অসমকে ধৰি পাঁচখন ৰাজ্যৰ (Assam Election 2026) বিধানসভা নিৰ্বাচনৰ ভোট গণনা চলি আছে। অসমৰ বাহিৰে আন চাৰিখন ৰাজ্য হৈছে পশ্চিমবঙ্গ, কেৰালা, তামিলনাডু আৰু পুডুচেৰী।
ভোট গণনাৰ প্ৰাৰম্ভিক প্ৰৱণতা ইতিমধ্যে আগবঢ়োৱা এগজিট প’ল অনুসৰিয়ে আগবঢ়া পৰিলক্ষিত হৈছে। কিন্তু পশ্চিমবঙ্গত পট পৰিৱৰ্তন হোৱাৰ ইংগিত দেখা গৈছে।
পুৱা ১০.৩০ বজালৈকে পোৱা তথ্য অনুসৰি, অসমত বিজেপি নেতৃত্বাধীন এন ডি এ আগবাঢ়ি আছে। এন ডি এয়ে ৯৮খন আসনত, কংগ্ৰেছে ২৫ খনত আৰু এ আই ইউ ডি এফে ৩খন আসনত অগ্ৰগতি লাভ কৰিছে।
গুৰুত্বপূৰ্ণ সমষ্টিৰ ভিতৰত জালুকবাৰীকে ধৰি গুৱাহাটীৰ পাঁচটা সমষ্টিতে বিজেপিৰ প্ৰাৰ্থী আগবাঢ়ি আছে। আনহাতে, শিৱসাগৰ, যোৰহাট, খোৱাং সমষ্টিত ক্ৰমে অখিল গগৈ, গৌৰৱ গগৈ আৰু লুৰীণজ্যোতি গগৈ প্ৰাৰম্ভিক প্ৰৱণতাত পিছ পৰি আছে।
একেদৰে এইবাৰ বিশেষভাৱে চৰ্চিত মধ্য গুৱাহাটীৰ প্ৰাৰ্থী অসম জাতীয় পৰিষদৰ কুনকি চৌধুৰী, মৰিয়নিত ৰাইজৰ দলৰ জ্ঞানশ্ৰী বৰা আৰু দিছপুৰ সমষ্টিত কংগ্ৰেছৰ মীৰা বৰঠাকুৰ পিছ পৰি আছে।
আনহাতে, পশ্চিমবঙ্গত এইবাৰ প্ৰথমবাৰৰ বাবে বিজেপিয়ে দৃঢ় স্থিতি লাভ কৰিবলৈ সক্ষম হৈছে। এতিয়ালৈকে লাভ কৰা অগ্ৰগতিৰ তথ্য অনুসৰি, বিজেপিয়ে ১৫৮ খন আসনত অগ্ৰগতি লাভ কৰাৰ বিপৰীতে তৃণমূল কংগ্ৰেছে ১২৬ খনত অগ্ৰগতি লাভ কৰিছে।
আনহাতে, কংগ্ৰেছে ৩ খন আসনত আগবাঢ়ি আছে। যদি এই প্ৰৱণতা শেষলৈকে থাকে তেন্তে মমতাৰ চাৰিটা কাৰ্যকাল ৰূপায়ণৰ সপোন ভাঙিব আৰু প্ৰথমবাৰৰ বাবে বংগ ভূমি গেৰুৱা হৈ পৰিব।
ইফালে তামিলনাডুতো এক চমৎকাৰ সৃষ্টি হৈছে। অভিনেতাৰ পৰা ৰাজনীতিলৈ আহি নতুন দল গঠন কৰিয়ে তীব্ৰ উত্থান ঘটিছে বিজয়ৰ দল টি ভি কেৰ। টি ভি কেয়ে এতিয়ালৈকে ৯৫ খন আসনত অগ্ৰগতি লাভ কৰাৰ বিপৰীতে বৰ্তমানৰ মুখ্যমন্ত্ৰী ষ্টেলিনৰ দল ডি এম কেয়ে ৬২ আৰু এ আই এ ডি এম কেয়ে ৭৪খন আসনত অগ্ৰগতি লাভ কৰিছে।
আনহাতে, কেৰালাত ইউ ডি এফ ৯৪, এল ডি এফ ৪৪ আৰু এন ডি এ দুখন আসনত আগবাঢ়ি আছে। পুডুচেৰীত এ এন আৰ চি ১৮, কংগ্ৰেছ ৯ আৰু অন্যান্য ৩খন আসনত আগবাঢ়ি আছে।
