ডিফু, ১৪ নৱেম্বৰঃ প্ৰায় এমাহ পূৰ্বে পিতৃক হেৰুওৱাৰ পিছত আজি জ্যেষ্ঠ ভাতৃকো হেৰুৱালে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে। আজি পুৱা প্ৰায় ৪.৩০ বজাত নতুন দিল্লীত শেষ নিশ্বাস ত্যাগ কৰে কাৰ্বি আংলং স্বায়ত্তশাসিত পৰিষদৰ চিইএম তুলিৰাম ৰংহাঙৰ জ্যেষ্ঠ ভাতৃ তথা ডংকামুকাম পৌৰ ব’ৰ্ডৰ অধ্যক্ষ তেলিশৰাম ৰংহাঙে।
জ্যেষ্ঠ ভাতৃৰ বিয়োগত গভীৰ শোক প্ৰকাশ কৰি বিধায়ক তথা স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে সামাজিক মাধ্যমযোগে লিখিছে, “মোৰ জ্যেষ্ঠ ভাতৃ তথা ডংকামুকাম পৌৰ ব’ৰ্ডৰ অধ্যক্ষ তেলিছৰাম ৰংহাঙৰ অকাল বিয়োগৰ খবৰ জনাই আমি গভীৰভাৱে শোকাহত। দীৰ্ঘদিন ধৰি অসুস্থতাৰ সৈতে যুঁজি আজি পুৱা ৪.০৫ বজাত নতুন দিল্লীৰ এখন ব্যক্তিগত চিকিৎসালয়ত তেওঁ শেষ নিশ্বাস ত্যাগ কৰে। কাৰ্বি আংলং দিৱসৰ কাৰ্যসূচীৰ প্ৰতি লক্ষ্য ৰাখি কাইলৈ তেওঁৰ শেষকৃত্য সম্পন্ন কৰা হ’ব।”
