গুৱাহাটী মহানগৰীৰ ধাৰাপুৰৰ বাসিন্দা দ্বীপ ঠাকুৰীয়াৰ জ্যেষ্ঠ কন্যা নিমিষা ঠাকুৰীয়াৰ (Nimisha Thakuriya) ৰহস্যজনক মৃত্যুক কেন্দ্ৰ কৰি তীব্ৰ চাঞ্চল্যৰ সৃষ্টি হৈছে। প্ৰায় ২২ বছৰীয়া নিমিষা গুৱাহাটী বিশ্ববিদ্যালয়ৰ পাঁচ বছৰীয়া সংহত পাঠ্যক্ৰমৰ স্নাতক শ্ৰেণীৰ ছাত্ৰী আছিল।পৰিয়ালৰ ভাষ্য অনুসৰি, শুকুৰবাৰে সন্ধিয়া প্ৰায় ৫ বজাত খাবলৈ যোৱাৰ কথা কৈ নিমিষা ঘৰৰ পৰা ওলাই গৈছিল। নিশা তেওঁ বান্ধৱীৰ সৈতে হোষ্টেলত থাকিব বুলি পৰিয়ালক জনাইছিল।
নিমিষাৰ পিতৃয়ে প্ৰকাশ কৰা মতে, নিশা প্ৰায় ২ বজাত নিমিষাই অসহায় অৱস্থাত মাতৃলৈ ফোন কৰি কৈছিল—“মা, ইহঁতে মোক বুকুত গুৰিয়াইছে। মই উশাহ ল’ব পৰা নাই।” তাৰ পাছতে তেওঁৰ মাত বন্ধ হৈ পৰে আৰু ফোনযোগেও যোগাযোগ কৰিব পৰা নগ’ল। ফোনটোৰ আনটো মূৰত দুজনমান যুৱকৰ কথা-বতৰাও শুনিবলৈ পোৱা বুলি পিতৃয়ে দাবী কৰিছে।
পৰিয়ালে ততালিকে আজাৰা আৰক্ষী থানাত উপস্থিত হৈ ঘটনাৰ সবিশেষ জনায়। আৰক্ষীয়ে গড়লৰ এখন চিকিৎসালয়লৈ আহত অৱস্থাত এগৰাকী যুৱতীক লৈ অহাৰ কথা পৰিয়ালক অৱগত কৰে। পৰিয়ালৰ লোকে চিকিৎসালয়ত অক্সিজেন লৈ থকা অৱস্থাত নিমিষাক দেখা পায়। পৰৱৰ্তী সময়ত তেওঁক গুৱাহাটী চিকিৎসা মহাবিদ্যালয় হাস্পতাললৈ নিয়া হয় যদিও চিকিৎসকে মৃত ঘোষণা কৰে।
পৰিয়ালৰ মতে, তিনিজনমান যুৱকে নিমিষাক গড়লৰ চিকিৎসালয়খনলৈ লৈ আহিছিল। গড়লস্থিত RUDREAS KITCHEN নামৰ এটা হোমষ্টেৰ সৈতে ঘটনাটোৰ সম্পৰ্ক থকাৰ তথ্যও পোহৰলৈ আহিছে। পশ্চিম গুৱাহাটীৰ উপ-আৰক্ষী আয়ুক্ত বলেন দেউৰীয়ে জনোৱা মতে, নিশা প্ৰায় ৪ বজাত ঘটনাটো সংঘটিত হৈছিল।
ঘটনা সন্দৰ্ভত মূল অভিযুক্ত যুৱকজনক ইতিমধ্যে গ্ৰেপ্তাৰ কৰি আৰক্ষীৰ জিম্মাত জেৰা চলাই থকা হৈছে। প্ৰাথমিক তথ্য অনুসৰি, গ্ৰেপ্তাৰ কৰা যুৱকজন আচিক আলী আৰু তেওঁৰ ঘৰ গাড়ীগাঁৱত। ঘটনাৰ সৈতে জড়িত থকাৰ সন্দেহত হোমষ্টেৰ মালিক জয়ন্ত চাকীকো আৰক্ষীয়ে আটক কৰা বুলি জানিব পৰা গৈছে।
নিমিষাৰ মৃতদেহ মৰণোত্তৰ পৰীক্ষাৰ বাবে GMCHত ৰখা হৈছে। মৰণোত্তৰ পৰীক্ষাৰ প্ৰতিবেদন লাভ কৰাৰ পাছতহে মৃত্যুৰ সঠিক কাৰণ স্পষ্ট হ’ব বুলি আৰক্ষীয়ে জানিবলৈ দিছে। ঘটনাটো আক্ৰমণ, দুৰ্ঘটনা নে আন কোনো কাৰণত সংঘটিত হ’ল—সেয়া নিৰ্ণয় কৰিবলৈ আৰক্ষীয়ে পুংখানুপুংখ তদন্ত অব্যাহত ৰাখিছে।
