নিউজ ডেক্স:
জম্মু কাশ্মীৰক লৈ বৃহৎ ঘোষণা; এতিয়াৰে পৰা তাত প্ৰতিজন ভাৰতীয় নাগৰিকে কিনিব পাৰিব মাটি। কেন্দ্ৰীয় চৰকাৰৰ নতুন ঘোষণা অনুসৰি মিউনিচিপাল এৰিয়া আৰু নগৰীয়া এলেকাত সকলোৱে কিনিব পাৰিব মাটি।
এতিয়াৰে পৰা ঠাইডোখৰত মাটি কিনিবলৈ স্থানীয় বাসিন্দা হোৱাৰ প্ৰয়োজন নহ’ব। জম্মু কাশ্মীৰৰ উপ-ৰাজ্যপাল মনোজ সিনহাই মঙলবাৰে এই কথা জানিবলৈ দি কয় যে, “জম্মু কাশ্মীৰত ঔদ্যোগিক বিকাশৰ বাবে এই পদক্ষেপ গ্ৰহণ কৰা হৈছে যদিও কৃষিভূমি সমূহ কৃষকৰ কাৰণে সংৰক্ষিত কৰি ৰখা হৈছে।”
আনহাতে, এতিয়াৰে পৰা জম্মু কাশ্মীৰত অন্ত পৰিল ৰণবীৰ দণ্ডবিধি আইন। উক্ত কেন্দ্ৰীয় শাসিত অঞ্চলটোত ভাৰতীয় দণ্ডবিধি আইন আৰু Criminal Procedure Code প্ৰযোজ্য কৰা হ’ব। কেন্দ্ৰীয় গৃহ সচিব অজয় ভল্লাৰ স্বাক্ষৰিত এখন ৰাজপত্ৰিত জাননীৰ যোগেদি এই পদক্ষেপসমূহৰ ঘোষণা কৰা হয়।
উল্লেখযোগ্য এই ঘোষণাত প্ৰত্যক্ষ বা পৰোক্ষভাৱে বিতাড়িত কাশ্মীৰৰ পণ্ডিতসকলৰ পুনৰ সংস্থাপনৰ ক্ষেত্ৰত কোনো পদক্ষেপে স্থান পোৱা পৰিলক্ষিত হোৱা নাই।
