প্ৰাক্তন ক্ৰিকেটাৰ তথা তৃণমূলৰ সাংসদ ইউছুফ পাঠানৰ আবেদন ইতিমধ্যে নাকচ কৰাৰ পিছত এইবাৰ গুজৰাট উচ্চ ন্যায়ালয়ৰ প্ৰশ্ন, বেৰহামপুৰৰ সাংসদজনে এটকাও খৰচ নকৰাকৈ আৰু চৰকাৰী অনুমোদন নোলোৱাকৈ কেনেকৈ বদোদৰা পৌৰসভাৰ মাটি দখল কৰিলে? আদালতে নিজৰ পৰ্যবেক্ষণত কয়, “এইটো কৰিব নোৱাৰি ।”
ইয়াৰ সমান্তৰালকৈ গুজৰাট উচ্চ ন্যায়ালয়ৰ মুখ্য ন্যায়াধীশ সুনীতা আগৰৱাল আৰু ন্যায়াধীশ ডি এন ৰায়ৰ সংমণ্ডল বিচাৰপীঠে কয় যে আবেদনকাৰী (ইউছুফ) উক্ত সম্পত্তিৰ দখল আৰু ব্যৱহাৰৰ ক্ষতিপূৰণ দিবলৈ সাজু হ’ব লাগে। এই গোচৰৰ পৰৱৰ্তী শুনানি ১৫ জুনত হ’ব। উল্লেখ্য যে পাঠানে বদোদৰা পৌৰসভাৰ অধিকৃত ৯৭৮ বৰ্গমিটাৰ মাটি লৈছিল।
পৌৰসভাই অভিযোগ উত্থাপন কৰে যে তেওঁ উক্ত মাটিত দেৱাল স্থাপন কৰি সংশ্লিষ্ট অঞ্চলটোক নিজৰ সম্পত্তি হিচাপে ব্যৱহাৰ কৰিছিল, যিটো অবৈধ। কিন্তু ২০১২ চনত পৌৰসভা কৰ্তৃপক্ষই পাঠানক প্ৰস্তাৱ দিয়ে। তেওঁলোকে কয়, “মাটি কিনি লওক, প্ৰাক্তন ক্ৰিকেটাৰ । ইয়াৰ বাবে কোনো নিলাম নহ’ব।” প্ৰতি বৰ্গমিটাৰত ৫৭,২৭০ টকা দিয়াৰ প্ৰস্তাৱো উত্থাপন কৰা হয়।
কিন্তু ২০১৪ চনত গুজৰাট চৰকাৰে পৌৰসভাৰ অনুমোদন বাতিল কৰে। তদানীন্তন বিজেপিৰ কাউন্সিলাৰ বিজয় পাৱাৰে পাঠানে অবৈধভাৱে মাটি দখল কৰাৰ অভিযোগ উত্থাপন কৰিছিল। অৱশ্যে ইমান বছৰে এই মাটি ব্যৱহাৰ কৰি আহিছে প্ৰাক্তন ক্ৰিকেটাৰগৰাকীয়ে। ইয়াৰ মাজতে ২০২৪ চনৰ লোকসভা নিৰ্বাচপ্ৰাক্তন ক্ৰিকেটাৰগৰাকীয়ে বংগৰ বেৰহামপুৰ সমষ্টিৰ পৰা তৃণমূলৰ টিকটত প্ৰতিদ্বন্দ্বিতা কৰে। বিদায়ী কংগ্ৰেছৰ সাংসদ অধীৰ চৌধুৰীক পৰাস্ত কৰি তেওঁ সাংসদ হয়। সেই সময়ত বদোদৰাৰ কেইবাজনো কাউন্সিলাৰে পুনৰবাৰ পাঠানৰ বিৰুদ্ধে ভূমি দখলৰ অভিযোগ উত্থাপন কৰিছিল। উল্লেখ্য যে পৌৰসভাই পাঠানক জাননী জাৰি কৰি মাটি খালী কৰিবলৈ কয়। যাৰ পৰিপ্ৰেক্ষিতত তৃণমূলৰ সাংসদগৰাকী উচ্চ ন্যায়ালয়লৈ যায়। কিন্তু গুজৰাট উচ্চ ন্যায়ালয়ে যোৱা ছেপ্টেম্বৰ মাহত বদোদৰা পৌৰসভাৰ জাননীক প্ৰত্যাহ্বান জনাই কৰা পাঠানৰ আবেদন খাৰিজ কৰে।
