একত্ৰবাস বা শয্যা সংগীৰ সৈতে সম্পৰ্ক ভংগ কৰাৰ অৰ্থ এইটো নহয় যে ই অপৰাধ। শেহতীয়াকৈ এটা গোচৰৰ পৰ্যবেক্ষণত এই কথা উল্লেখ কৰিছে উচ্চতম ন্যায়ালয়ে। উচ্চতম ন্যায়ালয়ৰ ন্যায়াধীশ এন ভি নাগাৰত্নই এই কথাও উল্লেখ কৰে যে এই সম্পৰ্কত থকাৰ সময়তে দুয়োৱে এটা সন্তান জন্ম দিছিল।
লিভ-ইনৰ সম্পৰ্ক ভাঙিলে অপৰাধ নহয়, উচ্চতম ন্যায়ালয়ৰ পৰ্যবেক্ষণ:
উক্ত গোচৰত তেওঁ যুৱকজনৰ বিৰুদ্ধে এতিয়া কেনেকৈ ধৰ্ষণ আৰু যৌন নিৰ্যাতনৰ অভিযোগ উত্থাপন হৈছে বুলিও প্ৰশ্ন উত্থাপন কৰে। ন্যায়াধীশ নাগাৰত্নই কয়, “এয়া একত্ৰবাসৰ সম্পৰ্ক। বিবাহৰ পূৰ্বে দম্পতীহালে সন্তান জন্ম দিছিল। এতিয়া ধৰ্ষণ আৰু যৌন নিৰ্যাতনৰ অভিযোগ উত্থাপন হৈছে। এইটো কেনেকুৱা কথা?”
পাৰস্পৰিক সন্মতিৰে গঢ় লৈ উঠা সম্পৰ্কৰ পৰা কেনেকৈ যৌন নিৰ্যাতনৰ অভিযোগ উত্থাপন হ’ব পাৰে সেই বিষয়েও ন্যায়াধীশগৰাকীয়ে প্ৰশ্ন উত্থাপন কৰে। সম্পৰ্ক বিচ্ছিন্ন হোৱাৰ পিছত যুৱতীগৰাকীয়ে যুৱকজনৰ বিৰুদ্ধে ধৰ্ষণৰ এজাহাৰ দাখিল কৰে। বিবাহৰ মিছা প্ৰতিশ্ৰুতিৰে অভিযুক্তই তেওঁৰ সৈতে যৌন সম্পৰ্ক স্থাপন কৰাৰ অভিযোগ উত্থাপন কৰে তেওঁ।
সোমবাৰে যেতিয়া এই গোচৰটো উচ্চতম ন্যায়ালয়ত শুনানিৰ বাবে আহিছিল, তেতিয়া ন্যায়াধীশগৰাকীয়ে একত্ৰবাসৰ ‘বিপদ’ৰ কথা উল্লেখ কৰে। তেওঁৰ মতে, যেতিয়া প্ৰাপ্তবয়স্কসকলে বিয়া নোহোৱাকৈ একেলগে থাকিবলৈ সিদ্ধান্ত লয়, তেতিয়া এনে সম্পৰ্কই প্ৰায়ে কিছু বিপদ কঢ়িয়াই আনে। তেওঁ কয়, “য’ত পাৰস্পৰিক সন্মতিৰে সম্পৰ্ক গঢ় লৈ উঠে, তাত অপৰাধৰ প্ৰশ্নটো কেনেকৈ উত্থাপন হ’ব পাৰে?”
ন্যায়াধীশগৰাকীৰ পৰ্যবেক্ষণ, “একত্ৰবাসৰ সম্পৰ্কত এনেকুৱাই হয়। বছৰ বছৰ ধৰি একেলগে থাকে। তাৰ পিছত বিচ্ছেদ হ’লে মহিলাগৰাকীয়ে পুৰুষ সংগীৰ বিৰুদ্ধে যৌন নিৰ্যাতনৰ অভিযোগ দাখিল কৰে। এই সকলোবোৰেই হৈছে বিয়া নোহোৱাকৈয়ে এনে সম্পৰ্কত থকাৰ কিছুমান সমস্যা।”
ইফালে অভিযুক্তৰ অধিবক্তাই কয় যে যেতিয়া তেওঁৰ ক্লায়েণ্টে অভিযুক্তক লগ পাইছিল তেতিয়া তেওঁৰ বয়স আছিল ১৮ বছৰ। অভিযুক্তই তেওঁক বিয়া কৰাব বুলি প্ৰতিশ্ৰুতি দিছিল।
অৱশ্যে অধিবক্তাগৰাকীয়ে দাবী কৰে যে সেই সময়ত অভিযুক্তজন বিবাহিত আছিল আৰু তেওঁৰ ক্লায়েণ্টে এই বিষয়ে একো নাজানিছিল। সেই গোচৰত ন্যায়াধীশ নগৰত্নই প্ৰশ্ন কৰে, “যুৱতীগৰাকীয়ে বিয়া নোহোৱাকৈয়ে সেই মানুহজনৰ লগত থাকিবলৈ আৰু সন্তান জন্ম দিবলৈ কিয় সন্মত হ’ল?”
যদিও আদালতে যুৱতীগৰাকীৰ প্ৰতি সহানুভূতি প্ৰকাশ কৰে, তথাপিও এনে ঘটনাক ফৌজদাৰী অপৰাধ বুলি গণ্য কৰিব নোৱাৰি বুলি কয়। অৱশ্যে ন্যায়াধীশ নাগাৰত্নই কয় যে অভিযোগকাৰীয়ে ইচ্ছা কৰিলে শিশুটিৰ ভৰণ-পোষণ লাভ কৰিব পাৰে।
