অন্ধ্ৰপ্ৰদেশৰ বিশাখাপট্টনম তীখা উদ্যোগত দুৰ্ঘটনা (Visakhapatnam industrial accident)। গলিত তীখা কঢ়িয়াই নিয়া পাত্ৰত বিস্ফোৰণৰ ফলত কমেও ৮ জন লোকৰ মৃত্যু হোৱা বুলি জানিব পৰা গৈছে। আন বহুকেইজন গুৰুতৰভাৱে আহত হৈছে। মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
জানিব পৰা মতে, তীখা উদ্যোগটোৰ এছএমএছ-২ আৰু এছটিচি-৩ তাপ শক্তি কেন্দ্ৰত সংঘটিত হৈছে এই দুৰ্ঘটনা। সোমবাৰে বিয়লি গলিত তীখা কঢ়িয়াই অনা এটা পাত্ৰত সংঘটিত হয় এক বিস্ফোৰণ। বিস্ফোৰণৰ ফলত কাৰখানাটোত আতংক বিয়পি পৰে। প্ৰাণ ৰক্ষাৰ বাবে দৌৰাদৌৰি কৰে শ্ৰমিকসকলে।
অৱশ্যে গলিত তীখাৰ ফলত বহুতেই জ্বলি যায়। কাৰোবাৰ গোটেই শৰীৰ জ্বলি গৈছে, আন কিছুমানৰ শৰীৰৰ বিভিন্ন অংশ জ্বলি গৈছে। এই পৰ্যন্ত মৃত্যু হোৱা আঠজনৰ ভিতৰত ৫জন কাৰখানাটোৰ স্থায়ী কৰ্মচাৰী। বাকী তিনিজনে ঠিকাভিত্তিত কাম কৰি আছিল।
নিহতসকলৰ ভিতৰত আছে এজন টেকনিচিয়ান, জেনেৰেল ফৰমেন, মেচিন ইনচাৰ্জ। দুৰ্ঘটনা সংঘটিত হোৱাৰ লগে লগে কাৰখানাৰ শ্ৰমিকসকলে নিজেই উদ্ধাৰ অভিযান আৰম্ভ কৰে। তথ্য লাভ কৰাৰ লগে লগে অগ্নিনিৰ্বাপক বাহিনী আৰু আৰক্ষী উপস্থিত হয়।
এই দুৰ্ঘটনাক লৈ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে। তেওঁ আৰ্থিক সাহায্যৰ কথাও ঘোষণা কৰিছে। মোদীৰ ঘোষণা অনুসৰি, প্ৰতিজন মৃত শ্ৰমিকৰ পৰিয়ালক ২ লাখ টকাৰ এককালীন ক্ষতিপূৰণ দিয়া হ’ব। প্ৰধানমন্ত্ৰীয়ে আহতসকলৰ বাবেও ৫০ হাজাৰ টকাৰ সাহায্য ঘোষণা কৰিছে।
