অসমৰ মুছলমানসকলৰ বৰ্তমানৰ পৰিস্থিতিৰ বাবেই মই ইয়ালৈ আহিছোঁ। মই এই বিষয়সমূহ উত্থাপন কৰিম আৰু আশা কৰিম যে মানুহে ন্যায়ৰ বাবে ভোট দিব। আমি সংবিধানৰ পৰিকাঠামোৰ ভিতৰতে ইয়াৰ বিৰোধিতা কৰিম আৰু এই নীতিসমূহৰ ওপৰত কথা ক’ম আৰু প্ৰশ্ন উত্থাপন কৰিম।”
ইফালে মুখ্যমন্ত্ৰী হিমন্ত বিশ্ব শৰ্মাই ওৱেইছিক কোনো ধৰণৰ সাম্প্ৰদায়িক উচটনিমূলক মন্তব্য নকৰিবলৈ সকীয়াই দিছে। মুখ্যমন্ত্ৰীয়ে কয়, “আল্লাহু আকবৰ’ ধ্বনি দিয়াত মোৰ কোনো আপত্তি নাই। কিন্তু অসমৰ নিৰ্বাচনী সভাত যদি আছাদুদ্দিন ওৱেইছিয়ে কিবা সাম্প্ৰদায়িক মন্তব্য দিব বিচাৰে, তেন্তে তেওঁক কেনেধৰণৰ ‘আতিথ্য’ দিয়াৰ প্ৰয়োজন আছে মই ভালদৰেই জানো। তেওঁ ‘শ্ৰেষ্ঠ আতিথ্য’ পাব আৰু ৰাজনৈতিক মানচিত্ৰৰ পৰা মচি পেলোৱা হ’ব।”
