কেন্দ্ৰীয় চৰকাৰে ২০০০ টকাতকৈ অধিক ইউপিআই লেনদেনত অতিৰিক্ত মাচুল (এমডিআৰ) আৰোপ কৰাৰ সিদ্ধান্ত গ্ৰহণ কৰিছে। ইয়াৰ বাবেও সামগ্ৰী আৰু সেৱা কৰ (জিএছটি) আৰোপ কৰা হ’ব। চৰকাৰী সূত্ৰ অনুসৰি, এমডিআৰৰ ওপৰত ১৮ শতাংশ জিএছটি আৰোপ কৰা হ’ব। ফলত ১৫ অক্টোবৰৰ পৰা ব্যৱসায়ীসকলৰ খৰচ আৰু বৃদ্ধি পাব। সেইদিনাৰ পৰা ব্যৱসায়িক লেনদেনত এমডিআৰ প্ৰযোজ্য হ’ব।
কেন্দ্ৰৰ নতুন নিয়ম অনুসৰি, কিউআৰ ক’ডৰ জৰিয়তে প্ৰতিমাহে এক লাখ টকা পৰ্যন্ত উপাৰ্জন কৰা ক্ষুদ্ৰ ব্যৱসায়ীসকলে কোনো এমডিআৰ দিব নালাগিব। ৰে’ল আৰু শক্তিৰ দৰে কিছুমান বিশেষ শিতানত ২০০০ টকাৰ অধিক লেনদেনৰ ক্ষেত্ৰত ৫ টকাৰ নিৰ্দিষ্ট চাৰ্জ প্ৰযোজ্য হ’ব। আন উচ্চ মূল্যৰ লেনদেনত ০.৪ শতাংশ এমডিআৰ দিব লাগিব। ৭৫ হাজাৰ বা তাতকৈ অধিক মূল্যৰ লেনদেনৰ বাবে প্ৰতিটো লেনদেনত সৰ্বাধিক ৩০০ টকাৰ সীমা নিৰ্ধাৰণ কৰা হ’ব। কিন্তু কোনো কাৰণতে সাধাৰণ গ্ৰাহকে কোনো অতিৰিক্ত খৰচ দিব নালাগিব। কেন্দ্ৰই দাবী কৰিছে যে ডাঙৰ ব্যৱসায়ীৰ ওপৰত এমডিআৰ আৰোপ কৰা হ’ব। চৰকাৰৰ এই সিদ্ধান্তৰ সমালোচনা বিভিন্ন ফালৰ পৰা আৰম্ভ হৈছে। বিৰোধীয়ে দাবী কৰিছে যে ব্যৱসায়ীসকলে প্ৰকৃততে এই অতিৰিক্ত ধন গ্ৰাহকৰ পৰা ল’ব। লোকসভাত বিৰোধী দলৰ নেতা ৰাহুল গান্ধীয়ে দাবী কৰিছে যে ভাৰত চৰকাৰে আমেৰিকাৰ হেঁচাত নতি স্বীকাৰ কৰি এমডিআৰ কাৰ্যকৰী কৰাৰ সিদ্ধান্ত লৈছে।
এইদৰে দেশৰ প্ৰতিজন সাধাৰণ মানুহৰ ওপৰত কৰ আৰোপ কৰা হৈছে। এই সন্দৰ্ভত বিতৰ্কৰ সময়ত জানিব পৰা গৈছে যে এমডিআৰৰ ওপৰতো১৮ শতাংশ জিএছটি আৰোপ কৰা হ’ব। তেন্তে ইউপিআইৰ লেনদেন অধিক খৰচী হ’ব নেকি? চৰকাৰে অৱশ্যে সেইটো মানি ল’ব বিচৰা নাই। চৰকাৰী সূত্ৰই কয় যে বৰ্তমান এমডিআৰত জিএছটি দিব লাগিব যদিও ব্যৱসায়ীসকলে ‘ইনপুট টেক্স ক্ৰেডিট’ (আইটিচি) দাবী কৰি সেই ধন ঘূৰাই পাব পাৰে। ফলত তেওঁলোকে প্ৰকৃততে ইউপিআইৰ লেনদেনত কোনো ধৰণৰ জিএছটি দিব নালাগে।
