তামিলনাডুত ক্ষমতালৈ অহাৰ পিছৰে পৰা তামিলাগা ভেট্ৰি কাঝাগামৰ (টিভিকে) মুৰব্বী তথা মুখ্যমন্ত্ৰী চি জোচেফ বিজয়ে ৰাজ্যখনৰ উন্নয়নৰ বাবে কেইবাটাও পদক্ষেপ গ্ৰহণ কৰিছে। তেওঁ ৰাজ্যখনক উন্নয়নৰ জোৱাৰলৈ নিয়াৰ প্ৰতিশ্ৰুতি দি আগবাঢ়ি যোৱাৰ বাৰ্তা দিছে। শুকুৰবাৰে বিজয়ে (TN CM Vijay) প্ৰথমখন কেবিনেট বৈঠক অনুষ্ঠিত কৰে।
সচিবালয়ত এঘণ্টাৰো অধিক সময় চলে এই বৈঠক। সূত্ৰ অনুসৰি, উক্ত বৈঠকত ৰাজ্যৰ কেইবাটাও সমস্যাৰ কথা উত্থাপন হৈছিল। আনহাতে, বিজয়ে যিবোৰ বিষয়ৰ ওপৰত গুৰুত্ব দিব বিচাৰে তাৰ ভিতৰত ৰাজ্যখনক নিচামুক্ত কৰা, যুৱ প্ৰজন্ম আৰু মহিলাৰ উন্নয়নৰ ওপৰত গুৰুত্ব আৰোপ কৰা।
বিদ্যুৎ মন্ত্ৰী চিটিআৰ নিৰ্মল কুমাৰে কয় যে মুখ্যমন্ত্ৰীয়ে বৈঠকত ৪৩৬টা নতুন প্ৰকল্পৰ কথা ঘোষণা কৰে। অৱশ্যে মন কৰিবলগীয়া যে বিজয়ে তামিলনাডুক ড্ৰাগছমুক্ত কৰাৰ প্ৰতিশ্ৰুতি দিছে। ইয়াৰ উপৰি মাছমৰীয়াৰ বিকাশৰ কথাও আলোচিত বিষয়সমূহৰ ভিতৰত আছিল।
শক্তি মন্ত্ৰীগৰাকীয়ে কয়, “মুখ্যমন্ত্ৰী বিজয়ৰ নেতৃত্বত প্ৰথমখন কেবিনেট বৈঠক অনুষ্ঠিত হয়। এই বৈঠকত ৪৩৬টা প্ৰকল্পৰ বিষয়ে আলোচনা কৰা হয়। প্ৰতিটো বিভাগৰ বাবে নিৰ্দিষ্ট দায়িত্ব আৰু লক্ষ্য নিৰ্ধাৰণ কৰা হৈছে। মুখ্যমন্ত্ৰীয়ে স্পষ্টভাৱে এটা বাৰ্তা দিছে যে এই প্ৰকল্পসমূহ সঠিকভাৱে পৰিচালনা কৰিব লাগিব। যাৰ যি দায়িত্ব আছে, সেই দায়িত্বও সঠিকভাৱে পালন কৰক।”
মুখ্যমন্ত্ৰীৰ বাৰ্তাৰ পিছত মন্ত্ৰীসকলে নিজ নিজ বিভাগৰ বিষয়াসকলৰ সৈতে বৈঠকত বহি এক কৰ্ম পৰিকল্পনা প্ৰস্তুত কৰাৰ প্ৰস্তুতি চলাইছে বুলি সূত্ৰই প্ৰকাশ কৰিছে। শক্তি মন্ত্ৰীগৰাকীৰ মতে, “প্ৰতিটো বিভাগৰ কাৰ্যপৰিকল্পনা প্ৰস্তুত হোৱাৰ পিছত সেইবোৰ কেনেকৈ কাৰ্যকৰী কৰিব পাৰি সেই সন্দৰ্ভত অতি সোনকালে বিতং আলোচনা হ’ব।”
ৰাজ্যখনক নিচামুক্ত কৰা বিষয়টো সন্দৰ্ভত মন্ত্ৰীগৰাকীয়ে সুৰাৰ দোকান বন্ধ কৰাৰ বিষয়টো উত্থাপন কৰে। ইতিমধ্যে ৰাজ্য চৰকাৰৰ দ্বাৰা পৰিচালিত ৭১৭ খন সুৰাৰ বিপণী বন্ধ কৰি দিয়া হৈছে বুলিও তেওঁ কয়। মন্ত্ৰীগৰাকীৰ মতে, “আমাৰ মূল লক্ষ্য হৈছে তামিলনাডুক নিচামুক্ত কৰা। ইতিমধ্যে যোৱা পাঁচ বছৰত ৰাজ্যখনত ড্ৰাগছ সৰবৰাহ আৰু ড্ৰাগছৰ যোগান বৃদ্ধি পোৱাৰ বাবে কঠোৰ পদক্ষেপ ল’বলৈ আৰক্ষী প্ৰশাসনক কোৱা হৈছে।”
কেৱল ড্ৰাগছ বা সুৰায়ে নহয়, ৰাজ্যত গুটখাৰ বিক্ৰীও নিষিদ্ধ কৰা হ’ব। সেই পদক্ষেপো লোৱা হৈছে। এসপ্তাহৰ ভিতৰত মাদুৰাইত ২৪খন গুটখা দোকান বন্ধ কৰি দিয়া হৈছে বুলি মন্ত্ৰীগৰাকীয়ে দাবী কৰিছে। তেওঁ সকীয়াই দিয়ে যে যিয়ে গুটখা বিক্ৰীক সমৰ্থন কৰিব আৰু ইয়াৰ লগত জড়িত হ’ব, সেইসকলৰ বিৰুদ্ধে আইনৰ অধীনত গোচৰ ৰুজু কৰা হ’ব।
