দেশৰ প্ৰতিৰক্ষাৰ সংক্ৰান্ত তথ্য ফাদিল কৰাৰ অভিযোগত দিল্লীত গ্ৰেপ্তাৰ (Arrested in Delhi) হ’ল এজন বায়ুসেনাৰ উইং কমাণ্ডাৰ (Air Force Wing Commander)। দ্য ইণ্ডিয়ান এক্সপ্ৰেছৰ এক প্ৰতিবেদন অনুসৰি, বায়ুসেনাৰ বিষয়াগৰাকী বৰ্তমান ন্যায়িক জিম্মাত আছে। তেওঁৰ বিৰুদ্ধে ‘অফিচিয়েল ছিক্ৰেটছ এক্ট’ৰ (Official Secrets Act) অধীনত গোচৰ ৰুজু কৰা হৈছে।
প্ৰতিবেদন অনুসৰি, দিল্লী আৰক্ষীৰ এক সূত্ৰই দাবী কৰিছে যে দেশৰ প্ৰতিৰক্ষা আৰু চোৰাংচোৱাৰ তথ্যৰ সৈতে জড়িত তথ্য সংগ্ৰহৰ বাবে এটা ডাঙৰ চক্ৰই কাম কৰি আছে। সেই চক্ৰটোৰ তথ্য পোৱাৰ পিছতেই আহিছিল বায়ুসেনাৰ বিষয়াজনৰ নাম। ইয়াৰ পিছতে তেওঁক গ্ৰেপ্তাৰ কৰা হয়। সূত্ৰটোৱে জনোৱা মতে, যোৱা ৩১ মে’ত বিষয়াজনক গ্ৰেপ্তাৰ কৰা হৈছিল।
দিল্লী আৰক্ষীৰ সূত্ৰই দাবী কৰিছে যে উইং কমাণ্ডাৰগৰাকীক পাকিস্তানী চোৰাংচোৱা বিষয়াই প্ৰলোভিত কৰি ‘যৌনতাৰ’ ফান্দত (trap of ‘sex’) পেলাইছিল। ইয়াৰ পিছত তেওঁৰ পৰা প্ৰতিৰক্ষাৰ তথ্য লাভ কৰা হয়। সূত্ৰটোৱে দাবী কৰা মতে, উইং কমাণ্ডাৰজনে তেওঁৰ এজন সহকৰ্মীৰ মোবাইল ফোনত তথ্য চুৰি কৰা ছফ্টৱেৰ ইনষ্টল কৰিছিল। বিষয়টো পোহৰলৈ অহাৰ লগে লগে তেওঁক গ্ৰেপ্তাৰ কৰা হয়। তেওঁক তিহাৰ জে’ললৈ প্ৰেৰণ কৰা হৈছে।
বায়ুসেনাৰ এগৰাকী মুখপাত্ৰই দাবী কৰিছে যে অভিযুক্ত কমাণ্ডাৰগৰাকীৰ ওপৰত দীৰ্ঘদিন ধৰি নজৰ ৰখা হৈছিল। ইয়াৰ পিছত তেওঁৰ বিৰুদ্ধে ব্যৱস্থা গ্ৰহণ কৰা হয়। প্ৰাৰম্ভিক তদন্তত আৰক্ষীয়ে জানিব পাৰিছে যে কমাণ্ডাৰজনৰ ব্যক্তিগত জীৱনতো উত্তেজনা দেখা গৈছে। ছচিয়েল মিডিয়াত এগৰাকী মহিলাৰ সৈতে কথা-বতৰা পাতিছিল। ইয়াৰ পিছত তেওঁলোকৰ মাজত অন্তৰংগতা বৃদ্ধি পায় । ভিডিঅ’ কল, চাটিং সকলো চলি আছিল। বিশ্বাস লাভ কৰাৰ পিছত মহিলাগৰাকীয়ে বিষয়াজনক বাহিনীটোৰ সৈতে জড়িত বিভিন্ন তথ্য বিচাৰিবলৈ আৰম্ভ কৰে। ছবি আৰু ভিডিঅ’ও বিচাৰিছিল তেওঁ। তদন্তত জানিব পৰা গৈছে যে উইং কমাণ্ডাৰজন সেই ফান্দত পৰিছিল আৰু চোৰাং তথ্য সৰবৰাহ কৰাৰ অভিযোগ উত্থাপন হৈছে।
অৱশ্যে সূত্ৰৰ পৰা জানিব পৰা মতে, কি তথ্য চোৰাংভাৱে দিয়া হৈছিল তাৰ তদন্ত চলি আছে। তদন্তকাৰী সূত্ৰ অনুসৰি, ছ’চিয়েল মিডিয়াত লগ পোৱা মহিলাগৰাকীয়ে উইং কমাণ্ডাৰজনক তেওঁৰ সহকৰ্মীৰ মোবাইলত তথ্য চুৰি কৰিবলৈ বিশেষ এপ ইনষ্টল কৰিবলৈ পৰামৰ্শ দিয়ে। তদন্তকাৰীয়ে সন্দেহ কৰিছে যে ই স্পাইৱেৰ বা ৰিম’ট এক্সেছ মালৱেৰ এপ হ’ব পাৰে। এনে এপসমূহ মূলতঃ মোবাইলৰ তথ্য, সংশ্লিষ্ট ব্যক্তিজনৰ অৱস্থান আৰু কথা-বতৰা চুৰি কৰিবলৈ ব্যৱহাৰ কৰা হয়। তদন্তকাৰী সূত্ৰৰ মতে, এয়া কেৱল তথ্য সৰবৰাহৰ বিষয় নহয়। বাহিনীটোৰ আন সদস্যৰ তথ্যও চুৰি কৰাৰ চেষ্টা চলোৱাৰ সন্দেহ কৰা হৈছে। তদন্তকাৰী সূত্ৰৰ মতে, যিটো ছ’চিয়েল মিডিয়া একাউণ্টত উইং কমাণ্ডাৰজনৰ কথা-বতৰা চলি আছিল, সেই একাউণ্টটো পাকিস্তানৰ পৰাই চলি আছিল। এই চক্ৰৰ লগত আৰু কোনোবা জড়িত আছে নেকি সেইটো চিনাক্ত কৰাৰ কাম চলি আছে।
