ডকমকাত দুই মোবাইল চোৰ গ্ৰেপ্তাৰঃ ১০ টা চুৰি মোবাইল উদ্ধাৰ

ASSAM TIMES POST
ডিফুঃ কাৰ্বি আংলং জিলাৰ বিভিন্ন ঠাইত মোবাইল চোৰে সন্ত্ৰাস সৃষ্টি কৰি থকাৰ সময়তে ডকমকা আৰক্ষীয়ে দুটাকৈ মোবাইল চোৰ আটক কৰাৰ লগতে হাওৰাঘাট এলেকাৰ পৰা দহটাকৈ চুৰি মোবাইল উদ্ধাৰ কৰা ঘটনাকলৈ চাঞ্চল্যৰ সৃষ্টি হৈছে৷

প্ৰাপ্ত খবৰ অনুসৰি যোৱা ২৪ জুলাইত লাংহিন বজাৰৰ এটা মোবাইল দোকানত হোৱা চুৰি ঘটনা সংক্ৰান্তীয় গোচৰৰ তদন্ত চলাই ডকমকা আৰক্ষীয়ে এই সফলতা লাভ কৰিছে৷ উক্ত ঘটনাৰ তদন্ত চলাই ডকমকা থানাৰ ভাৰপ্ৰাপ্ত বিষয়া বিতুপন চুতীয়াৰ নেতৃত্বত আৰক্ষীৰ এটা দলে কালি উক্ত ঘটনাত জড়িত দুটা চোৰক গ্ৰেপ্তাৰ কৰিবলৈ সক্ষম হয়৷

ধৃত চোৰ দুটা হাওৰাঘাটৰ সোণাৰি তেৰাঙ গাঁৱৰ সুমিত তেৰাঙ আৰু বিকাশ ৰংপি বুলি চিনাক্ত কৰা হৈছে৷ চোৰ দুটাৰ স্বীকাৰোক্তিৰ ভিত্তিত আৰক্ষীয়ে হাওৰাঘাট এলেকাৰ বিভিন্ন স্থানৰ পৰা দহটা মোবাইল হেণ্ডছেট উদ্ধাৰ কৰিবলৈ সক্ষম হৈছে বুলি জানিব পৰা গৈছে৷