বিজেপি দলত সম মৰ্যাদা আৰু সম অধিকাৰ প্রদান কৰা হয় : বিধায়ক ৰূপক শৰ্মা
ASSAM TIMES POST
নগাঁও: শাৰদীয় দুৰ্গোৎসৱৰ আনন্দ- উছাহৰ মাজতে ভাৰতীয় জনতা পাৰ্টিৰ নীতি- আৰ্দশৰ প্ৰতি আকৃষ্ট হৈ আজি বিজেপি দলত যোগদান কৰিলে নগাঁও জিলা পৰিষদৰ ভকতগাঁও জিলা পৰিষদৰ কংগ্রেছ দলৰ সদস্য ৱাজিবুল্লা কবিৰ সহ সহস্ৰাধিক কংগ্ৰেছ ,এ আই, ইউ, ডি, এফ আৰু অগপ দলৰ সদস্যই ।
নগাঁও জিলা সাহিত্য সভাৰ কমলা দেৱী তোদী ভৱনত আজি অনুষ্ঠিত এই যোগদান কাৰ্যসূচীত নগাঁও সদৰ সমষ্টিৰ অৰ্ন্তগত লাওগাঁও হেৰাপট্টি, কেন্দুগুৰি ,বৰভেটি পঞ্চায়তৰ সভাপতি,আঞ্চলিক পঞ্চায়তৰ সদস্যৰ লগতে ডাকৰঘাট গাঁও পঞ্চায়ত আৰু ডিমৰুগুৰি পঞ্চায়তৰ আঞ্চলিক পঞ্চায়তৰ সদস্য আৰু আটাইকেইটা পঞ্চায়তৰ ৱাৰ্ড মেম্বাৰ সহ কেইবা শতাধিক কংগ্ৰেছ; অ গ প আৰু এ,আই,ইউ, ডি, এফ দলৰ জিলা আৰু মণ্ডল পৰ্যায়ৰ কেইবাগৰাকীও জ্যেষ্ঠ সদস্যৰ লগতে নগাঁও পৌৰসভাৰ ২নং মহলাৰ মহলা আয়ুক্ত আৰু ১৮নং মহলাৰ প্ৰাক্তন মহলা আয়ুক্তই নিজ নিজ দল ত্যাগ কৰি ভাৰতীয় জনতা পাৰ্টিত যোগদান কৰে।
আজি যোগদান কৰা সকলৰ ভিতৰত ভকত গাঁও জিলা পৰিষদৰ সদস্য ৱাজিবুল্লা কবিৰৰ উপৰি কংগ্রেছ দলৰ খাগৰিজান আঞ্চলিক পঞ্চায়তৰ উপসভানেত্ৰী মনোৱাৰা বেগম,লাওগাঁও আঞ্চলিক পঞ্চায়তৰ সদস্য জিবান নিহাৰ চৌধুৰী, নগাঁও জিলা কংগ্রেছৰ সাধাৰণ সম্পাদিকা গীতাৰাণী দাস,পাখিমৰীয়া ব্লক কংগ্রেছ কমিটিৰ সাধাৰণ সম্পাদক অমিয় কুমাৰ দাস,নগাঁও পৌৰসভাৰ ২ নং ৱাৰ্ডৰ ৱাৰ্ড কমিছনাৰ অনুপ সাহা অন্যতম ।
নগাঁও সদৰ সমষ্টিৰ বিধায়ক ৰূপক শৰ্মাৰ উপস্থিতিত কংগ্রেছ, অগপ,এ আই ইউ ডি এফৰ সহস্ৰাধিক সদস্যই আজি বি জে পি দলত যোগদান কৰে ।আনহাতে অন্যান্য দলৰ পৰা আহি বিজেপি দলত যোগদান কৰা সদস্য সকলক অভিনন্দন জনাই যোগদান সভাখনত বিধায়ক ৰূপক শৰ্মাই বিজেপি দলত যোগদান কৰা সকলক গামোছা পিন্ধাই আদৰণী জনাই কয় যে এই যোগদান কাৰ্যসূচীয়ে নগাঁৱত বিজেপি দলৰ ভেটি অধিক শক্তিশালী কৰাৰ লগতে দলীয় কৰ্মী সকলক উৎসাহিত কৰিছে ।
বিধায়ক শৰ্মাই আৰু কয় যে ৩০ কোটিৰো অধিক কাৰ্যকৰ্তা থকা বিশ্বৰ ভিতৰত সৰ্ববৃহৎ ৰাজনৈতিক দল হিচাপে চিহ্নিত হোৱা বিজেপি দলত প্ৰতিগৰাকী লোকক সম মৰ্যাদা আৰু সম অধিকাৰ প্রদান কৰা হয়। তেওঁ দলীয় নীতি আদৰ্শক সৰোগত কৰি সকলোকে সহযোগিতাৰে আগবাঢ়ি যাবলৈ আহবান জনায় । নগাঁও জিলা বিজেপিৰ সভাপতি জয়ম্ত নাথৰ সভাপতিত্বত অনুষ্ঠিত সভাখনত জিলা বিজেপিৰ উপসভাপতি বাবুল বৰা , বিজেপি দলৰ নগাঁও সদৰ মণ্ডলৰ সভাপতি সুভাষ দত্ত আদি উপস্হিত থাকে ।
