নিউজ ডেস্ক:
ৰাচিৰ আৰআইএমএছ হস্পিটেলত পশুখাদ্য দুর্নীতি গোচৰত দোষী সাব্যস্ত ৰাষ্ট্রীয় জনতা দলৰ সভাপতি লালু প্রসাদ যাদবে প্রভাৱ খটুৱাই আছে। তেওঁ যদিও ৰাচিৰ জেলত শাস্তি ভোগ কৰি আছে, কিন্তু তেওঁৰ দখলত ‘ৰিমছ’ৰ ১৮টা পেয়িং ৱার্ড আছে। শুনা মতে, লালুক ক’ৰোনাৰ পৰা বচাবলৈ ৰিমছত ভিভিআইপি ব্যৱস্থা কৰা হৈছে।
উল্লেখ্য, ঝাড়খণ্ডত ৰাষ্ট্রীয় জনতা দল মহাজোটৰ চৰকাৰৰ সৈতে আছে। আনহাতে, হস্পিটেলত বেড নথকাৰ অজুহাত দেখুৱাই কৰোনা সংক্রমিত ৰোগীসকলক অন্য হস্পিটেললৈ স্থানান্তৰ কৰোৱা হৈছে। উল্লেখযোগ্য যে, লালু প্রসাদ যাদব ৰাচিৰ জেলত বন্দী হৈ থাকিলেও, তেওঁ প্রথমৰ পৰাই চিকিৎসাৰ অজুহাতত ৰিমছ হস্পিটেলত আছে। শাস্তি ঘোষণাৰ পিছতেই তেওঁৰ দেহত বহু ৰোগ পোৱা যায়, আৰু সেই কাৰণে তেওঁ হস্পিটেলত চিকিৎসাৰত।
ইফালে ঝাড়খণ্ডত ক’ৰোনাৰ ঘটনা দিনক দিনে বাঢ়ি আছে, আৰু হস্পিটেলত বেড নথকাৰ বাবে ৰোগীসকলক বাধ্যতামূলক মাটিত বিছনা পাতি চিকিৎসা কৰা হৈছে। আৰু এই সঙ্কটৰ সময়ত বিৰোধী দলসমূহে প্রশ্ন তুলিছে যে, এই মহামাৰিৰ সময়ত পশুখাদ্য দুর্নীতি গোচৰত দোষী সাব্যস্ত লালু প্রসাদ যাদব যদি শাসক দলৰ জোটৰ সৈতে যুক্ত ন’হৈ কোনো সাধাৰণ বন্দী হ’লহেঁতেন, তেতিয়াহ’লেও ৰিমছত তেওঁৰ এনেধৰণৰেই চিকিৎসা হ’লহেঁতেন নে?
কিন্তু এই মহামাৰীৰ সময়ত হেমন্ত চোৰেন চৰকাৰে অকাৰণত হস্পিটেলৰ ১৮টা কোঠা দখল কৰি ৰাখি দিছে। বিজেপিৰ নেতা তথা প্রাক্তন মুখ্যমন্ত্রী বাবুলাল মাৰান্দীয়ে এই বিষয়ত ৰাজ্যৰ মুখ্যমন্ত্রী হেমন্ত চোৰেনক এখন পত্ৰও দিছে।
