নিউজ ডেক্স:
অসম, পশ্চিম বংগ, কেৰালা, তামিলনাডু আৰু পুডুচেৰিৰ নিৰ্বাচন অহা বছৰৰ এপ্ৰিল মাহৰ ভিতৰত অনুষ্ঠিত হোৱা সম্ভাৱনা আছে৷ তাৰ আগতেই অৰ্থাৎ জানুৱাৰী মাহত নতুন সভাপতি নিৰ্বাচন হোৱাৰ আশা আছে কংগ্ৰেছত৷ দলৰ সূত্ৰত এই কথা জানিব পৰা গৈছে৷ উল্লেখ্য যে কংগ্ৰেছৰ সভাপতি নিৰ্বাচন প্ৰক্ৰিয়া সহজ নহয়৷ তাৰ বাবে প্ৰয়োজন এআইচিচিৰ অধিবেশন৷
ইয়াতে সমবেত হয় এআইচিচিৰ সদস্যসকল৷ সম্প্ৰতি ক’ৰোনাৰ বাবে তৎকালীনভাৱে এআইচিচিৰ অধিবেশন আয়োজন কৰা সম্ভৱ নহয়৷ ইপিনে দলৰ ২৩ জন শীৰ্ষ নেতাই নেতৃত্ব সলনি কৰাক লৈ চিঠি দিছিল৷ আনহাতে সোমবাৰে কংগ্ৰেছৰ ৱৰ্কিং কমিতিৰ সভাত পদত্যাগৰ ইচ্ছা প্ৰকাশ কৰিছিল ছোনীয়া গান্ধীয়ে৷ অৱশ্যে শেষ পৰ্যন্ত তেওঁৰ ইস্তফাপত্ৰ গৃহিত নহ’ল৷
কংগ্ৰেছৰ নেতাসকলে ভাবিছিল, সকলোতে ব্যৰ্থ ৰাহুল গান্ধীক পুনৰ দায়িত্ব দিয়াৰ৷ কিন্তু তাত সন্মত নহয় ৰাহুল গান্ধী৷ যদি ৰাহুল গান্ধী সন্মত নহয় তেন্তে নিৰ্বাচন আয়োজন কৰিব লাগিব৷ সেয়ে এআইচিচিৰ অধিবেশন আয়োজন কৰি নিৰ্বাচন হ’ব লাগিব জানুৱাৰী মাহত৷
নিৰ্বাচন প্ৰক্ৰিয়াত জড়িত কংগ্ৰেছৰ দুগৰাকী নেতাই সংবাদ প্ৰতিষ্ঠানক এনেদৰে জনাইছে৷ জানুৱাৰীত সভাপতি নিৰ্বাচন কৰাৰ কেইবাটাও কাৰণ আছে৷ প্ৰথম কাৰণটো হ’ল ক’ৰোনা পৰিস্থিতি স্বাভাৱিক নহ’লে নিৰ্বাচন প্ৰক্ৰিয়া সম্পন্ন কৰা সম্ভৱ নহয়৷
দ্বিতীয়তে কংগ্ৰেছে বিচাৰিছে সময়৷ ৰাহুল গান্ধীক বুজাই বঢ়ায় সন্মত কৰাৰ আৰু তৃতীয়তে এই সময় সভাপতি নিৰ্বাচনৰ উপযুক্ত সময়৷ পশ্চিম বংগ, অসম, কেৰালা, তামিলনাডু আৰু পুডুচেৰিৰ নিৰ্বাচন প্ৰক্ৰিয়া আৰম্ভ হ’ব অহা বছৰৰ মাৰ্চ-এপ্ৰিল মাহত৷ কংগ্ৰেছে বিচাৰিছে এই নিৰ্বাচনবোৰ নতুন সভাপতি আৰু তেওঁৰ নিজস্ব দলৰ নেতৃত্বত যুঁজ দিব৷ যিহেতু এইবাৰ নিৰ্বাচন কংগ্ৰেছৰ বাবে বহু সম্ভাৱনাময়৷ পুডুচেৰিত ক্ষমতাত আছে কংগ্ৰেছ৷
তেওঁলোকৰ আশা এই কেন্দ্ৰীয় শাসিত ৰাজ্যখনত ক্ষমতা ধৰি ৰাখিব পাৰিব৷ অসম আৰু কেৰালাত কংগ্ৰেছ প্ৰধান বিৰোধী দল৷ কেৰালাত সোনা পাচাৰ কাণ্ডত চাপত আছে পিনাৰাই বিজয়ন চৰকাৰ৷ সেই সুযোগ কামত লগাব হাত শিবিৰে৷ অসমত এআইউডিএফৰ লগত মিত্ৰতা কৰি বিজেপিক প্ৰত্যাহ্বান দিবলৈ প্ৰস্তুতি চলাই আছে৷ তামিলনাডুত ডিএমকে-কংগ্ৰেছৰ মিত্ৰতাই সফলতা লাভ কৰাৰ আশা আছে৷ পশ্চিম বংগত কংগ্ৰেছৰ বেছি আশা নাই৷ এইখন ৰাজ্যত বাওপন্থীৰ লগত মিত্ৰতা কৰি ভোটৰ অংকটো বঢ়াবলৈ চেষ্টা কৰিব৷
