ASSAM TIMES POST
নগাঁও:৮৫৫ জন শ্বহীদৰ ত্যাগৰ বিনিময়ত অসমবাসীয়ে লাভ কৰা অসম চুক্তিৰ ফচল স্বৰূপ ৰাষ্ট্ৰীয় নাগৰিকপঞ্জীৰ চুড়ান্ত তালিকা প্ৰকাশ পাবলৈ মাথো দুটা দিন থকাৰ পূৰ্বে নগাঁৱত বিদেশীৰ সন্দেহত গ্ৰেপ্তাৰী পৰোৱানা জাৰি কৰা হ’ল অসম আন্দোলনৰ ৮৫৫জন শ্বহীদৰ অন্যতম মদন মল্লিক ওৰফে মদন সৰকাৰৰ পৰিয়াললৈ।
১৯৮৩চনত নগাঁৱৰ ডালিমবাৰিত অসম আন্দোলনত প্ৰাণ আহুতি দিয়া শ্বহীদ মদন মল্লিকৰ পত্নী তথা তিনি গৰাকী পুত্ৰলৈ এই গ্ৰেপ্তাৰী পৰোৱানা জাৰি কৰা হয়। আৰ্থিক দীনতাত ভোগা পৰিয়ালটোৱে আজি জামিন বিচাৰি নগাঁও জিলা সত্ৰ ন্যায়াধীশৰ আদালতত হাজিৰ হয় ৷
উল্লেখযোগ্য যে উচ্চতম ন্যায়ালয়ৰ দ্বাৰা পৰিচালিত ৰাষ্ট্ৰীয় নাগৰিকপঞ্জীৰ সমগ্ৰ প্ৰক্ৰিয়াটোক বাধাগ্ৰস্ত কৰিবলৈ এচাম দুষ্ট চক্ৰই অহৰহ ষড়যন্ত্ৰ কৰি আহিছে। এই দূৰ্ভগীয়া পৰিয়ালটোৰ বিৰুদ্ধেও অসমৰ বিভিন্ন ঠাইত ওজৰ-আপত্তি দাখিল কৰিছিল এচাম লোকে।
সেই বাতৰিও কিছূ দিন পূৰ্বে সংবাদ মাধ্যমত প্ৰচাৰিত হৈছিল। কিন্তু পুনৰ পৰিয়ালটোলৈ বিদেশীৰ সন্দেহত সীমান্ত আৰক্ষীয়ে গ্ৰেপ্তাৰী পৰোৱানা জাৰি কৰে ৷ আৰক্ষীৰ এই কাৰ্যই সকলোকে আচৰিত কৰি তুলিছে ৷
অসম তথা অসমীয়াৰ বাবে সৰ্বস্ব হেৰুওৱা এই পৰিয়ালটিৰ কাষত বৰ্তমান থিয় দিবলৈ অসমৰ কোনো এটা জাতীয়তাবাদী দল-সংগঠনে প্ৰয়োজন বোধ কৰা নাই।
অসমীয়াৰ আশাৰ দলিল স্বৰূপ, শ্বহীদৰ কেঁচা তেজৰ ফচল স্বৰূপ ৰাষ্ট্ৰীয় নাগৰিক পঞ্জী প্ৰকাশৰ আগমুহুৰ্তত শ্বহীদ পৰিয়ালক বিদেশী ঘোষিত কৰা কাৰ্যই এতিয়া সকলোকে লজ্জ্বিত কৰাৰ লগতে তীব্র প্ৰতিক্ৰিয়াৰ সৃষ্টি কৰিছে।
