কেতিয়াবা ছবিয়েও কথা কয়। ৰাজ্যসভাৰ সাংসদ তথা তৃণমূল কংগ্ৰেছৰ নেত্ৰী (TMC leader) সুস্মিতা দেৱে পদত্যাগ (Sushmita Devi’s resignation) কৰাৰ খবৰ পোৱাৰ কিছু মিনিটৰ ভিতৰতে অসমৰ মুখ্যমন্ত্ৰী হিমন্ত বিশ্ব শৰ্মাৰ সৈতে (With Himanta Biswa Sharma photo) তেওঁৰ এখন ছবি ভাইৰেল (viral picture) হৈ পৰে। দুয়োগৰাকী নেতাই কেমেৰাৰ সন্মুখত হাঁহি থকা দেখা গৈছে। এই ছবিখন চালেই পৰিস্থিতি স্পষ্ট হৈ পৰে। আনহাতে, এই হঠাৎ দল পৰিৱৰ্তনৰ পিছত সুস্মিতা দেৱে হাঁহি মাৰি কয়, “ইয়াত কেৱল অসমৰ সংযোগ আছে।”
ৰাজনৈতিক ভৱিষ্যতৰ বিষয়ে সোধাত সুস্মিতা দেৱে কয় যে তেওঁক কোনো অনুমোদনৰ প্ৰয়োজন নাই আৰু ৰাজনৈতিক সিদ্ধান্ত লোৱাটো সম্পূৰ্ণ নিজৰ। তেওঁ জোৰ দি কয়, “মুক্ত আৰু গণতান্ত্ৰিক দেশত মই কোনটো দলক সমৰ্থন কৰিম, কেনেধৰণৰ ৰাজনীতি কৰিম বা আচলতে ৰাজনীতি কৰিম নে নাই সেইটো নিৰ্ণয় কৰাৰ অধিকাৰ মোৰ আছে।”
অৱশ্যে হিমন্ত বিশ্ব শৰ্মাৰ ঘনিষ্ঠ সূত্ৰৰ মতে, সুস্মিতা দেৱে আনুষ্ঠানিকভাৱে বিজেপিত যোগদান কৰাটো এতিয়া সময়ৰহে অপেক্ষা। এনডিটিভিৰ সূত্ৰ অনুসৰি, সুস্মিতাৰ তৃণমূল কংগ্ৰেছ ত্যাগ কৰাৰ সিদ্ধান্তত হিমন্ত বিশ্ব শৰ্মাই গুৰুত্বপূৰ্ণ ভূমিকা পালন কৰিছিল। সুস্মিতা দেৱে নিজেই মুখ্যমন্ত্ৰীক তেওঁৰ ‘মেণ্টৰ’ বুলি ৰাজহুৱাভাৱে স্বীকাৰ কৰিছে। মুখ্যমন্ত্ৰীক সাক্ষাৎ কৰাৰ পিছত সাংবাদিকৰ আগত কয়, “মই তেওঁৰ পৰা পৰামৰ্শ লৈছিলোঁ।”
সূত্ৰসমূহে লগতে প্ৰকাশ কৰিছে যে অসমৰ মুখ্যমন্ত্ৰীয়ে ৰাজ্যৰ ৰাজনীতিত প্ৰত্যাৱৰ্তনৰ ৰোডমেপ সম্পৰ্কে আলোচনা কৰে। দুয়োগৰাকী নেতাৰ মাজত দীৰ্ঘদিনীয়া সম্পৰ্ক আছে। এটা দশকৰো অধিক পূৰ্বে যেতিয়া হিমন্ত বিশ্ব শৰ্মাই তদানীন্তন অসমৰ মুখ্যমন্ত্ৰী প্ৰয়াত তৰুণ গগৈৰ বিৰুদ্ধে বিদ্ৰোহ আৰম্ভ কৰিছিল, তেতিয়া তেওঁৰ নেতৃত্ব সলনিৰ আহ্বানক সমৰ্থন কৰা কংগ্ৰেছ বিধায়িকাসকলৰ ভিতৰত আছিল সুস্মিতা দেৱো অন্যতম।
সূত্ৰ অনুসৰি, মুখ্যমন্ত্ৰী হিমন্ত বিশ্ব শৰ্মাই ২০১৯ চনৰ লোকসভা নিৰ্বাচনত শিলচৰ সমষ্টিৰ পৰা বিজেপিৰ হৈ প্ৰতিদ্বন্দ্বিতা কৰিবলৈ সুস্মিতা দেৱক প্ৰস্তাৱ দিছিল। সেই সময়ত জ্যোতিৰাদিত্য সিন্ধিয়াই দল সলনি কৰিছিল। কিন্তু সুস্মিতা দেৱে এই প্ৰস্তাৱ নাকচ কৰি কংগ্ৰেছ প্ৰাৰ্থী হিচাপে নিৰ্বাচনত পৰাস্ত হয়। বিজেপি নেতাৰ ঘনিষ্ঠ মহলৰ পৰা পোৱা তথ্য অনুসৰি, সুস্মিতা দেৱে কংগ্ৰেছ ত্যাগ কৰাৰ পূৰ্বেও হিমন্ত শৰ্মাৰ সৈতে কথা পাতিছিল। লগতে কোৱা হৈছে যে ২০২১ চনত তৃণমূল কংগ্ৰেছত যোগদান কৰাৰ সময়ত সুস্মিতা দেৱে হিমন্তক সমগ্ৰ বিষয়টো অৱগত কৰিছিল। দলৰ অভ্যন্তৰৰ লোকৰ মতে, এসপ্তাহৰ ভিতৰত তেওঁ বিজেপিত যোগদান কৰাৰ সম্ভাৱনা আছে আৰু অসমৰ বঙালী অধ্যুষিত বৰাক উপত্যকা অঞ্চলত দলৰ কাম-কাজৰ লগত জড়িত হ’ব।
হিমন্ত বিশ্ব শৰ্মাৰ প্ৰতি আনুগত্যশীল কংগ্ৰেছ নেতাসকলে ইতিমধ্যে বিজেপিলৈ গমন কৰাৰ সময়তে সুস্মিতা দেৱৰ তৃণমূলৰ পৰা বাহিৰ হৈ বিজেপিত যোগদানৰ সম্ভাৱনীয়তা বৃদ্ধি পাইছে। বৰাক উপত্যকাৰ সুস্মিতা দেৱৰ গৃহ সমষ্টিৰ কংগ্ৰেছৰ প্ৰাক্তন নেতা ৰাজদীপ গোৱালা আৰু কমলাক্ষ দে’ পুৰকায়স্থ ইতিমধ্যে বিজেপিত যোগদান কৰিছে। এতিয়া সুস্মিতা দেৱৰ যোগদানে এই পৰিক্ৰমা সম্পূৰ্ণ কৰিব।
