
কাৰ্বি আংলং দিৱসৰ ৭৫সংখ্যক বৰ্ষপূৰ্তি। গৌৰৱ, ঐতিহ্য আৰু সাফল্যৰ ৭৫ বছৰীয়া যাত্ৰাক স্মৰণ কৰি ডিফুত বৰ্ণাঢ্য আয়োজন। ডিফুস্থিত কাৰ্বি পিপলছ হ’ল, তাৰালাংছ’ আৰু কাচা ষ্টেডিয়ামত এই অনুষ্ঠানৰ আয়োজন কৰা হৈছে।কাৰ্বি আংলং দিৱস হৈছে অসমৰ কাৰ্বি আংলং জিলাৰ প্ৰতিষ্ঠা দিৱস।প্ৰতি বছৰে ১৭ নৱেম্বৰ তাৰিখে এই দিৱস পালন কৰা হয়। ১৯৫১ চনৰ ১৭ নৱেম্বৰত মিকিৰ পাহাৰক ভাৰতীয় সংবিধানৰ ষষ্ঠ অনুসূচীৰ অধীনত চৰকাৰীভাৱে এটা সুকীয়া জিলা হিচাপে স্বীকৃতি দিয়া হৈছিল।

খৰছিং তেৰাং, ছেমছনছিং ইংতি, লাংকুং হাবে (ছাৰছিং ইংলেং), জয়ছিং দলৈ আদি বহু মহান ব্যক্তিত্বৰ নেতৃত্বত ১৯৫১ চনৰ ১৭ নৱেম্বৰত গঠন হৈছিল বৰ্তমানৰ কাৰ্বি আংলং আৰু ডিমা হাছাও জিলাক লৈ গঠিত সংযুক্ত মিকিৰ পাহাৰ জিলা।
১৯৫৩ চনৰ ২৩ জুনত গঠন হয় বৰ্তমানৰ কাৰ্বি আংলং স্বায়ত্তশাসিত পৰিষদ, তদানীন্তন কাৰ্বি আংলং জিলা পৰিষদ।জিলা গঠনৰ দিনটোৰ পৰাই কাৰ্বি আংলং দিৱস পালন কৰি অহা হৈছে। প্ৰয়াত মুখ্যমন্ত্ৰী তৰুণ গগৈৰ কাৰ্যকালত ১৯৯৬ চনমানত বৃহত্তৰ অসমৰ প্ৰতিষ্ঠাপক স্বৰ্গদেউ চাওলুং চুকাফাৰ স্মৃতিত ২ ডিচেম্বৰত অসম দিৱসৰ শুভাৰম্ভ কৰাৰ পিছত ৰাজ্যৰ প্ৰতিখন জিলাতে জিলা গঠনৰ দিনটোক স্মৰণ কৰি জিলা দিৱস পালন কৰাৰ সিদ্ধান্ত গ্ৰহণ কৰা হৈছিল।
ইয়াৰ পিছৰে পৰা প্ৰতিখন জিলাতে নিজস্বভাৱে জিলা দিৱস পালন কৰি অহা হৈছে যদিও কাৰ্বি আংলং দিৱসৰ ইতিহাস বহু পুৰণি।প্ৰাপ্ত তথ্য অনুসৰি, ১৯৮২ চনত গুৱাহাটীত প্ৰথমবাৰৰ বাবে কাৰ্বি আংলং দিৱস উদযাপন কৰা হৈছিল। তদানীন্তন অসম চৰকাৰৰ মন্ত্ৰী প্ৰয়াত ছামছিং হানছেৰ নেতৃত্বত এই অনুষ্ঠানৰ আয়োজন কৰা হৈছিল।
প্ৰথমবাৰৰ এই উদযাপনৰ পিছত দীৰ্ঘ ৩৪ বছৰৰ বিৰতি ঘটে। মাজতে ২০০৬ চনত স্বায়ত্তশাসিত পৰিষদৰ তদানীন্তন মুখ্য কাৰ্যবাহী সদস্য প্ৰয়াত ছুম ৰংহাঙৰ কাৰ্যকালতো কাৰ্বি আংলং দিৱস পালন কৰা হৈছিল বুলি জানিব পৰা গৈছে। ইয়াৰ পিছত ২০১৬ চনৰ ৬ আগষ্টত গুৱাহাটীৰ শ্ৰীমন্ত শংকৰদেৱ কলাক্ষেত্ৰত দ্বিতীয় কাৰ্বি আংলং দিৱস পুনৰ উদযাপনৰ জৰিয়তে এই অনুষ্ঠানক নতুনকৈ পুনৰুজ্জীৱিত কৰা হয়।
ইয়াৰ পিছৰে পৰা প্ৰতি বছৰে ১৭ নৱেম্বৰৰ দিনটোত কাৰ্বি আংলং দিৱস পালন কৰি অহা হৈছে। এইবাৰ এই দিৱসে গৌৰৱোজ্জ্বল প্লেটিনাম জয়ন্তী বৰ্ষত ভৰি দিছে। ৭৫সংখ্যক বৰ্ষপূৰ্তি উপলক্ষে প্ৰায় ১৫,০০০ শিল্পীয়ে পৰম্পৰাগত কাৰ্বি লোকনৃত্য আৰু সংগীত প্ৰদৰ্শন কৰি গিনিছ ৱৰ্ল্ড ৰেকৰ্ড গঢ়াৰ প্ৰয়াস কৰিব।এই বছৰ ১৫ ৰ পৰা ১৭ নৱেম্বৰলৈ বৰ্ণাঢ্য কাৰ্যসূচীৰে এই দিৱস উদযাপন কৰা হব।












