দেশৰ ন্যায়পালিকাৰ ইতিহাসত এক অভূতপূৰ্ব আৰু লজ্জাজনক ঘটনাৰ সাক্ষী হ’ল দিল্লী উচ্চ ন্যায়ালয় (Delhi High Court)। মুখ্য ন্যায়াধীশৰ নিজৰ আদালতৰ কক্ষত ভাৰ্চুৱেল শুনানিৰ সময়ত হঠাতে পৰ্দাত এটা অত্যন্ত আপত্তিজনক আৰু অশ্লীল ভিডিঅ’ (Pronography video) দেখা যায়। এবাৰ নহয়, বাৰে বাৰে এই ঘটনাৰ বাবে বিচাৰ প্ৰক্ৰিয়া বন্ধ কৰি দিয়া হয়। এটা ৰহস্যময় মাত শুনা যায় যে এয়া কেৱল যান্ত্ৰিক ত্ৰুটি নহয়, বৰঞ্চ আদালতৰ ব্যৱস্থাটো ‘হেক’ (Hek) কৰা হৈছে। যাৰ ফলত আদালত চৌহদত তীব্ৰ আতংকৰ সৃষ্টি হয়।
সচৰাচৰৰ দৰেই ভিডিঅ’ কনফাৰেন্সিঙৰ জৰিয়তে দিল্লী উচ্চ ন্যায়ালয়ৰ বিচাৰপীঠত শুনানি চলি আছিল। হঠাৎ দেখা গ’ল এজন অচিনাকি ব্যক্তিয়ে তেওঁৰ পৰ্দাখন শ্বেয়াৰ কৰি পৰ্ণগ্ৰাফী বা অশ্লীল উপাদান চলাবলৈ আৰম্ভ কৰে। আদালতৰ কক্ষত উপস্থিত থকা অধিবক্তা আৰু ন্যায়াধীশসকল এই অভাৱনীয় ঘটনাত স্তম্ভিত হৈ পৰে। পৰিস্থিতিৰ সৈতে মোকাবিলা কৰিবলৈ ভাৰ্চুৱেল ছিষ্টেমটো তৎক্ষণাত বন্ধ কৰি দিয়া হয়। কিছুসময়ৰ পাছত পৰিস্থিতি স্বাভাৱিক বুলি ভাবি পুনৰ শুনানি আৰম্ভ হয় যদিও দ্বিতীয়বাৰৰ বাবেও একে ঘটনা সংঘটিত হয়। এইবাৰো পৰ্দাত এটা আপত্তিজনক ছবি দেখা যায়। ইয়াৰ ফলত এক অত্যন্ত অস্বস্তিকৰ পৰিস্থিতিৰ সৃষ্টি হয় আৰু আদালত কৰ্তৃপক্ষই দ্বিতীয়বাৰৰ বাবে ব্যৱস্থাটো সম্পূৰ্ণৰূপে বন্ধ কৰিবলৈ বাধ্য হয়। ইয়াৰ পিছত পুনৰ শুনানি আৰম্ভ কৰা সম্ভৱ নহ’ল।
ঘটনাটো কেৱল এটা অশ্লীল ভিডিঅ’ দেখুওৱাতেই সীমাবদ্ধ নাছিল যদিও ইয়াৰ আঁৰত গভীৰ ষড়যন্ত্ৰৰ ইংগিত পোৱা গৈছে। শুনানিৰ সময়ত উপস্থিত থকাসকলৰ দাবী অনুসৰি, ভিডিঅ’টো চলি থকাৰ সময়তে পৰ্দাত এটা বাৰ্তা আহিছিল, য’ত লিখা আছিল – “আপোনাক হেক কৰা হৈছে”। কেৱল সেয়াই নহয়, বাৰে বাৰে একেটা ঘোষণা কৰা যান্ত্ৰিক বা ‘স্বয়ংক্ৰিয়’ কণ্ঠও শুনা গৈছিল। প্ৰাৰম্ভিক তদন্ত আৰু প্ৰতিবেদন অনুসৰি, এই ভিডিঅ’সমূহ ‘শ্ৰীধৰ সৰ্ণোবাট’ আৰু ‘শ্বীতজিৎ সিং’ নামৰ দুটা একাউণ্টৰ পৰা প্লে কৰা হৈছিল। কোনো বাহিৰৰ বা অকৰ্তৃত্বশীল ব্যক্তিয়ে আদালতৰ নিৰাপদ ভাৰ্চুৱেল লিংকত প্ৰৱেশ কৰি পৰ্দা শ্বেয়াৰ কৰাৰ অনুমতি কেনেকৈ পালে সেই লৈ ডাঙৰ প্ৰশ্ন উত্থাপন হ’বলৈ আৰম্ভ কৰিছে।
ইফালে এই ঘটনাই ভাৰ্চুৱেল শুনানিৰ বাবে নিৰাপত্তা ব্যৱস্থা কিমান শক্তিশালী তাক লৈ গুৰুতৰ সন্দেহৰ সৃষ্টি কৰিছে। দ্বিতীয়বাৰৰ বাবে বিঘিনি ঘটাৰ পিছত অনিৰ্দিষ্টকাললৈ বন্ধ কৰি দিয়া হৈছে ভিডিঅ’ কনফাৰেন্সিং ব্যৱস্থা। এই ঘটনাৰ আঁৰত কোন আছিল আৰু কেনেদৰে নিৰাপত্তা ভংগ হ’ল সেই বিষয়ে জানিবলৈ উচ্চ পৰ্যায়ৰ তদন্ত আৰম্ভ কৰা হৈছে বুলি আদালতে জানিবলৈ দিয়ে। ভৱিষ্যতে এনেধৰণৰ অশুভ ঘটনা ৰোধ কৰিবলৈ প্ৰৱেশ নিয়ন্ত্ৰণ কটকটীয়া কৰাৰ পৰিকল্পনা কৰিছে কৰ্তৃপক্ষই। প্ৰতিবেদন অনুসৰি, দিল্লী উচ্চ ন্যায়ালয়ৰ নিৰ্দিষ্ট ভাৰ্চুৱেল পৰ্টেল বন্ধ হৈ আছে আৰু চাইবাৰ বিশেষজ্ঞসকলে বিষয়টোৰ তদন্ত কৰি আছে। এই ঘটনাক ন্যায়পালিকাৰ মৰ্যাদা আৰু চাইবাৰ নিৰাপত্তাৰ ওপৰত এক বৃহৎ আঘাত হিচাপে লক্ষ্য কৰা হৈছে।
