চলিত বৰ্ষৰ মে’ মাহত সমাপ্ত হোৱা পাঁচখন ৰাজ্যৰ বিধানসভা নিৰ্বাচনত বিজেপিয়ে ৫২৯ কোটি টকা ব্যয় কৰিছে। কেৱল পশ্চিমবংগৰ বিধানসভা নিৰ্বাচনতে ২৮৬ কোটি টকা ব্যয় হৈছিল। শেহতীয়াকৈ বিজেপিয়ে সাধাৰণ পদ্ধতি অনুসৰি নিৰ্বাচনী ব্যয়ৰ হিচাপ নিৰ্বাচন আয়োগক দাখিল কৰে। তাৰ পৰাই এই পৰিসংখ্যা লাভ কৰা হৈছে। পশ্চিমবংগৰ সমান্তৰালকৈ অসম, তামিলনাডু, কেৰালা আৰু কেন্দ্ৰীয়শাসিত অঞ্চল পুডুচেৰীত বিধানসভা নিৰ্বাচন অনুষ্ঠিত হয়। বিজেপিয়ে আয়োগক দাখিল কৰা হিচাপ অনুসৰি, বিজেপিয়ে অসমৰ বাবে ৯৬.২৬ কোটি, কেৰালাৰ বাবে ৮২.৬৭ কোটি, তামিলনাডুৰ বাবে ৫১.৫৬ কোটি আৰু পুডুচেৰীৰ বাবে ১১.৮৯ কোটি টকা ব্যয় কৰা হয়। মুঠ ব্যয় হৈছে ৫২৯.৩৮ কোটি টকা।
২০৭ খন আসন লাভ কৰি পশ্চিমবংগত প্ৰথমবাৰৰ বাবে ক্ষমতালৈ আহিছে বিজেপি। ৰাজ্যথনত দলৰ সামগ্ৰিক প্ৰচাৰত ২১৭.১৬ কোটি টকা ব্যয় কৰিছে আৰু প্ৰাৰ্থীৰ ওপৰত ৬৯.৮৩ কোটি টকা। মুঠ ৫৮.৮০ কোটি টকা প্ৰাৰ্থীসকলক প্ৰচাৰৰ খৰচৰ বাবে দিয়া হৈছিল।
বিজেপিয়ে কয় যে পাঁচখন ৰাজ্যৰ নিৰ্বাচনী খৰচৰ পিছত তেওঁলোকৰ দলৰ পুঁজি ৭৬৮৯.০৬ কোটি টকা। এই ধনৰ কিছু অংশ বেংকত জমা হয় আৰু কিছু হাতত থাকে। নিৰ্বাচনৰ সময়ত বিজেপিয়ে অনুদান হিচাপে লাভ কৰিছিল ১,৪৯৪ কোটি টকা।
নিৰ্বাচন আয়োগে এজন প্ৰাৰ্থীৰ বাবে সৰ্বোচ্চ ব্যয়ৰ সীমা নিৰ্ধাৰণ কৰিছে। কিন্তু ৰাজনৈতিক দলৰ বাবে তেনে কোনো বাধা বা নিয়ন্ত্ৰণ নাই। নিয়ম অনুসৰি ৰাজনৈতিক দলসমূহে প্ৰতিটো নিৰ্বাচনৰ পিছত নিজৰ নিৰ্বাচনী খৰচৰ বিশদ হিচাপ আয়োগক দাখিল কৰিব লাগে। এই ব্যয়ৰ ভিতৰত প্ৰাৰ্থীসকলৰ ভ্ৰমণ, বিজ্ঞাপন, সভা আৰু ৰেলী আদি অন্তৰ্ভুক্ত।
