জাতীয় গীত বন্দে মাতৰমৰ (Vande Mataram) মৰ্যাদা আৰু পৰম্পৰা (Dignity and Tradition)ক লৈ কোনো আপোচ কৰা নহ’ব। শনিবাৰে দিল্লীত বিজেপিৰ সৰ্বভাৰতীয় বিষয়ববীয়াৰ বৈঠকত এই সিদ্ধান্ত লোৱা হয়। মহাত্মা গান্ধীৰ চিন্তা-চৰ্চা (Thoughts and Discussions of Mahatma Gandhi) আৰু বন্দে মাতৰমৰ ((Vande Mataram) বিষয়ত তেওঁৰ বক্তব্য দেশজুৰি প্ৰচাৰ কৰাৰ সিদ্ধান্তও গেৰুৱা শিবিৰে গ্ৰহণ কৰিছে।
শেহতীয়াকৈ কংগ্ৰেছৰ ৰাষ্ট্ৰীয় ৱৰ্কিং কমিটীৰ বৈঠকত সিদ্ধান্ত লোৱা হৈছিল যে তেওঁলোকে দলীয় কাৰ্যসূচীত বন্দে মাতৰমৰ প্ৰথম দুটা স্তৱক গাব। ইয়াৰ ফলত বিতৰ্কৰ সৃষ্টি হয়। এই সিদ্ধান্তৰ ব্যাখ্যা দিওঁতে কংগ্ৰেছে মহাত্মা গান্ধীৰ বিষয়টো উত্থাপন কৰে। তেওঁলোকৰ মতে, ১৯৩৭ চনত কলকাতাত অনুষ্ঠিত কংগ্ৰেছ ৱৰ্কিং কমিটীৰ বৈঠকত মহাত্মা গান্ধী, জৱাহৰলাল নেহৰু, সুভাষ চন্দ্ৰ বসু, চৰ্দাৰ বল্লভভাই পেটেলকে ধৰি কেইবাজনো শীৰ্ষ নেতাই বন্দে মাতৰমৰ প্ৰথম দুটা স্তৱক গোৱাৰ সিদ্ধান্ত লয়।
এইবাৰ বিজেপিয়ে কংগ্ৰেছক প্ৰত্যুত্তৰ দিবলৈ মহাত্মা গান্ধীৰ বক্তব্য প্ৰচাৰ কৰাৰ সিদ্ধান্ত লয়। গেৰুৱা শিবিৰে নিজৰ প্ৰস্তাৱত কয় যে মহাত্মা গান্ধীৰ এই বক্তব্য আছিল, সাম্ৰাজ্যবাদৰ বিৰুদ্ধে প্ৰবল জাতীয়তাবাদী আৱেগৰ দ্বাৰা অনুপ্ৰাণিত এক শ্লোগান বন্দে মাতৰম। বিজেপিয়ে তেওঁৰ বক্তব্য সমগ্ৰ দেশতে প্ৰচাৰ কৰাৰ সিদ্ধান্ত লৈছে। একে সময়তে কংগ্রেছৰ শেহতীয়া ৰাষ্ট্রীয় ৱৰ্কিং কমিটীৰ বৈঠকত গ্রহণ কৰা সিদ্ধান্তক বিজেপিয়ে গৰিহণা দিছে৷ দলটোৰ সৰ্বভাৰতীয় সভাপতি নীতিন নবীনৰ নেতৃত্বত অনুষ্ঠিত বৈঠকত জাতীয় গীতৰ সম্পূৰ্ণ সংস্কৰণৰ মৰ্যাদা ৰক্ষাৰ প্ৰস্তাৱো গৃহীত হয়।
কংগ্ৰেছ দলৰ কাৰ্যসূচীত জাতীয় গীতৰ প্ৰথম দুটা স্তৱক গোৱাৰ সিদ্ধান্তৰ বিৰোধিতা আৰম্ভণিৰে পৰাই কৰি আহিছে বিজেপিয়ে। কেন্দ্ৰীয় গৃহমন্ত্ৰী তথা বিজেপি চৰকাৰৰ দ্বিতীয় সৰ্বোচ্চ কণ্ঠস্বৰ অমিত শ্বাহে কংগ্ৰেছৰ এই সিদ্ধান্তক ‘ৰাষ্ট্ৰ বিৰোধী’ বুলি অভিহিত কৰে। কংগ্ৰেছে এই সিদ্ধান্ত গ্ৰহণ কৰি তুষ্টিকৰণৰ ৰাজনীতিত লিপ্ত হোৱাৰ অভিযোগ উত্থাপন কৰে। এইবাৰ বিজেপিৰ ৰাষ্ট্ৰীয় বিষয়ববীয়াৰ বৈঠকত গৃহীত প্ৰস্তাৱটোত ‘তুষ্টিকৰণৰ ৰাজনীতি’ৰ বিৰুদ্ধে থিয় দিব বুলিও উল্লেখ কৰা হৈছে। ৰাজনৈতিক লাভালাভৰ বাবে বা সন্তুষ্টিৰ বাবে বন্দে মাতৰমৰ মৰ্যাদা আৰু পৰম্পৰাৰ সৈতে কোনো আপোচ সহ্য কৰা নহ’ব বুলি গেৰুৱা শিবিৰে কয়। এনে পৰিস্থিতিত বিজেপি নেতৃত্বই জাতীয় গীতৰ ইতিহাস আৰু গৌৰৱময় পৰম্পৰাক দেশৰ চুকে-কোণে লৈ যোৱাৰ বাবে এক বিশেষ অভিযান আৰম্ভ কৰাৰ সিদ্ধান্ত লৈছে।
