‘এক দেশ, এক নিৰ্বাচন’ (One nation, One Ration) নীতি ৰূপায়ণ হ’লে দেশে প্ৰায় ৭ লাখ কোটি টকা ৰাহি কৰিব পাৰিব। জিডিপি বৃদ্ধিৰ হাৰ ১.৬ শতাংশ বৃদ্ধি পাব পাৰে। এই কথা বুধবাৰে গুজৰাটৰ গান্ধীনগৰত ‘এক দেশ, এক নিৰ্বাচন’ বিষয়ক যুটীয়া সংসদীয় সমিতিৰ অধ্যক্ষ আৰু লোকসভাৰ সাংসদ প্ৰেম প্ৰকাশ চৌধুৰীয়ে (পি পি নামেৰে পৰিচিত) দাবী কৰে।
‘এক দেশ, এক নিৰ্বাচন’ বিধেয়কখনে বিভিন্ন লোকসভা আৰু বিভিন্ন ৰাজ্যিক বিধানসভাৰ একেলগে নিৰ্বাচন অনুষ্ঠিত কৰাৰ প্ৰস্তাৱ আগবঢ়াইছে।
কিন্তু তাৎপৰ্যপূৰ্ণভাৱে জেপিচিৰ অধ্যক্ষই ৭ লাখ কোটি টকা ৰাহি কৰাৰ লগতে জিডিপিৰ বৃদ্ধিৰ হাৰ ১.৬ শতাংশ বৃদ্ধিৰ পূৰ্বচৰ্ত হিচাপে কেৱল লোকসভা-বিধানসভাৰ নিৰ্বাচনেই নহয়, পঞ্চায়ত আৰু পৌৰসভা নিৰ্বাচনকো সংযোজন কৰিছে। তেওঁ কয়, “প্ৰাক্তন ৰাষ্ট্ৰপতি ৰামনাথ কোবিন্দৰ নেতৃত্বত গঠিত সমিতিৰ পৰামৰ্শ অনুসৰি লোকসভা আৰু বিধানসভা নিৰ্বাচন একেলগে অনুষ্ঠিত হ’ব। ইয়াৰ পিছত ১০০ দিনৰ ভিতৰত পঞ্চায়ত আৰু পৌৰসভাৰ নিৰ্বাচন আয়োজন কৰা হ’ব।”
২০২৪ চনৰ ডিচেম্বৰ মাহত লোকসভাত উত্থাপন হোৱা বিধেয়ক দুখনৰ খচৰা সন্দৰ্ভত আলোচনা কৰিবলৈ সংসদৰ এখন যুটীয়া সমিতি গঠন কৰা হৈছে, য’ত ১২৯ সংখ্যক সাংবিধানিক সংশোধনীৰ জৰিয়তে ‘এক দেশ, এক নিৰ্বাচন’ আইন প্ৰণয়নৰ প্ৰস্তাৱকে ধৰি কেইবাটাও বিষয়ত আলোচনা কৰা হৈছে। কংগ্ৰেছৰ প্ৰিয়ংকা গান্ধীৰ পৰা আৰম্ভ কৰি আপৰ সঞ্জয় সিং, আৰু তৃণমূলৰ কল্যাণ বেনাৰ্জী কমিটীৰ সদস্য। সংসদৰ দুয়োটা সদনৰ পৰা মুঠ ৩৯ জন সদস্য (লোকসভাৰ ২৭ আৰু ৰাজ্যসভাৰ ১২ জন) জেপিচিত আছে।
ৰাজস্থানৰ পালি লোকসভা সমষ্টিৰ বিজেপি সাংসদ তথা প্ৰাক্তন কেন্দ্ৰীয় মন্ত্ৰী প্ৰেম প্ৰকাশ চৌধাৰী জেপিচিৰ অধ্যক্ষ। প্রধানমন্ত্রী নৰেন্দ্র মোদীৰ চৰকাৰে প্রাক্তন ৰাষ্ট্ৰপতি ৰামনাথ কোবিন্দৰ অধীনত ‘এক দেশ, এক নিৰ্বাচন’ আইন প্রণয়নৰ বাবে গঠন কৰা আঠজনীয়া কমিটীৰ ১৮ হাজাৰ পৃষ্ঠাৰ প্রতিবেদন জেপিচিয়ে পর্যালোচনা কৰি আহিছে৷
