নিউজ ডেস্কঃ
বৰদিনৰ উৎসৱত ছাত্ৰ-ছাত্ৰীক মাংস-ভাত পৰিবেশনৰ দোষত কর্নাটকত এখন স্কুলক বন্ধ কৰাৰ নির্দেশ দিলে খণ্ড শিক্ষা বিষয়াই। ৰাজ্যখনৰ বাগালকোট জিলাৰ ইলকাল চহৰৰ ঘটনা এয়া।
স্কুল কর্তৃপক্ষক পত্ৰ দি শিক্ষা বিষয়াগৰাকীৰ নির্দেশ, ‘আমি জানিব পাৰিছো যে বৰদিন উদযাপন উপলক্ষে ছাত্ৰ-ছাত্ৰীসকলক মাংস পৰিবেশন কৰা হৈছে। এয়া অত্যন্ত গর্হিত কাম। এই ঘটনাই শিক্ষা বিভাগক অস্বস্তিত পেলাইছে। গতিকে পৰৱর্তী নির্দেশ নিদিয়া পর্যন্ত স্কুল বন্ধ ৰাখিব লাগিব।’
শিক্ষা বিষয়াগৰাকীৰ এই নির্দেশক কেন্দ্ৰ কৰি হুলস্তুল লাগি পৰে অঞ্চলটোত। পিছত স্কুল বন্ধৰ নির্দেশৰ খবৰ শিক্ষা বিভাগে জানিব পৰাত ততালিকে সেই নির্দেশ উঠাই লোৱা হয়। ৰাজ্যখনৰ শিক্ষা বিভাগৰ দাবী, উপায়ুক্ত বা শিক্ষা বিভাগৰ কাকোকে নজনোৱাকৈ বিষয়াজনে এনে নির্দেশ দিছিল।
