ASSAM TIMES POST
অজন্তা তালুকদাৰ, বোকাখাতঃ বোকাখাত নাট্য মন্দিৰত নাট্যম, বোকাখাতৰ নিবেদনত প্ৰদৰ্শিত হ’ব লগীয়া নাট্যকাৰ অমৰ শৰ্মাৰ “দ্যা আল্টিমেট বুমেৰাং” একাংক নাটখনিৰ এই বৰ্ষৰ নিবেদনৰ বাবে মঙলবাৰে শুভ মহুৰত অনুষ্ঠিত হৈ যায়। উদীয়মান প্ৰতিশ্ৰুতি সম্পন্ন যুৱ নাট্যকৰ্মী তথা নাট্যম, বোকাখাতৰ যুটীয়া সম্পাদক ৰাতুল ফুকনে পৰিচালনা কৰিব লগীয়া নাটখনিত অভিনয় কৰিব ক্ৰমে দীপজ্যোতি ঠাকুৰীয়া, প্ৰনৱ শইকীয়া, তৰুণ তীৰ্থ শইকীয়া, ময়ূৰী বৰা আৰু শিশু শিল্পী চিন্ময় হাজৰিকাই। সংগীত ব্যৱস্থাপনাত থাকিব মৃত্যুঞ্জয় শইকীয়া। নাট্যম, বোকাখাতৰ যুটীয়া সম্পাদক দীপজ্যোতি ঠাকুৰীয়াই আঁট ধৰা মহুৰত অনুষ্ঠানত বন্তি প্ৰজ্বলন কৰে নাট্যম, বোকাখাতৰ মুখ্য উপদেষ্টা তথা কবি-নাট্যকাৰ অমৰ শৰ্মাই। অনুষ্ঠানটিত আৰু উপস্থিত আছিল নাট্যম, বোকাখাতৰ উপসভাপতি অজন্তা তালুকদাৰ, শিশু শিল্পী চিন্ময় হাজৰিকাৰ মাতৃ তথা সাংস্কৃতিক কৰ্মী ৰূপালী হাজৰিকা, যুৱ নাট্যকৰ্মী প্ৰত্যাশা ভৰদ্বাজ, নাট্যগোষ্ঠীটোৰ সদস্যবৃন্দ, স্থানীয় গণ্যমান্য ব্যক্তিসকলকে ধৰি প্ৰায় ৪০ গৰাকী ব্যক্তি। নিজৰ ভাষণত পৰিচালক আৰু অভিনেতাসকলৰ লগতে সমূহ দলটোলৈ শুভেচ্ছা জ্ঞাপন কৰি উৎসাহিত কৰি তোলে নাট্যকাৰ অমৰ শৰ্মাই। লগতে নাটখনিৰ নাট্যকাৰ, পৰিচালক, অভিনেতা তথা আন কলা কুশলীকে ধৰি সকলো নাট্যগোষ্ঠীটোৰেই সদস্য বুলি নিজৰ ভাষণত গৌৰৱাম্বিত হৈ পৰে পৰিচালক ৰাতুল ফুকন। যুটীয়া সম্পাদক দীপজ্যোতি ঠাকুৰীয়াইও মহুৰত অনুষ্ঠানটিত শুভেচ্ছামূলক বক্তব্য ৰাখে। উল্লেখ্য যে যোৱাটো বৰ্ষত সাৰথি, বোকাখাতৰ নিবেদনত অসমৰ যশস্বী নাট পৰিচালক ৰোণাল্ড হুছেইনৰ পৰিচালনাৰে ‘দ্যা আল্টিমেট বুমেৰাং’ নাটখনিয়ে ভালেসংখ্যক একাংক নাট প্ৰতিযোগিতাত অংশ গ্ৰহণৰ জড়িয়তে প্ৰায় সকলো শিতানতে শ্ৰেষ্ঠ পুৰস্কাৰ লাভ কৰি সমগ্ৰ অসমতে সফলতা লাভ কৰাৰ লগতে ‘আইনা, জীৱনৰ ৰংগমঞ্চ’ৰ উদ্যোগত ৰাজ্যিক ভিত্তিত গুৱাহাটীত অনুষ্ঠিত একাংক নাট প্ৰতিযোগিতাত চতুৰ্থ স্থান লাভ আৰু কেইবাটাও শিতানত শ্ৰেষ্ঠ পুৰস্কাৰেৰে নাট্যনগৰী বোকাখাতলৈ গৌৰৱ কঢ়িয়াই আনিবলৈ সক্ষম হৈছিল। বিগত বৰ্ষৰ দৰে এইবাৰো নাটখনিয়ে অনুৰূপ সফলতা কঢ়িয়াই আনিব বুলি উপস্থিত ৰাইজে আশা প্ৰকাশ কৰাৰ লগতে নাট্যদলটিলৈ শুভকামনা জ্ঞাপন কৰিছে।
