অসম গণ পৰিষদৰ (Assam Gana Parishad) বিধায়িনী দলৰ নেতা (Leader of the legislative party) হিচাপে নিৰ্বাচিত (Elected) হৈছে দলটোৰ সভাপতি তথা বোকাখাতৰ বিধায়ক অতুল বৰা (Atul Bora, MLA)। বুধবাৰে গুৱাহাটীৰ আমবাৰীস্থিত মুখ্য কাৰ্যালয়ত অনুষ্ঠিত অগপৰ বিধায়িনী দলৰ বৈঠকত তেওঁক সৰ্বসন্মতিক্ৰমে বিধায়িনী দলৰ নেতা নিৰ্বাচন কৰা হয়৷ উল্লেখ্য যে এইবাৰো এনডিএ চৰকাৰৰ অংশীদাৰ হ’বলৈ আগবঢ়িছে অসম গণ পৰিষদ দল৷
আনহাতে, অগপৰ কাৰ্যকৰী সভাপতি কেশৱ মহন্তক বিধায়িনী দলৰ উপ-দলপতি হিচাপে নিৰ্বাচিত কৰা হৈছে৷ একেদৰে সচিবৰ দায়িত্বভাৰ অৰ্পণ কৰা হৈছে ডিমৰীয়া সমষ্টিৰ নৱনিৰ্বাচিত বিধায়ক ডঃ তপন দাসক৷ ইয়াৰ উপৰি মুখ্য সচেতকৰ দায়িত্ব দিয়া হৈছে বজালী সমষ্টিৰ পৰা বিধায়ক ধৰ্মেশ্বৰ ৰয়ক৷ উল্লেখ্য যে এই বৈঠকতে এক প্ৰস্তাৱযোগে পৰৱৰ্তী মুখ্যমন্ত্ৰী হিচাপে হিমন্ত বিশ্ব শৰ্মাৰ নাম প্ৰস্তাৱ কৰা হয়।
উল্লেখ্য যে এইবাৰৰ নিৰ্বাচনত অসম গণ পৰিষদে ২৭ খন আসনত প্ৰতিদ্বন্দ্বিতা কৰিছিল যদিও ১০ খন আসনতহে জয়লাভ কৰিবলৈ সক্ষম হয়। নিৰ্বাচিত বিধায়কসকল হৈছে বিলাসীপাৰা সমষ্টিৰ জীৱেশ ৰয়, বঙাইগাঁও সমষ্টিৰ দিপ্তিময়ী চৌধুৰী, বৰপেটা সমষ্টিৰ দীপক কুমাৰ দাস, বজালী সমষ্টিৰ ধৰ্মেশ্বৰ ৰয়, হাজো-শুৱালকুছি সমষ্টিৰ প্ৰকাশ চন্দ্ৰ দাস, ডিমৰীয়া সমষ্টিৰ ডঃ তপন দাস, কলিয়াবৰ সমষ্টিৰ কেশৱ মহন্ত, তেজপুৰ সমষ্টিৰ পৃথ্বীৰাজ ৰাভা, টীয়ক সমষ্টিৰ বিকাশ শইকীয়া আৰু বোকাখাত সমষ্টিৰ অতুল বৰা।
