নিউজ ডেস্কঃ
নিজৰ জিম্মাত ৰাখি সুশীল কুমাৰক সোধপোছ কৰিছে আৰক্ষীয়ে। কিন্তু তদন্তত সহযোগিতা কৰা নাই দুবাৰৰ অলিম্পিক পদক বিজয়ী মল্লযুঁজাৰুগৰাকীয়ে। তেওঁৰ সৈতে দুষ্কৃতিকাৰীৰ সংযোগ থকাৰ কোনো কথাই স্বীকাৰ কৰা নাই তেওঁ। জানিব পৰা মতে, জে’লৰ ভিতৰতেই তেওঁ হেনো হত্যাৰ ভাবুকি পাইছে।
ঘটনাৰ স্মৃতিৰ বাবে মঙ্গলবাৰে সুশীল কুমাৰক ছত্রশাল ষ্টেডিয়ামলৈ লৈ যোৱা হয়। মডেল টাউনৰ তেওঁৰ ফ্লেটলৈও লৈ যোৱা হয়। কুখ্যাত দু্ষ্কৃতিকাৰী নীৰজ বাৱানাৰ সৈতে তেওঁৰ যোগাযোগৰ প্রমাণ লাভ কৰা হৈছে। কিন্তু সুশীল কুমাৰে একোতেই সেয়া আৰক্ষীৰ ওচৰত স্বীকাৰ কৰা নাই। তেওঁৰ স্বীকাৰোক্তিত অসঙ্গতিও লক্ষ্য কৰা বুলি জনাইছে তদন্তকাৰীসকলে। সুশীলে জনাইছে, মল্লযুঁজাৰুসকলৰ বিবাদ মীমাংসা কৰিবলৈহে তেওঁ ঘটনাৰ দিনা ছত্রশাল ষ্টেডিয়ামলৈ গৈছিল।
উল্লেখ্য, উক্ত হত্যাৰ ঘটনাত জড়িত সুশীলৰ চাৰি সঙ্গীকে মঙ্গলবাৰে নিশা গ্রেপ্তাৰ কৰা হয়। এওঁলোক হ’ল ভুপেন্দৰ, মোহিত, গুলাব আৰু মনজিৎ। আটাইকেইজনে কালা জাথেড়ি আৰু নীৰজ বাৱানাৰ দলৰ সৈতে জড়িত। প্রত্যেকেই ঘটনাৰ দিনাৰ প্রতিটো মুহূর্ত আৰু জড়িত থকা ব্যক্তিসকলৰ নাম উল্লেখ কৰিছে। প্রত্যেকৰে বিৰুদ্ধে জামিনবিহীন গ্রেপ্তাৰী পৰোৱানা জাৰি কৰা হৈছে। জানিব পৰা মতে, সুশীলৰ সৈতে এওঁলোকক মুখামুখীকৈ বহুৱাই জেৰা কৰা হ’ব।
