দেশৰ ১৩ খন ৰাজ্যৰ পৰা ‘ভুৱা ছীম কাৰ্ড’ ব্যৱহাৰ কৰি ১০১ কোটি টকা লুণ্ঠনৰ অভিযোগ উত্থাপন হৈছে। ইতিমধ্যে তেলেংগানাৰ হায়দৰাবাদ আৰক্ষীয়ে সেই চাইবাৰ অপৰাধীক (Cyber criminal) ধৰিবলৈ দেশজুৰি অপাৰেচন অক্টোপাছ (Operation Octopus) আৰম্ভ কৰিছে। এই অভিযানৰ সময়ত তেওঁলোকে ১৩ খন ৰাজ্যৰ ৬৬ জন লোকক গ্ৰেপ্তাৰ কৰিছে।
আৰক্ষীৰ সূত্ৰ অনুসৰি, পশ্চিমবংগ, কৰ্ণাটক, উত্তৰ প্ৰদেশ, মহাৰাষ্ট্ৰ, অন্ধ্ৰপ্ৰদেশ, গুজৰাট, দিল্লী, হাৰিয়ানা, তামিলনাডু, ওড়িশা, তেলেংগানা, মধ্যপ্ৰদেশ আৰু দিল্লীৰ পৰা ৬৬ জন লোকক গ্ৰেপ্তাৰ কৰা হৈছে।
তদন্তকাৰীয়ে জনোৱা মতে, কেইবাটাও চাইবাৰ অপৰাধৰ গোচৰৰ তদন্তৰ অন্তত সমগ্ৰ দেশতে ভুৱা ছীম কাৰ্ডৰ যোগানকাৰীক ধৰিবলৈ এই অভিযান আৰম্ভ কৰা হৈছে। জানিব পৰা মতে, অপৰাধী চক্ৰটো চলাবলৈ ১,১৬৪ খন ছীম কাৰ্ড ব্যৱহাৰ কৰা হৈছিল।
হায়দৰাবাদ আৰক্ষী আয়ুক্ত ভি চি সজ্জনাৰে জানিবলৈ দিয়া মতে, অভিযানৰ সময়ত ৫৪৪ খন ছীম উদ্ধাৰ কৰা হৈছে। চাইবাৰ অপৰাধীলৈ প্ৰেৰণ কৰিবলৈ ৪৩২ খন ছীম কাৰ্ড প্ৰস্তুত কৰা হৈছিল। আৰক্ষীৰ সূত্ৰ অনুসৰি, গ্ৰেপ্তাৰ হোৱা ৬৬ জন লোকৰ ভিতৰত ৪৪ জনেই নিজৰ নামত ভুৱা ছীম ক্ৰয় কৰিছিল। বিভিন্ন ছীম কাৰ্ড যোগান ধৰা চেণ্টাৰৰ পৰা ২০ জন লোকক আটক কৰা হৈছে। এই গোচৰত দুজন দালালকো গ্ৰেপ্তাৰ কৰা হৈছে। চাইবাৰ অপৰাধীয়ে পূৰ্বতে ডিজিটেলী বিশেষ জ্ঞান নথকা লোকক ইয়াৰ দ্বাৰা চিকাৰ কৰিছিল।
