নিউজ ডেস্কঃ
ভাৰতত নিজস্ব বিষয়া নিয়োগৰ বিষয়ত টুইটাৰক শেষ সুযোগ দিলে কেন্দ্রীয় চৰকাৰে। ভাৰতত বিভিন্ন ইণ্টাৰনেট মাধ্যমৰ কোম্পানীবোৰৰ ক্ষেত্ৰত কেন্দ্রীয় চৰকাৰে যি নতুন আইন আনিছে, টুইটাৰে নিয়ম নামানিলে উক্ত আইনৰ ভিত্তিত কঠোৰ শাস্তিৰ সন্মুখীন হ’ব পাৰে।
‘‘ভাৰতীয় তথ্য-প্রযুক্তি আইনৰ ৭৯ নম্বৰ ধাৰাৰ অধীনত যিবোৰ আইন পৰে উক্ত আইনবোৰ টুইটাৰে অবিলম্বে মানিব লাগিব। নিয়ম নামানিলে ভবিষ্যতে এই আইন আৰু ভাৰতীয় দণ্ডবিধিৰ অধীনত কঠোৰ শাস্তিৰ সন্মুখীন হ’ব লাগিব পাৰে কোম্পানীটোৱে৷’’ এই কথা জনাইছে কেন্দ্রই। সম্প্রতি উপ-ৰাষ্ট্রপতি ভেঙ্কায়া নাইডুৰ নিজস্ব টুইটাৰ একাউন্টৰ পৰা নীলা টিক বা ভেৰিফাইড একাউন্টৰ চিহ্ন আঁতৰাই নিয়ে টুইটাৰে। টুইটাৰৰ তৰফৰ পৰা যুক্তি দিয়া হয় যে বিগত ছমাহ ধৰি একাউন্টটি ব্যৱহাৰ নোহোৱাত আঁতৰাই নিয়া হৈছে নীলা টিক বেজ। তাৰ পিছতেই কেন্দ্রীয় চৰকাৰে এক কথাত এই চৰম সকীয়নি প্ৰদান কৰে।
উল্লেখ্য, সাধাৰণতে টুইটাৰ বা ফেচবুকৰ দৰে ইণ্টাৰনেট মাধ্যমে তাত পোষ্ট কৰা বিষয়ৰ দায়-দায়িত্ব সন্দৰ্ভত এক নিৰাপত্তা পায়। কোৱা হয়, যিয়ে পোষ্ট কৰিছে, দায়িত্ব তেওঁৰ, কোম্পানীটোৰ নহয়। কিন্তু নতুন আইনৰ ক্ষেত্রত পোষ্টৰ দায়িত্ব গৈ পৰিব উক্ত কোম্পানীটোৰ ওপৰতেই। যোৱা ফেব্রুৱাৰী মাহৰ পৰা টুইটাৰে ইয়াকে লৈ কেন্দ্রীয় চৰকাৰৰ সৈতে আইনী যুঁজ চলাই আছে। সেই সময়তেই প্রধানমন্ত্রী নৰেন্দ্র মোদীৰ বিৰোধী কেইবাটাও একাউন্ট ব্লক কৰিবলৈ কৈছিল কেন্দ্রীয় তথ্য আৰু প্রযুক্তি মন্ত্রী ৰবিশঙ্কৰ প্রসাদে।
