জালুকবাৰী সমষ্টিক (Jalukbari constituency) ষষ্ঠবাৰৰ বাবে প্ৰতিনিধিত্ব কৰিব ডঃ হিমন্ত বিশ্ব শৰ্মা (Himanta Biswa Sharma)ই। এইবাৰৰ নিৰ্বাচনত জালুকবাৰী সমষ্টিৰ পৰা ৮৭,৭০১ টা ভোটৰ ব্যৱধানত জয়লাভ কৰে হিমন্ত বিশ্ব শৰ্মাই। তেওঁৰ নিকটতম প্ৰতিদ্বন্দ্বী আছিল কংগ্ৰেছৰ বিদিশা নেওগ। বিদিশা নেওগে ৩৭,২৯৫ টা ভোট লাভ কৰে। আনহাতে, নিৰ্দলীয় প্ৰাৰ্থী দীপিকা দাসে ২,৫১২টা ভোট লাভ কৰে। ইয়াৰ বিপৰীতে ৩,৩৮৮টা ভোট পৰে নোটাত।
আনহাতে, নিশাটোৰ ভিতৰতে বিজেপিত যোগদান কৰি দিছপুৰ সমষ্টিৰ পৰা নিৰ্বাচন খেলা কংগ্ৰেছৰ সাংসদ তথা প্ৰাক্তন মন্ত্রী প্ৰদ্যুৎ বৰদলৈয়ে (Pradyut Bordoloi) জয়লাভ কৰে। তেওঁ ১,০৩,৩৩৬টা ভোট লাভ কৰি নিকটতম প্ৰতিদ্বন্দ্বী কংগ্ৰেছ প্ৰাৰ্থী মীৰা বৰঠাকুৰ গোস্বামীক ৪৯,৬৬৬ টা ভোটত পৰাস্ত কৰে। মীৰা বৰঠাকুৰ গোস্বামীয়ে লাভ কৰে ৫৩,৬৭০ টা ভোট। আনহাতে, বিজেপিৰ পৰা টিকট নাপাই নিৰ্দলীয় হিচাপে অৱতীৰ্ণ হোৱা জয়ন্ত কুমাৰ দাসে লাভ কৰে ২২,৮০২টা ভোট। ইয়াৰ উপৰি আপৰ বল্লভ পাত্রই ১,৩২৩টা আৰু নিৰ্দলীয় প্ৰাৰ্থী আয়ুষ কুমাৰ সিঙে ৮১৭টা ভোট লাভ কৰে। আনহাতে, নোটাত ভোট পৰে ২,৯৪১টা।
