দেশৰ দৰিদ্ৰ পৰিয়ালসমূহৰ বাবে আৰম্ভ কৰা উজলা আঁচনি (Ujjwala Gas plan)ৰ অধীনত পুনৰ ৰাজসাহায্যযুক্ত গেছ (Subsidized gas) চিলিণ্ডাৰৰ সুবিধা হ্ৰাস (Cylinder capacity reduction) কৰিছে নৰেন্দ্ৰ মোদী চৰকাৰে। প্ৰধানমন্ত্ৰী উজলা যোজনাৰ অধীনত গ্ৰাহকে এতিয়া বছৰি কেৱল চাৰিটা চিলিণ্ডাৰহে (Four cylinders) লাভ কৰিব। এতিয়ালৈকে গ্ৰাহকে বছৰি ৯টা ৰাজসাহায্যযুক্ত ৰন্ধন গেছৰ চিলিণ্ডাৰ লাভ কৰিছিল।
সংবাদ সংস্থা পিটিআয়ে পেট্ৰ’লিয়াম আৰু প্ৰাকৃতিক গেছ মন্ত্ৰালয়ৰ অতিৰিক্ত সচিব প্ৰবীণ মাল খানুজাৰ উদ্ধৃতি দি কয় যে সংশোধিত চিলিণ্ডাৰৰ সংখ্যা মূলতঃ উজলা যোজনাৰ গ্ৰাহকৰ গড় বাৰ্ষিক ব্যৱহাৰৰ প্ৰতিফলন। তেওঁ কয়, “চৰকাৰে নিৰ্ধাৰণ কৰা প্ৰতিটো চিলিণ্ডাৰৰ যোগানৰ খৰচৰ তুলনাত গ্ৰাহকে প্ৰায় বহুখিনি সহায় পায়।”
২০১৬ চনৰ মে’ মাহত সমগ্ৰ দেশতে মুকলি কৰা হৈছিল মোদীৰ উজলা যোজনা। সেই সময়ত গ্ৰাহকে বছৰি ১২টা ৰাজসাহায্যযুক্ত ১৪.২ কেজি চিলিণ্ডাৰ লাভ কৰিছিল। যোৱা বছৰৰ আগষ্ট মাহত কেন্দ্ৰীয় কেবিনেট বৈঠকৰ পিছত জাৰি কৰা এক অধিসূচনাত কোৱা হৈছিল যে উজলাৰ গ্ৰাহকে বছৰি ৯টা চিলিণ্ডাৰত ৰাজসাহায্য লাভ কৰিব। এইবাৰ সেই সংখ্যা চাৰিলৈ হ্ৰাস কৰা হৈছে।
দুদিনমান আগতে ৰন্ধন গেছৰ দাম ২৯ টকাকৈ বৃদ্ধি কৰাৰ সিদ্ধান্ত ঘোষণা কৰা হৈছিল। ইয়াৰ লগে লগে তিনিমাহৰ ভিতৰত দ্বিতীয়বাৰৰ বাবে বৃদ্ধি পাইছে ৰন্ধন গেছৰ মূল্য। ৰন্ধন গেছৰ মূল্যবৃদ্ধি সন্দৰ্ভত পেট্ৰ’লিয়াম মন্ত্ৰালয়ে জনাইছে যে দেশৰ পৰিয়ালসমূহে এতিয়াও কম দামত ৰন্ধন গেছ লাভ কৰি আছে। তাৰ তুলনাত চুবুৰীয়া দেশ আৰু বহু উন্নত দেশত ৰন্ধন গেছৰ দাম এই দেশতকৈ বহু বেছি। লগতে কয় যে প্ৰধানমন্ত্ৰী উজলা যোজনাৰ অধীনত এজন গ্ৰাহকে ৬৪২ টকাত ১৪.২ কেজি ৰন্ধন গেছ পায়। ইয়াৰ পিছদিনাই উজলা যোজনাৰ অধীনত কেন্দ্ৰই বাৰ্ষিক চিলিণ্ডাৰৰ সংখ্যা হ্ৰাস কৰে।
