নিউজ ডেস্কঃ
যোগী আদিত্যনাথ চৰকাৰৰ মিছন শক্তি অভিযানে মহিলা আৰু শিশুসকলৰ ওপৰত অপৰাধ সংঘটিত কৰাসকলৰ বিৰুদ্ধে কাৰ্যব্যৱস্থা গ্ৰহণ আৰম্ভ কৰি দিছে। মহিলাসকলৰ সুৰক্ষাৰ বাবে নৱৰাত্রিৰ প্রথম দিনাৰ পৰা আৰম্ভ হোৱা অভিযান অনুযায়ী, এই পর্যন্ত ১৪ দোষীক ফাঁচিৰ শাস্তি শুনোৱা হৈছে।
উত্তৰ প্ৰদেশত মিছন শক্তি আৰম্ভ হোৱাৰ পিছত ৰাজ্য চৰকাৰে মহিলা আৰু শিশুসকলৰ বিৰুদ্ধে অপৰাধকাৰীসকলৰ শাস্তি পোৱাৰ পৰিসংখ্যা জাৰি কৰিছে। প্রাপ্ত তথ্য অনুযায়ী, বিগত এক বছৰত মহিলা আৰু শিশুসকলৰ বিৰুদ্ধে অপৰাধ কৰা ১৪ জন দোষীৰ ফাঁচিৰ শাস্তি হৈছে।
উত্তৰ প্রদেশৰ গৃহ সচিব অবনীশ কুমাৰ অৱস্থিয়ে জনায়, আঠটা গোচৰত ২২ অভিযুক্তক জে’ল আৰু জৰিমনাৰ শাস্তি শুনোৱা হৈছে। ২৮টা গোচৰৰ শুনানি আৰম্ভ হোৱা নাই। মহিলা আৰু শিশুৰ বিৰুদ্ধে অপৰাধত জড়িত ৮৮টা গোচৰত ১১৭ অভিযুক্তৰ জামিন খাৰিজ কৰা হৈছে।
আনহাতে, ১১টা গোচৰত ২০ অভিযুক্তক আজীৱন কাৰাদণ্ডেৰে দণ্ডিত কৰা হৈছে। গৃহ সচিবে কয়, মিছন শক্তি অভিযান অনুযায়ী, মহিলা আৰু শিশুৰ সৈতে অপৰাধ কৰা ব্যক্তিসকলে শাস্তি আৰু দ্রুতগতিত যাতে পায়, সেইটোৰ ওপৰত কাম চলিছে।
উল্লেখ্য যে ফাঁচিৰ শাস্তি পোৱা অপৰাধীসকল উত্তৰ প্রদেশৰ হাপুড়, মুজফৰনগৰ, লক্ষ্ণৌ, আমৰোহা, বেৰেলি আৰু ৰামপুৰৰ বাসিন্দা। লক্ষ্ণৌত ছয় বছৰীয়া নাবালিকাক ধর্ষণ কৰি হত্যা কৰাৰ দোষী বাবলুক ফাঁচিৰ শাস্তি দিয়া হৈছে। ইয়াৰ উপৰি ধর্ষণ কৰা ২০ জন দোষীক আজীৱন কাৰাদণ্ডৰ শাস্তি শুনোৱা হৈছে।