উদাহৰণস্বৰূপে কোনো গ্ৰাহকে যদি কোনো দোকানৰ পৰা ১০ হাজাৰ টকাৰ সামগ্ৰী ক্ৰয় কৰে তেন্তে ব্যৱসায়ীয়ে ০.৪ শতাংশ হাৰত ৪০ টকাৰ এমডিআৰ দিব লাগিব। সেই ৪০ টকাত ১৮ শতাংশ জিএছটি আৰোপ কৰা হ’ব। ফলত আৰু ৭.২০ টকা দিব লাগিব। সেই ১০ হাজাৰ টকীয়া ক্ৰয়ৰ বাবে ব্যৱসায়ীয়ে মুঠ ৪৭ টকা অতিৰিক্ত দিব লাগিব। অৱশ্যে পিছত তেওঁ আইটিচিৰ জৰিয়তে জিএছটিৰ বাবে দিয়া ধন ঘূৰাই পাব পাৰে।
ৰে’লৱে আৰু বীমাৰ দৰে কিছুমান সেৱাৰ ক্ষেত্ৰত ২০০০ টকাতকৈ অধিক ইউপিআই লেনদেনত ৫ টকীয়া এমডিআৰ আৰোপ কৰা হৈছে। তাৰ ওপৰতো ১৮ শতাংশ জিএছটি প্ৰযোজ্য। চৰকাৰী সূত্ৰই দাবী কৰিছে যে এই সিদ্ধান্ত কাৰ্যকৰী কৰাৰ ক্ষেত্ৰত যদি কিবা অভাৱ হয়, তেন্তে ইয়াক পূৰণৰ বাবে পৰ্যাপ্ত প্ৰচেষ্টা চলোৱা হ’ব। অৱশ্যে বৰ্তমান এমডিআৰ বাতিল কৰাৰ কোনো সম্ভাৱনা নাই। ব্যৱসায়ীসকলৰ ওপৰত চৰকাৰে তীক্ষ্ণ নজৰ ৰাখিব, যাতে তেওঁলোকে অতিৰিক্ত ধনৰ বোজা গ্ৰাহকৰ মাজলৈ আগবঢ়াই নিদিয়ে। ক’ৰবাত কিবা সমস্যা হ’লে জিএছটি কাউন্সিলে তদাৰক কৰিব৷
বিভিন্ন পর্যায়ত হোৱা আলোচনাৰ ভিত্তিত চৰকাৰে এমডিআৰ কার্যকৰী কৰাৰ সিদ্ধান্ত লোৱা বুলি সূত্রই দাবী কৰিছে৷ ছেবি আৰু ষ্টকহোল্ডাৰসকলৰ সৈতেও বৈঠক অনুষ্ঠিত কৰা হৈছে। বহুতে আশংকা কৰে যে এমডিআৰৰ বাবে অনলাইন লেনদেন কমি যাব পাৰে। কিন্তু চৰকাৰে তেনেকৈ নাভাবে। এজন বিষয়াই কয়, “আমি নাভাবো যে নগদ ধনৰ লেনদেন বিশেষ বৃদ্ধি পাব। আমি আশাকৰোঁ যে ১৫ অক্টোবৰত এই নিয়ম প্ৰৱৰ্তন কৰাৰ পিছতো ইউপিআইৰ লেনদেন একেই থাকিব।” লগতে তেওঁ কয়, “কিছুমান বাহ্যিক প্ৰভাৱৰ বাবে এমডিআৰ প্ৰৱৰ্তন কৰা হৈছে বুলি উত্থাপন কৰা অভিযোগ সম্পূৰ্ণ ভিত্তিহীন। আমি ধাৰাবাহিকভাৱে ৰূপে ডেবিট কাৰ্ডৰ ব্যৱহাৰৰ প্ৰচাৰ চলাই আছোঁ। ৰূপে ডেবিট কাৰ্ডত কোনো এমডিআৰ নাই। ই আন কাৰ্ডতকৈ অধিক সুবিধা প্ৰদান কৰিব।”
