ASSAM TIMES POST
বাংগালোৰ বড়ো ৱেলফাৰ এছ’চিয়েচন আৰু এবছু কেন্দ্ৰীয় সমিতিৰ মহানুভৱতা
৫ খন বাছেৰে ১৫৫ যাত্ৰীক বাংগালোৰৰ পৰা গৃহভূমি অসমলৈ ৰাওনা
ষ্টাফ ৰিপ’ৰ্টাৰ,ডিফু
মানুহে মানুহৰ বাবে যদিহে অকণো নেভাবে ভাবিব কোনেনো কোৱা “ — বিশ্বৰত্ন ভূপেনদাৰ এই কালজয়ী গীতটেকে যেন সৰোগত কৰি বাংগালোৰত এজাক সুহৃদয়ৱান মানুহ থিয় দিছে দুৰ্গতজনৰ কাষত ।
কভিড – 19 বিশ্বজুৰি সৃষ্টি কৰা ত্ৰাসৰ ফলত দেশত চলি আছে ল’কডাউন আৰু এই লকডাউনৰ ফলত বহু লোক আবদ্ধ হৈ আছে বহি-ৰাজ্যত । বাংগালোৰৰ পৰা অসমলৈ ১৫৫ জন অসমৰ বিভিন্ন জিলাৰ ছাত্ৰ-শ্ৰমিকক লৈ গুৱাহাটীলৈ যাত্ৰা কৰিলে ৫ খন বাছে ।
এই ছাত্ৰ- শ্ৰমিক সকলক কোনো চৰকাৰে সহায় কৰা নাই । বৰঞ্চ বাংগালোৰ বড়ো ৱেলফাৰ এছ’চিয়েচন আৰু এবছু কেন্দ্ৰীয় সমিতিৰ জৰিয়তে সহায় কৰা হৈছে । বাংগালোৰৰ জিগিণি নামৰ ঠাইৰ পৰা যাত্ৰা কৰা বাছ কিখনত আছে কাৰ্বি আংলংৰ ৫৯ জন, ধেমাজিৰ ৩৪ জন, শোণিতপুৰৰ ১৫ জন, ওদালগুৰিৰ ১৩ জন, কোকৰাঝাৰৰ ১০ জন, বাক্সা জিলাৰ ৭ জন, গোলাঘাটৰ ৫ জন, বিশ্বনাথৰ ৪ জন, যোৰহাটৰ ৩ জন, চিৰাং জিলাৰ ২ জন, ডিব্ৰুগড়ৰ ২ জন, আৰু মাজুলীৰ ১ জন বুলি জানিব পৰা গৈছে।
এওঁলোকক সহায়ৰ হাত আগবঢ়াই মানৱতাৰ উৎকৃষ্ট নিদৰ্শন দাঙি ধৰিছে বাংগালোৰ বড়ো এছ’চিয়েচন আৰু এবছু কেন্দ্ৰীয় সমিতিৰ কান্তেশ্বৰ বসুমতাৰী, হৰি ব্ৰহ্ম, ৰঞ্জিত বসুমতাৰী, আৰু এন্থনী নাৰ্জাৰীয়ে ।
