ৰাজস্থানৰ আজমীৰৰ প্রাক্তন পঞ্চায়ত সভাপতি, তেওঁৰ দ্বিতীয় পত্নী, মাতৃ আৰু ভতিজা ছোৱালীৰ মৃতদেহ উদ্ধাৰ এখন অগ্নিদগ্ধ গাড়ীৰ পৰা (Rajasthan Murder) । প্রাথমিক অনুসন্ধানত আৰক্ষীৰ অনুমান, পাৰিবাৰিক সংঘাতৰ বাবেই এই হত্যাকাণ্ড সংঘটিত হৈছে। ইতিমধ্যে এই ঘটনাৰ লগত জড়িত থকাৰ সন্দেহত পঞ্চায়ত সভাপতিজনৰ প্রথম পত্নীক গ্ৰেপ্তাৰ কৰা হৈছে।
ৰাস্তাৰ কাষৰ এখন খেতিপথাৰত অগ্নিদগ্ধ গাড়ীখন স্থানীয় লোকে প্ৰত্যক্ষ কৰে। তেওঁলোক ওচৰলৈ গৈ দেখে যে ভিতৰত যাত্রী আছে। স্থানীয় লোকৰ দাবী অনুসৰি, গাড়ীখনৰ ভিতৰৰ পৰা চাৰিটা অগ্নিদগ্ধ মৃতদেহ উদ্ধাৰ কৰা হয়। আৰক্ষীয়ে জনোৱা মতে, এই ঘটনাটো বৃহস্পতিবাৰে আজমীৰৰ পৰা ৬০ কিলোমিটাৰ নিলগৰ শ্রীৰামপুৰা গাঁৱত সংঘটিত হয়।
প্ৰাৰম্ভিক অৱস্থাত আৰক্ষীয়ে এইটো কোনো দুর্ঘটনা বুলি অনুমান কৰিছিল। কিন্তু কেইবাটাও সূত্রৰ ভিত্তিত তদন্তকাৰীসকল নিশ্চিত হয় যে এইটো কোনো দুর্ঘটনা নহয়। তাৰ পিছতেই এটি হত্যাৰ গোচৰ ৰুজু কৰা হয়।
জানিব পৰা মতে, মৃত চাৰিগৰাকী হৈছে পঞ্চায়ত সভাপতি ৰাম সিং চৌধৰী, তেওঁৰ মাতৃ, পত্নী সূর্যজ্ঞান দেৱী আৰু ভতিজী মহিমা চৌধৰী। তদন্তত আৰক্ষীয়ে জানিব পাৰিছে যে ৰাম সিঙে দুবাৰ বিয়া কৰাইছিল। তেওঁ দুই পত্নী আৰু সন্তানসকলৰ সৈতে একেলগে বাস কৰিছিল।
২০০৫ চনত তেওঁ সুনীতাক বিয়া কৰাইছিল। তেওঁৰ ভাগৰ দুটা সন্তান। ইয়াৰ পিছত ২০১৯ চনত সূর্যজ্ঞানক বিয়া কৰায়। এই বিয়াত সুনীতাই আপত্তি কৰিছিল। কিন্তু সেই আপত্তিক গুৰুত্ব নিদি ৰাম সিঙে দ্বিতীয় বিবাহ কৰিছিল।
ধৃতসকলক কৰা জেৰাত আৰক্ষীয়ে জানিব পাৰিছে যে সুৰাসক্ত অৱস্থাত ৰাম সিঙে প্রতিদিনে সুনীতা আৰু তেওঁৰ সন্তানকেইটাক মাৰধৰ কৰিছিল। বৃহস্পতিবাৰে সেই অশান্তি চৰম সীমাত উপনীত হয়।
তাৰ পিছতেই ৰাম সিঙক সুনীতাৰ পুত্ৰই ঘপিয়াই হত্যা কৰাৰ অভিযোগ। এই ঘটনা সূর্যজ্ঞানে প্ৰত্যক্ষ কৰাত তেওঁকো হত্যা কৰা হয়। আনহাতে, চিৎকাৰৰ শব্দ শুনি ৰাম সিঙৰ মাতৃ আৰু ভতিজী ওলাই অহাত তেওঁলোককো হত্যা কৰাৰ অভিযোগ। তাৰ পিছত প্রমাণ নষ্ট কৰিবলৈ এখন গাড়ীত উঠাই লৈ কিছুদূৰ লৈ গৈ গাড়ীখনত জুই জ্বলাই দিয়ে।
