কংগ্ৰেছৰ ভোট বিভাজন কৰি বিজেপিক লাভান্বিত কৰিবলৈ গুজৰাট বিধানসভা নিৰ্বাচনত আম আদমি পাৰ্টী (আপ) আৰু আছাদুদ্দিন ওৱেইছিৰ AIMIM-এ যুঁজি আছে। এই ধাৰণা কংগ্ৰেছ নেতাসকলৰ।
আপৰ মুৰব্বী তথা দিল্লীৰ মুখ্যমন্ত্ৰী অৰবিন্দ কেজৰিৱালে গুজৰাটত নিৰ্বাচনৰ বাবে প্ৰচাৰ চলাই শাসনলৈ আহিলে সাধাৰণ জনতাৰ ব্যাপক উন্নতিৰ প্ৰতিশ্ৰুতি দিছে। আজি আহমেদাবাদ ভ্ৰমণলৈ অহা কংগ্ৰেছ নেতা অশোক গহলৌট আৰু কে চি বেনুগোপালে দাবী কৰে যে কেজৰিৱালৰ এই প্ৰতিশ্ৰুতিসমূহত বহু সুৰুঙা আছে। গুজৰাটৰ মানুহে বিশ্বাস নকৰিব। গুজৰাটৰ নিৰ্বাচনত কংগ্ৰেছৰ পৰ্যবেক্ষক গহলৌটে অভিযোগ কৰি কয় যে কেজৰিৱালে দিল্লীৰ চৰকাৰী কাৰ্যালয়ৰ পৰা মহাত্মা গান্ধীৰ ফটো আঁতৰাই এতিয়া গান্ধীৰ ৰাজ্য গুজৰাটত প্ৰচাৰ চলাই আছে।
দিল্লীত আপ চৰকাৰৰ আবকাৰী নীতিত দুৰ্নীতি সন্দৰ্ভত হুলস্থুল হৈ থকাৰ অভিযোগ আজি কংগ্ৰেছৰ। কেন্দ্ৰীয় সংস্থা তদন্তত নামিছে। অথচ বিজেপিশাসিত গুজৰাটত বিষাক্ত সুৰা সেৱন কৰি মৃত্যুমুখত পৰিছে হাজাৰ হাজাৰ লোক। কংগ্ৰেছৰ মুখপাত্ৰ সুপ্ৰিয়া শ্ৰীনতে কয়, “গুজৰাটৰ বিজেপি চৰকাৰে বিলকিছ বানোৰ ধৰ্ষণকাৰীক মুকলি কৰি দিয়ে। কেজৰিৱাল এই বিষয়ে নিমাত, দিল্লীৰ হিংসাৰ সময়ত তেওঁ যিদৰে অলসভাৱে বহি আছিল। ইয়াৰ দ্বাৰা প্ৰমাণিত হয় যে বিজেপি আৰু আম আদমী পাৰ্টিৰ মতাদৰ্শ এক।”
কংগ্ৰেছ নেতা বেনুগোপালৰ দাবী, কংগ্ৰেছে ৫ বছৰ পূৰ্বে নিৰ্বাচনত কেইখনমান আসন হেৰুৱালেও বছৰৰ শেষৰ ফালে গুজৰাটত ক্ষমতালৈ আহিব। একেৰাহে ৯০ দিনীয়া প্ৰচাৰ কাৰ্যসূচীৰ ৰূপৰেখা দাঙি ধৰা হʼব। ৫ ছেপ্টেম্বৰত গুজৰাট ভ্ৰমণৰ কথা আছে ৰাহুল গান্ধীৰ।
