নয়ডা, দিল্লী, গাজিয়াবাদৰ দৰে চহৰবোৰ ধাৰাসাৰ বৰষুণৰ (Delhi flood) কবলত। বৃহস্পতিবাৰে দিল্লী আৰু গাজিয়াবাদত পানীৰে ভৰা পথত দুটি শিশু উটি যায়। ইফালে সমতল পথতো সংঘটিত হয় ভূমিস্খলন। প্ৰচণ্ড যান-জঁটৰ ফলত ক্ষতিগ্ৰস্ত হৈছে সাধাৰণ ৰাইজ আৰু যাতায়াত কৰা লোকসকল।
গাজিয়াবাদৰ বিজয়নগৰত নিজ ঘৰৰ সন্মুখৰ পানীত বুৰ যোৱা পথত উটি যায় তিনি বছৰীয়া শিশু পল্লৱী । তেওঁৰ পিতৃয়ে জনোৱা মতে, ঘৰৰ সন্মুখৰ ৰাস্তাৰ কাষৰ নলাটো বৰষুণৰ পানীৰে উপচি পৰিছিল। হঠাৎ পল্লৱী পিছলি তাতেই পৰে।
প্ৰায় লগে লগেই তেওঁক উঠাই অনা হয় যদিও তেতিয়ালৈকে বহু দেৰি হৈ গৈছিল। চিকিৎসালয়লৈ নিয়াৰ সময়ত চিকিৎসকে শিশুটিক মৃত বুলি ঘোষণা কৰে। বিজয়নগৰৰ এচিপি উপাসনা পাণ্ডেয়ে কয় যে আৰক্ষীয়ে ঘটনাটো পঞ্জীয়ন কৰিছে। সঠিক তদন্তৰ ভিত্তিত ব্যৱস্থা গ্ৰহণ কৰা হ’ব। লগতে মৃতকৰ পৰিয়াললৈ সকলো সম্ভৱপৰ সহায় আগবঢ়োৱা হ’ব।
দিল্লীৰ সৌমীপুৰ বদলী অঞ্চলতো সংঘটিত হৈছে একেধৰণৰ ঘটনা। খালী ঠাইত জমা হোৱা বৰষুণৰ পানীত উটি যায় এটি সাত বছৰীয়া শিশু। সৰু ভাতৃৰ লগত খেলিবলৈ যোৱা তৃতীয় শ্ৰেণীৰ ছাত্ৰীগৰাকীক প্ৰায় দুঘণ্টা ধৰি বিচাৰি অভিযান চলোৱা হয়। পিছত জমা হোৱা পানীৰ পৰা উদ্ধাৰ কৰা হয়।
চিকিৎসালয়লৈ নিয়াৰ সময়ত চিকিৎসকে তেওঁক মৃত বুলি ঘোষণা কৰে। আকস্মিক মৃত্যু বুলি দাবী কৰিছে আৰক্ষীয়ে। প্ৰাথমিকভাৱে আন কোনো সম্ভাৱনা নুই কৰা হৈছে। দীৰ্ঘদিন ধৰি পথটোত জমা হোৱা পানীৰ প্ৰতি প্ৰশাসনৰ দৃষ্টি আকৰ্ষণ কৰি আহিলেও কোনো ব্যৱস্থা গ্ৰহণ কৰা নাই বুলি অভিযোগ উত্থাপন কৰিছে অঞ্চলবাসীয়ে।
আনহাতে, বৃহস্পতিবাৰে পুৱা গাজিয়াবাদৰ ১৩ নং বসুন্ধৰা ব্লকত এটা পথ ভাঙি পৰে। ভূমিস্খলনৰ ফলত পথৰ এক বৃহৎ অংশ ডুব যায়। কিন্তু কোনো লোক হতাহতি হোৱাৰ খবৰ পোৱা নাই।
কিন্তু ভূমিস্খলনৰ ফলত পথত ৰখাই থোৱা এখন চাৰিচকীয়া বাহন আৰু এখন স্কুটাৰ ক্ষতিগ্ৰস্ত হয়। দুয়োখন গাঁতত সোমাই যায়। গাড়ীখনৰ মালিকে থানাত লিখিত এজাহাৰ দাখিল কৰিছে। তেওঁৰ মতে, যাৱতীয় অনুমতি অবিহনে পথৰ কাষত ২০ ফুট দ বেছমেণ্ট নিৰ্মাণ কৰা হৈছিল। ফলত পথটো দুৰ্বল হৈ পৰে।
বৰষুণৰ পানীৰ বাবে মাটি কোমল হৈ পৰে, যাৰ ফলত মাটি খহি যায়। তদুপৰি নয়ডা, দিল্লী আৰু গাজিয়াবাদৰ কেইবাটাও গুৰুত্বপূৰ্ণ পথ ডুব যোৱাৰ ফলত পুৱাৰে পৰা যাতায়াতৰ সমস্যাৰ সৃষ্টি হয়। পানীত বহু গাড়ী বিকল হৈ পৰে।
