নতুন কৃষি আইনৰ বিৰুদ্ধে নৰেন্দ্ৰ মোদী চৰকাৰৰ বিৰুদ্ধে কার্যত যুদ্ধ ঘোষণা কৰিলে কংগ্রেছ সভানেত্রী ছোনিয়া গান্ধীয়ে। কৃষি আইন নাকচ কৰিবলৈ কংগ্রেছশাসিত ৰাজ্যবোৰক আইন প্রণয়নৰ চিন্তা-ভাবনা কৰিবলৈ আহ্বান জনালে ছোনিয়া গান্ধীয়ে।
দেশজোৰা কৃষক সংগঠনসমূহৰ বিক্ষোভত সোমবাৰৰ ছোনিয়াৰ এই আহ্বানে যে মোদী চৰকাৰৰ বিৰুদ্ধে প্রতিবাদক অধিক শক্তিশালী কৰিব, সেই কথা বহুতেই অনুমান কৰিছে।
কিন্তু কেন্দ্রীয় আইনক কেনেদৰে নাকচ কৰা যাব?
সেই উপায়ো দিছে কংগ্রেছৰ শীর্ষ নেতা কে চি বেনুগোপালে। টুইটাৰত তেওঁ লিখে, “মাননীয়া কংগ্রেছ সভানেত্রী, কংগ্রেছশাসিত ৰাজ্যবোৰক তেওঁলোকৰ ৰাজ্যত সংবিধানৰ ২৫৪(২) ধাৰাৰ অধীনত এনে আইন গৃহীত কৰাৰ সম্ভাৱনা ভাবি চোৱাৰ আহ্বান জনাওক, যাতে (কৃষি আইনক লৈ) কেন্দ্রীয় আইনক নাকচ কৰা যায় আৰু তাত ৰাষ্ট্রপতিৰ সন্মতিৰ প্রয়োজন হয়।”