দীপাৱলীৰ আগৰ নিশা আৰু পিছদিনা দিল্লীৰ প্ৰদূষণৰ (Delhi pollution) মাত্ৰা অতি বেয়া স্তৰত উপনীত হয়। অৱশ্যে বুধবাৰে পৰিস্থিতিৰ সামান্য উন্নতি ঘটিছে। প্ৰদূষণৰ সমান্তৰালকৈ ধোঁৱাও বিৰাজ কৰিছে। বুধবাৰেও ৰাজধানী ধোঁৱাৰ আৱৰণেৰে আৱৰি ধৰে। কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ তথ্য অনুসৰি, বুধবাৰে পুৱা ৭ বজাত দিল্লীৰ সামগ্ৰিক বায়ুৰ গুণাগুণ সূচকাংক (AQI) ‘বেয়া’ৰ পৰা ‘অতি বেয়া’লৈ গতি কৰে। সেই সময়ত একিউআই আছিল ২৯৯। কিন্তু এতিয়াও কেইবাঠাইতো একিউআই ‘অতি বেয়া’ স্তৰত আছে।
চিপিচিবিয়ে কয় যে ৰাজধানীত থকা ৫৮টা প্ৰদূষণ নিৰীক্ষণ কেন্দ্ৰৰ ভিতৰত ২৮টাত বায়ুৰ গুণাগুণ ‘অতি বেয়া’। আনহাতে, ৩০টা নিৰীক্ষণ কেন্দ্ৰৰ বায়ুৰ গুণাগুণ ‘বেয়া’ স্তৰত আছে। চান্দনী চকত প্ৰদূষণৰ মাত্ৰা সৰ্বাধিক। তাত বায়ুৰ গুণাগুণ ৩৭৯। ইয়াৰ পিছতে আছে আইআইটি দিল্লী আৰু দিল্লী টেকন’লজিকেল ইউনিভাৰ্চিটি (৩৭৫)। আইটিঅ’ত ৩৬৭ আৰু বুৰাৰী ক্ৰছিঙত একিউআই ৩৬২। পুছা আৰু পাঞ্জাবী বাগৰ বায়ুৰ গুণাগুণো ৩০০ৰ ওপৰত। এই দুই স্থানৰ একিউআই ক্ৰমে ৩৫৯ আৰু ৩৪১। ইণ্ডিয়া গে’টত ২৪২, আনন্দ বিহাৰত ৩০৩, দিল্লী কেণ্টনমেণ্টত ১১৭।
কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ মতে ০-৫০ একিউআই ‘ভাল’, ৫১-১০০ ‘সন্তোষজনক’, ১০১-২০০ ‘মধ্যমীয়া’, ২০১-৩০০ ‘বেয়া’, ৩০১-৪০০ ‘অতি বেয়া’ আৰু ৪০১-৫০০ ‘গুৰুতৰ’। সোমবাৰে ৰাজধানীৰ বায়ুৰ গুণাগুণ ৩০০ৰ ওপৰত আছিল যদিও মঙলবাৰৰ পৰা হ্ৰাস পাবলৈ আৰম্ভ কৰে। মঙলবাৰৰ বায়ুৰ গুণাগুণ আছিল ২৯৯। আগন্তুক কেইদিনমানৰ ভিতৰত প্ৰদূষণৰ ছবিখনৰ কিছু পৰিৱৰ্তন হ’ব বুলি বতৰ বিজ্ঞানীসকলে আশা প্ৰকাশ কৰিছে।
