ইতিহাস সৃষ্টি কৰি মঙলবাৰে তৃতীয়টো কাৰ্যকালৰ বাবে অসমত বিজেপি চৰকাৰ (Assam BJP Govt.) আৰু দ্বিতীয়টো কাৰ্যকালৰ বাবে মুখ্যমন্ত্ৰী হিচাপে ডঃ হিমন্ত বিশ্ব শৰ্মা (Himanta Biswa Sarma)ই শপত গ্ৰহণ (Oath taking) কৰিব। ইয়াৰ বাবে খানাপাৰ পশু চিকিৎসা মহাবিদ্যালয় খেলপথাৰত ব্যাপক আয়োজন কৰা হৈছে। তত্ত্বাৱধায়ক মুখ্যমন্ত্ৰী হিমন্ত বিশ্ব শৰ্মাই আজি নিজে প্ৰস্তুতিৰ বুজ লয়। মঙলবাৰে অনুষ্ঠিত হ’বলগা অনুষ্ঠানত লক্ষাধিক লোকৰ সমাবেশ হ’ব বুলি ইতিমধ্যে ৰাজ্যিক বিজেপিয়ে প্ৰকাশ কৰিছে। এই অনুষ্ঠানত প্ৰধামন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ, বিজেপিৰ ৰাষ্ট্ৰীয় সভাপতি নীতিশ নবীনকে আদি কৰি কেইবাগৰাকীও কেন্দ্ৰীয় মন্ত্ৰী উপস্থিত থাকিব।
মঙলবাৰৰ শপতগ্ৰহণ অনুষ্ঠানত অশংগ্ৰহণ কৰিবলৈ সোমবাৰে নিশা ১০.৩০ বজাত প্ৰধানমন্ত্ৰী নৰেন্দ্ৰ মোদী গুৱাহাটীত উপস্থিত হ’ব। তেওঁ নিশাটো কইনাধৰাত কটাব। অনুষ্ঠানৰ প্ৰস্তুতিৰ বুজ লৈ হিমন্ত বিশ্ব শৰ্মাই জনোৱা মতে, প্ৰধানমন্ত্ৰীৰ উপৰি কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় প্ৰতিৰক্ষা মন্ত্ৰী ৰাজনাথ সিং, কেন্দ্ৰীয় বিত্তমন্ত্ৰী নিৰ্মলা সীতাৰমণ আৰু বিজেপিৰ ৰাষ্ট্ৰীয় সভাপতি নীতিন নবীনো সোমবাৰে নিশাৰ ভিতৰত গুৱাহাটীত উপস্থিত হ’ব৷
আনহাতে, ২২ খন ৰাজ্যৰ মুখ্যমন্ত্ৰী, উপ-মুখ্যমন্ত্ৰীসকলো উপস্থিত থকাৰ উপৰি দেশৰ বিশিষ্ট উদ্যোগপতি, বিদেশী ৰাষ্ট্ৰদূত, অসমৰ সত্ৰাধিকাৰসকল, দলৰ কাৰ্যকৰ্তা, বুথ কমিটীৰ সভাপতিসকল উপস্থিত থাকিব বুলি তেওঁ লগতে প্ৰকাশ কৰে। উল্লেখ্য যে মঙলবাৰে দিনৰ ১১ বজাত শপতগ্ৰহণ অনুষ্ঠান অনুষ্ঠিত হ’ব৷
অৱশ্যে বিজেপি নেতৃত্বাধীন তৃতীয় এনডিএ চৰকাৰত কোনে কোনে মন্ত্ৰিত্ব লাভ কৰিব সেই সন্দৰ্ভত এতিয়ালৈকে জানিব পৰা হোৱা নাই। মঙলবাৰে পুৱা ৭ বজাতহে এই বিষয়ে জ্ঞাত হ’ব বুলি মুখ্যমন্ত্ৰীয়ে উল্লেখ কৰে। সোমবাৰে নিশা বিজেপিৰ ৰাষ্ট্ৰীয় সভাপতি নীতিন নবীনৰ সৈতে আলোচনাৰ পিছত নতুন মন্ত্ৰীসভা সন্দৰ্ভত সিন্দান্ত গ্ৰহণ কৰা হ’ব বুলিও তেওঁ উল্লেখ কৰে। আনহাতে, শপত গ্ৰহণ অনুষ্ঠানৰ বাবে জালুকবাৰীৰ পৰা খানাপাৰালৈ ১৭নং ৰাষ্ট্ৰীয় ঘাইপথটো ৱান ৱে’ হ’ব বুলি ইতিমধ্যে প্ৰশাসনে জনাইছে। ইয়াৰ উপৰি পুৱা ৭ বজাৰ পৰা নিশালৈকে উক্ত পথছোৱাৰে সকলোধৰণৰ গধুৰ যান-বাহন চলাচলত নিষেধাজ্ঞা আৰোপ কৰিছে গুৱাহাটী মহানগৰ প্ৰশাসন তথা যান-বাহন আৰক্ষীয়ে।
