আমিৰ খানৰ ছবি ‘লাল সিং চাড্ডা’ মুক্তিৰ পূৰ্বে বিতৰ্কত আৱদ্ধ হৈ আছে। #BoycottLaalSinghChaddha সামাজিক মাধ্যমত ট্ৰেণ্ডত চলি থকা দেখিবলৈ পোৱা গৈছে। আমিৰ খানৰ ছবি “লাল সিং চাড্ডা” ১১ আগষ্টত মুক্তি লাভ কৰিব। একে সময়তে, দৰ্শকৰ এই বৰ্জন প্ৰতিক্ৰিয়াৰ বাবে আমিৰ খান অতি দুখিত হৈ পৰিছে। ৰাইজৰ প্ৰতিক্ৰিয়াৰ পিছত, আমিৰ খানে জনসাধাৰণক তেওঁৰ চলচ্চিত্ৰ বৰ্জন নকৰিবলৈ অনুৰোধ জনাইছে।
দৰ্শকে আমিৰ খান আৰু কৰীণা কাপুৰৰ কিছুমান পুৰণি মন্তব্য বিচাৰি উলিয়াইছে, যিটো শেহতীয়াকৈ ভাইৰেল হৈ আছে। সেইকাৰণে মানুহে তেওঁৰ এই ছবিখন বৰ্জন কৰিছে। যেতিয়া আমিৰ খানক এই বৰ্জনৰ বিষয়ে সোধা হৈছিল, তেতিয়া তেওঁ কয় যে, “হয়, মই দুখ অনুভৱ কৰোঁ। একে সময়তে, এনেকুৱা কিছুমান কথাও কিছুমান লোকে কয় যে মই ভাৰতবৰ্ষক ভাল নাপাওঁ। তেওঁলোকে তেনেদৰেই বিশ্বাস কৰে কিন্তু সেয়া একেবাৰেই সঁচা নহয়। অনুগ্ৰহ কৰি মোৰ চিনেমা বৰ্জন নকৰিব। অনুগ্ৰহ কৰি মোৰ চিনেমা খন চাওক।”
‘লাল সিং চাড্ডা’ বৰ্জন কৰাৰ বাবে, মানুহে তেওঁৰ পৰা এটা পুৰণি বিবৃতি উলিয়াইছে। য’ত আমিৰ খানে কৈছিল যে, “শিৱ লিঙ্গত গাখীৰ আগবঢ়োৱাটো অৰ্থহীন, দৰিদ্ৰলোকক খুৱালে ভাল।” একে সময়তে, কৰীণাই কৈছিল যে “আমাৰ চিনেমা নচাব, আমি কাকো জোৰ নকৰোঁ।” উল্লেখ্য যে, লাল সিং চাড্ডা’ হলীউডৰ ক্লাছিক ‘ফৰেষ্ট গাম্প’ৰ পৰা ৰিমেক কৰা হৈছে।
